រដ្ឋាភិបាលសន្យាថានឹងបើកឲ្យមានការសុំកូនចិញ្ចឹមឡើងវិញ នៅឆ្នាំ២០១៤
មន្ត្រីជាន់ខ្ពស់ បានប្រកាសសន្យាជាថ្មី នៅថ្ងៃពុធនេះថា រដ្ឋាភិបាល នឹងបើកឲ្យមានការសុំកូនកំព្រាកម្ពុជា យកទៅចិញ្ចឹមឡើងវិញ នៅក្នុងឆ្នាំ២០១៤។ ការហាមឃាត់ការសុំកូនចិញ្ចឹម ត្រូវបានធ្វើឡើង ចាប់តាំងពីមានការអនុម័តច្បាប់ ស្តីពីការសុំកូនចិញ្ចឹមឆ្លងប្រទេស របស់កម្ពុជា កាលពីខែធ្នូ ឆ្នាំ២០០៩។ ការពន្យារពេល មិនឲ្យស្មុំកូនចិញ្ចឹម រយៈពេល ៤ ឆ្នាំមកនេះ ត្រូវបានគេផ្តល់ហេតុផលថា ដើម្បីផ្តល់ពេលវេលាឲ្យអាជ្ញាធរ រៀបចំក្របខណ្ឌ លិខិតបទដ្ឋានគតិយុត្តិ ដែលចាំបាច់នានា បង្កើតនូវយន្តការដែលចាំបាច់ និងបណ្តុះបណ្តាលអ្នកពាក់ព័ន្ធនានា ដើម្បីឲ្យច្បាប់ស្មុំកូន អាចអនុវត្តទៅបាន និងការពារដល់កុមារកំព្រាកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ក្រោយពេលមានការអនុម័ត បង្កើតច្បាប់ស្តីពីការស្មុំកូនឆ្លងប្រទេស នៅក្នុងខែធ្នូ ឆ្នាំ២០០៩ គឺចាប់តាំងពីពេលនោះមក ការសុំកូនចិញ្ចឹមកម្ពុជា ត្រូវបានផ្អាក។ រហូតដល់ខែធ្នូនេះ មានពេល ៤ ឆ្នាំហើយ។ គឺជាការចាំបាច់ ត្រូវតែមានកិច្ចការពារសំខាន់ៗ ដើម្បីធានាឲ្យមានការគ្រប់គ្រងករណីមានការសុំកូនឲ្យបានត្រឹមត្រូវ មុននឹងមានការបើកឲ្យមានការសុំកូនចិញ្ចឹមសាជាថ្មី។
នៅក្រៅកិច្ចពិគ្រោះយោបល់ថ្នាក់ជាតិ ស្តីពី ការសុំកូន នៅក្នុងប្រទេសកម្ពុជា នាព្រឹកថ្ងៃទី៤ធ្នូ លោក នឹម ថូត រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានប្រាប់ក្រុមអ្នកកាសែតថា ការពន្យារពេល មិនឲ្យមានការសុំកូនចិញ្ចឹមពីកម្ពុជា នឹងបន្តរហូតដល់ឆ្នាំ២០១៤។ មូលហេតុនៃការផ្អាកការសុំកូន ចាប់តាំងពីច្បាប់ស្តីពីការសុំកូនចិញ្ចឹម ត្រូវបានអនុម័ត កាលពីខែធ្នូ ឆ្នាំ២០០៩ មកដល់ពេលនេះ ដើម្បីទុកពេលឲ្យមានការរៀបចំក្របខណ្ឌ លិខិតបទដ្ឋានគតិយុត្តិ យន្តការដែលចាំបាច់ និងបណ្តុះបណ្តាលអ្នកពាក់ព័ន្ធនានា ក្នុងបំណងការពារកុមារកំព្រាកម្ពុជា ពីការជួញដូរ ជាដើម។
រដ្ឋាភិបាលកម្ពុជា គ្រោងនឹងបើកឲ្យមានការសុំកូនឡើងវិញ ម្តងជាពីរដង កាលពីខែមេសា ឆ្នាំ២០១១ និងម្តងទៀត នៅខែមករា ដើមឆ្នាំ២០១៣នេះ។ ប៉ុន្តែត្រូវពន្យារពេលរហូតដោយហេតុថា ការរៀបចំរបស់កម្ពុជា មិនទាន់បានល្អប្រសើរ។
សូមរម្លឹកថា កាលពីឆ្នាំ២០០៩ រដ្ឋាភិបាលកម្ពុជា បានសម្រេចផ្អាក មិនឲ្យមានការសុំកូនពីប្រទេសកម្ពុជា ដោយសារតែការសុំកូននោះ មិនមែនធ្វើឡើងជាលក្ខណៈមនុស្សធម៌ទេ តែបែរទៅជាក្លាយជាអំពើជួញដូរកុមារកម្ពុជាទៅវិញ។
ក្នុងពេលកន្លងមក មានប្រទេសធំៗមួយចំនួន ដូចជា អូស្ត្រាលី កាណាដា និងប្រទេសអង់គ្លេស ជាដើម បានដាក់បម្រាម មិនឲ្យមានការសុំកូនពីប្រទេសកម្ពុជាទេ ពីព្រោះមានការបែកធ្លាយនៃការជួញដូរកុមារកម្ពុជា តាមរយៈការសុំកូន។ ប្រទេសទាំងនោះ បានរកឃើញថា កុមារកំព្រានៅកម្ពុជា ដែលគេសុំយកទៅចិញ្ចឹម សុទ្ធតែមានម្តាយ ឬឪពុក នៅរស់ ហើយត្រូវបានគេលក់កូននោះ ក្នុងតម្លៃចាប់ពី ២០០ ទៅ ៥០០ ដុល្លារអាមេរិក។
ប៉ុន្តែនៅព្រឹកថ្ងៃទី៤ធ្នូនេះ រដ្ឋលេខាធិការក្រសួងសង្គមកិច្ច លោក នឹម ថូត បដិសេធថា មិនមានការទិញដូរកុមារកម្ពុជាទេ ផ្ទុយទៅវិញកុមារកំព្រា ដែលមានចំនួនជិត ៤០០០ នាក់ ដែលជនបរទេសបានសុំពីកម្ពុជា ចាប់តាំងពីឆ្នាំ១៩៨៧ ដល់ឆ្នាំ២០០៩ គឺមានវាសនាល្អ មិនមានការរំលោភបំពាន ដូចការលើកឡើងទេ។ កុមារកម្ពុជា ត្រូវបានគេសុំយកទៅចិញ្ចឹមច្រើនជាងគេនៅអ៊ីតាលី បារាំង អាមេរិក និងអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ