រដ្ឋាភិបាលមិនបារម្ភចំពោះដីកាកោះលោកហ៊ុន ម៉ាណែត
ក្រោយការកើតហេតុការណ៍ប្រទូសរ៉ាយគ្នានៅទីក្រុងឡងប៊ីច(Long Beach) រវាងសន្តិសុខរបស់លោកហ៊ុន ម៉ាណែត និងមេធាវីមួយរូបនៅទឹកដីអាមេរិក កាលពីពេលថ្មីនោះ ករណីនេះ បានឈានដល់ដៃតុលាការរបស់អាមេរិកហើយ។ ដោយឡែក រដ្ឋាភិបាលកម្ពុជា បានអះអាងថា រដ្ឋាភិបាលគ្មានការព្រួយបារម្ភចំពោះបណ្តឹងនេះទេ ព្រោះថាគ្រាន់តែជាការបំបាក់មុខកូនប្រុសនាយករដ្ឋមន្ត្រីតែ ប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៣១
អ្នកនាំពាក្យទីស្តីការគណៈរដ្ឋមន្ត្រីកម្ពុជា បានប្រតិកម្មថា ការដាក់ពាក្យប្តឹងលោកហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រីហ៊ុន សែន គឺគ្មានការព្រួយបារម្ភ ព្រោះតែករណីនេះ គឺជាករណីនយោបាយ ដើម្បីបំប៉ោងព្រឹត្តិការណ៍នឹងមិនចង់ឱ្យលោកហ៊ុន ម៉ាណែត ដែលកំពុងស្វែងរកប្រជាប្រិយភាពនៅបរទេសខ្លបខ្លាច។ លោកផៃ ស៊ីផាន បានបន្តថា អ្វីដែលតុលាការស្វែងរកអង្គហេតុមកដាក់បន្ទុកនោះ គឺជាការបំបាក់មុខតែប៉ុណ្ណោះ។
បណ្តឹងដែលនាំឱ្យមានករណីប្តឹងទៅកាន់តុលាការនេះ បានកើតឡើងក្រោយការប្រទូសរ៉ាយមួយ បានកើតឡើង រវាងក្រុមសន្តិសុខការពារលោកហ៊ុន ម៉ាណែត ក្នុងព្រឹត្តិការណ៍ចូលរួមពិធីបុណ្យចូលឆ្នាំខ្មែរនៅអាមេរិក និងមេធាវីជនជាតិអាមេរិកម្នាក់ ដែលព្យាយាមមកយ៉ាងកៀកនឹងលោកហ៊ុន ម៉ាណែត។ ជាហេតុការណ៍ ដែលកម្លាំងសន្តិសុខ បានរុញច្រានបុរសម្នាក់ ដែលជាមេធាវីនោះប៉ះទៅនឹងដីដែលបណ្តាលឱ្យមានរបួស។ លោកហ៊ុន ម៉ាណែត ដែលកំពុងធ្វើដំណើរនៅសហរដ្ឋអាមេរិក មិនទាន់បានប្រតិកម្មចំពោះដំណឹងនេះទេ។
សូមបញ្ជាក់ថា លោក ហ៊ុន ម៉ាណែត ត្រូវបានអញ្ជើញចូលរួមក្នុងកម្មវិធីពិធីបុណ្យចូលឆ្នាំទីក្រុងឡងប៊ីច (Long Beach) ប៉ុន្តែប្រជាពលរដ្ឋមួយចំនួននៅទីនោះ បានប្រកាសធ្វើបាតុកម្មនឹងមិនចង់ឃើញវត្តមានរបស់លោកដែលជាកូនប្រុសលោកនាយករដ្ឋមន្ត្រីកម្ពុជា ដែលអ្នកអាមេរិកមួយចំនួនយល់ថាជាមនុស្សផ្តាច់ការ។
គណបក្សសង្គ្រោះជាតិ បានអះអាងថា បាតុកម្មប្រឆាំងនឹងលោកហ៊ុន ម៉ាណែត នៅអាមេរិក គឺជាសិទ្ធរបស់ប្រជាពលរដ្ឋដែលគ្មានអ្វីពាក់ព័ន្ធនឹងគណបក្សប្រឆាំងនោះទេ។ បើទោះបីជា មានបាតុកម្មប្រឆាំងលោក ដែលនាំឱ្យមានបណ្តឹងពីមេធាវីអាមេរិក មកលើរូបលោក ក៏លោកបានបញ្ជាក់ថា ការធ្វើពិធីបុណ្យចូលឆ្នាំនៅអាមេរិក គឺជាការរួមគ្នាតែមួយក្នុងនាមជាជនជាតិខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ