ហុងកុង៖ក្រោយអំពើហិង្សា រដ្ឋាភិបាលចេញមុខព្រមានចលនាគំាទ្រលទ្ធិប្រជាធិបតេយ្យ
នៅថ្ងៃចន្ទ ទី១ ធ្នូនេះ មានការប៉ះទង្គិចគ្នាយ៉ាងហិង្សារវាងក្រុមបាតុករអ្នកគំាទ្រលទ្ធិប្រជាធិបតេយ្យ និងកម្លំាងប៉ូលីស។ កម្លំាងប៉ូលីសបានចេញអន្តរាគមន៍រារំាងក្រុមបាតុករដែលព្យាយាមឡោមព័ទ្ធវិមានរដ្ឋាភិបាល។ អំពើហិង្សាថ្មីនេះបានកើតមានឡើង ជាង ២ខែបន្ទាប់ពីអំពើហិង្សាកាលពីថ្ងៃទី២៨ កញ្ញាដែលបានបង្ខំកម្លំាងប៉ូលីសឲ្យប្រើដំបង និងគ្រាប់បែបបង្ហូរទឹកភ្នែកលើហ្វូងបាតុករ។ លោកប្រមុខរដ្ឋាភិបាលហុងកុងលឿង ជុនយីងបានប្រកាសព្រមាននៅថ្ងៃនេះថា លោកមិនអាចទុកបណ្តោយឲ្យស្ថានការណ៍របៀបនេះចេះតែបន្តទៅមុខបានឡើយ។
ចុះផ្សាយនៅថ្ងៃ៖
ស្តាប់ - ០២:១៤
ជាង ២ខែកន្លងមកហើយដែលគេមិនដែលបានឃើញព្រឹត្តិការណ៍ហិង្សាកើតមាននៅហុងកុងដូចនៅរាត្រីយប់ថ្ងៃអាទិត្យឆ្លងចូលថ្ងៃចន្ទ ទី១ ធ្នូនេះទេ។ គឺជាអំពើហិង្សាដ៏ធ្ងន់ធ្ងរទី១ បើគិតតំាងពីថ្ងៃទី២៨ កញ្ញាកន្លងទៅដែលកាលណោះ កម្លំាងប៉ូលីសក៏បានចាត់វិធានការចាស់ដៃដើម្បីវាយបង្រ្កាបលើហ្វូងបាតុករដែរ។ លោកប្រមុខរដ្ឋាភិបាលហុងកុងលឿង ជុនយីងបានប្រាប់ឲ្យដឹងនៅថ្ងៃចន្ទ ទី១ ធ្នូនេះថា កម្លំាងប៉ូលីសអាចនឹងចេញប្រតិបត្តិការវាយបង្រ្កាបជាថ្មីនាពេលឆាប់ៗនេះ និងបានបញ្ជាក់ជាថ្មីថា ចលនាគំាទ្រលទ្ធិប្រជាធិបតេយ្យដែលគេឲ្យឈ្មោះថា « Occupy Central » ជាចលនាមួយខុសច្បាប់ និងដែលពួកនេះធ្លាប់ទទួលបរាជ័យនាពេលកន្លងមក។ លោកលឿង ជុនយីងបានបន្ថែមថា ការបន្តព្យាយាមឡោមព័ន្ធវិមានរដ្ឋាភិបាល ក៏ដូចជាការបន្តកាន់កាប់តំបន់ពាណិជ្ជកម្មមួយចំនួនពីសំណាក់ពួកបាតុករគំាទ្រលទ្ធិប្រជាធិបតេយ្យ គឺជាទង្វើមួយដែលរដ្ឋអំណាចមិនអាចអត់ឱនឲ្យបានទៀតឡើយ។
យ៉ាងណាក៏ដោយ ការព្រមានរបស់លោកលឿង ជុនយីងមិនបានធ្វើឲ្យក្រុមបាតុករខ្វល់ខ្វាយប៉ុន្មានទេ ផ្ទុយទៅវិញ មេដឹកនំាបាតុករសិស្ស និស្សិតថែមបានចាត់ទុកទង្វើនៅយប់មិញរបស់ពួកគេថា ជាជោគជ័យទៀតផង នោះបើទោះបីជាត្រូវបញ្ចប់ដោយប្រឈមមុខយ៉ាងហិង្សាជាមួយកម្លំាងប៉ូលីសក៏ដោយក្តី។ ព្រឹត្តិការណ៍វាយបង្រ្កាបដោយបណ្តាលឲ្យរបួសជាច្រើននាក់ ក្នុងនោះមានប៉ូលីស ១១នាក់ ព្រមទំាងមានការចាប់ខ្លួនបាតុករប្រមាណជា ៤០នាក់។ គួររម្លឹកជូនឡើងវិញថា វិបត្តិអូសបន្លាយនៅហុងកុងបានកើតមានឡើង ក្រោយពីចិនប៉េកំាងបានប្រកាសកាលពីខែសីហាដែលថា ចិននឹងអនុញ្ញាតឲ្យមានការបោះឆ្នោតជាសកលនៅហុងកុងចាប់ពីឆ្នំា ២០១៧ ទៅ។ តែចំនួនបេក្ខជនឈរឈ្មោះត្រូវបានចិនកំណត់ឲ្យមាន ២ ឬ ៣នាក់ និងដែលចិនជាអ្នកជ្រើសរើសបេក្ខជនដោយខ្លួនឯង។
មកដល់ពេលនេះ មេបាតុករសិស្ស និស្សិត និងរដ្ឋអំណាចហុងកុងធ្លាប់បានជួបចរចាគ្នាម្តងហើយ តែគ្មានទទួលបានលទ្ធផលអ្វីទំាងអស់។ រីឯរដ្ឋអំណាចនៅប៉េកំាងក៏នៅមិនទាន់បានចាត់វិធានការអ្វីចំពោះក្បួនបាតុកម្មនៅពេលនេះដែរ តែក៏គ្មានអ្នកណាម្នាក់គិតថា រដ្ឋាភិបាលប៉េកំាងនឹងយល់ព្រមតាមការទាមទាររបស់ពួកបាតុករហុងកុងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ