ប្រមុខការទូតកម្ពុជាថៃនឹងជជែកអំពីសហប្រតិបត្តិការទ្វេភាគី
រដ្ឋមន្ត្រីការបរទេសកម្ពុជានិងថៃនឹងជួបគ្នារយៈពេល២ថ្ងៃនៅសប្តាហ៍ក្រោយនេះដើម្បីពិនិត្យឡើងវិញនូវកិច្ចសហប្រតិបត្តិការទ្វេភាគីរវាងប្រទេសជិតខាងទាំងពីរដែលកំពុងរកាំរកូសគ្នាក្នុងបញ្ហាបន្ទាត់ព្រំដែន។ សេចក្តីជូនដំណឹងរបស់ក្រសួងការបរទេសកម្ពុជានៅថ្ងៃនេះបញ្ជាក់ថា ភាគីទាំងពីរនឹងជជែកគ្នាលើបញ្ហាជាច្រើនដែលនឹងផ្តល់ប្រយោជន៍អោយគ្នាទៅវិញទៅមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ប្រមុខការទូតនៃប្រទេសកម្ពុជា និងថៃគ្រោងជួបគ្នា២ថ្ងៃនៅសប្តាហ៍ក្រោយនេះ ដើម្បីពិនិត្យឡើងវិញកិច្ចសហប្រតិបត្តិការទ្វេភាគី។ ការជួបគ្នានឹងត្រូវប្រព្រឹត្តិទៅនៅថ្ងៃទី២៥ និងទី២៦ខែធ្នូនៅក្នុងប្រទេសថៃនៅក្នុងក្របខណ្ឌនៃកិច្ចប្រជុំគណៈកម្មការចម្រុះទ្វេភាគីលើកទី៨ សម្រាប់កិច្ចប្រតិបត្តិការរវាងកម្ពុជានិងថៃ។
យោងតាមសេចក្តីជូនដំណឹងរបស់ក្រសួងការបរទេសកម្ពុជាដែលត្រូវបានចេញផ្សាយនៅថ្ងៃព្រហស្បតិ៍នេះ លោកឧបនាយករដ្ឋមន្ត្រីកម្ពុជាហោ ណាំហុង និងលោកឧបនាយករដ្ឋមន្ត្រីថៃ ស៊ូរ៉ាពង្ស តូវីចក្រឆៃគល់ នឹងពិភាក្សាគ្នាលើបញ្ហាជាច្រើនដែលផ្តល់ផលប្រយោជន៍អោយគ្នាទៅវិញទៅមក។ លោកកុយ គួងអ្នកនាំពាក្យក្រសួងការបរទេសកម្ពុជាបានពន្យល់ប្រាប់វិទ្យុបារាំងអន្តរជាតិបន្ថែមថា តំណាងរដ្ឋាភិបាលទាំងពីរអាចនឹងជជែកអំពីចំនុចណាដែលមិនទាន់បានបង្ហាញអំពីកិច្ចសហប្រតិបត្តិការល្អ ដើម្បីជំរុញអោយមានការសហការគ្នាល្អ។
បើតាមការបញ្ជាក់របស់លោកកុយ គួងកិច្ចប្រជុំរវាងប្រមុខការទូតកម្ពុជាថៃ គឺជាការជជែកអំពីកិច្ចសហប្រតិការទូទៅលើគ្រប់វិស័យដូចជាទេសចរ កសិកម្ម វប្បធម៌ជាដើម។ លោកថា បើទោះជានិយាយអំពីបញ្ហាព្រំដែន ក៏មិនមែនបញ្ហាបច្ចេកទេសលើបន្ទាត់ព្រំដែននោះដែរ។ តែជាកិច្ចសហប្រតិបត្តិការផ្លាស់ប្តូរទំនិញតាមព្រំដែន ឬជាការពង្រឹងសន្តិសុខតាមព្រំដែនជាដើម។
តាមពិត ជំនួបគណៈកម្មការចម្រុះថ្នាក់រដ្ឋមន្ត្រីការបរទេសកម្ពុជាថៃ គឺជាយន្តការមួយក្នុងចំណោមយន្តកាជំនួបដែលមាន៣រវាងកម្ពុជា និងថៃ។ ក្រៅពីកិច្ចប្រជុំប្រចាំឆ្នាំរវាងប្រមុខការទូតនេះ គឺនៅមានកិច្ចប្រជុំគណៈកម្មាធិការព្រំដែនទូទៅដែលដឹកនាំដោយសហប្រធានរដ្ឋមន្ត្រីការពារជាតិ និងកិច្ចប្រជុំគណៈកម្មការចម្រុះព្រំដែនដែលដឹកនាំដោយសហប្រធាន អ្នកជំនាញព្រំដែននៃប្រទេសទាំងពីរដែរ។ គឺតាមរយៈយន្តការទាំងបីនេះហើយដែលកម្ពុជានិងថៃបានដោះស្រាយបញ្ហាទ្វេភាគីជាមួយគ្នានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ