GMAC ទាត់ចោលការចោទប្រកាន់របស់សហភាពសហជីពកម្ពុជា
នៅក្នុងសេចក្ដីថ្លែងការណ៍ចុះថ្ងៃចន្ទ ទី៣វិច្ឆិកា សមាគមរោងចក្រកាត់ដេរកម្ពុជា ហៅកាត់ថា GMAC បានទាត់ចោលសេចក្ដីថ្លែងការណ៍ ចុះថ្ងៃទី២៨តុលា របស់ប្រធានសហភាពសហជីពកម្ពុជា ថាជាការមិនពិត។ សេចក្ដីថ្លែងការណ៍ចុះថ្ងៃទី២៨តុលា ដែលបានលើកឡើងថាថា GMAC បានផ្តល់សាច់ប្រាក់ចំនួន១ពាន់លានដុល្លា ដល់ស្ថាប័នរដ្ឋផ្សេងៗ ដើម្បីបង្អាក់ការទាមទារដំឡើងប្រាក់ឈ្មួលអប្បបរមា ដល់កម្មករ ១៧៧ដុល្លារ។ ប៉ុន្តែលោករ៉ុង ឈុន ប្រធានសហភាពសហជីពកម្ពុជា បានបដិសេធថា សហជីពលោក មិនបានចោទប្រកាន់ GMAC នោះទេ។
ចុះផ្សាយនៅថ្ងៃ៖
ស្តាប់ - ០២:២០
សមាគមរោងចក្រកាត់ដេរនៅកម្ពុជា ហៅកាត់ថា GMAC បានចេញសេចក្តីថ្លែងការណ៍មួយ នៅថ្ងៃចន្ទ ទី០៣វិច្ឆិកា ស្នើឲ្យលោក រ៉ុង ឈុន ប្រធានសហភាពសហជីពកម្ពុជា ដកចេញនូវសេចក្តីថ្លែងការណ៍របស់ខ្លួន ដែលចេញ នៅថ្ងៃទី ២៨តុលា ឆ្នាំ ២០១៤។
នៅក្នុងសេចក្តីថ្លែងការណ៍នោះ លោករ៉ុង ឈុន បានលើកឡើងថា GMAC បានផ្តល់សាច់ប្រាក់ចំនួន១ពាន់លានដុល្លា ដល់ស្ថាប័នរដ្ឋផ្សេងៗ ដើម្បីបង្អាក់ការទាមទារដំឡើងប្រាក់ឈ្មួលអប្បបរមា ដល់កម្មករ ១៧៧ដុល្លារ។ តាម GMAC សេចក្តីថ្លែងការណ៍របស់លោករ៉ុង ឈុន គឺជារឿងមិនត្រឹមត្រូវ និងមានចេតនាបង្ខូចកេរ្តិ៍ឈ្មោះ GMAC។ ខណៈការពិភាក្សាយ៉ាងហ្មត់ចត់អំពីប្រាក់ឈ្នួលអប្បបរមាកំពុងប្រព្រឹត្តទៅ GMAC បានសម្ដែងការខកចិត្តចំពោះសេចក្ដីថ្លែងការណ៍របស់លោករ៉ុង ឈុន ដែលជារឿងដែលហួសពីភាពដែលអាចជឿបាន។ និងថា កិច្ចពិភាក្សាពាក់ព័ន្ធនឹងបញ្ហាប្រាក់ឈ្នួលអប្បបរមា គឺជាបញ្ហាធ្ងន់ធ្ងរ ដែលអាចជះឥទ្ធិពលដល់អនាគតនៃវិស័យកាត់ដេរទាំងមូល ព្រមទាំងអនាគតរបស់ប្រទេសជាតិទៀតផង។
ឆ្លើយតបនឹងប្រតិកម្មរបស់សមាគមរោងចក្រកាត់ដេរកម្ពុជា លោក រ៉ុង ឈុន ប្រធានសហភាពសហជីពកម្ពុជា បានប្រាប់វិទ្យុបារាំងអន្តរជាតិថា លោកមិនបានចោទប្រកាន់ចំពោះ GMAC នោះទេ។ លោកគ្រាន់តែស្រង់សម្តី ពីខ្លឹមសាររួម អំពីរបាយការណ៍ហិរញ្ញវត្ថុរបស់ GMAC ដែលបានចុះផ្សាយក្នុងទំព័រព័ត៌មានកាសែតខ្មែរមួយ កាលពីពេលកន្លងទៅតែប៉ុណ្ណោះ។ លោក រ៉ុង ឈុន បានបញ្ជាក់ថា លោកបានចេញលិខិតចំហរមួយ ពីខ្លឹមសារនៃរបាយការណ៍នោះ ហើយនិងបានផ្ញើលិខិតមួយ ដោយមានចុះហត្ថលេខាពីសហជីពចំនួន ៨ទៀត ទៅកាន់រដ្ឋសភា និងអនុប្រធានទី១រដ្ឋសភា ដើម្បីបើកការស៊ើបអង្គេតជុំវិញរឿងនេះ ប្រយោជន៍ដើម្បីឲ្យកម្មករអាចទទួលបានប្រាក់ខែគោលសមស្រប។
គួរជម្រាបជូនថា កាសែតកម្ពុជាចុងសប្ដាហ៍ ច្បាប់លេខ២០ ចុះផ្សាយប្រចាំថ្ងៃសៅរ៍-អាទិត្យ ទី២៥-២៦តុលា បានលើកឡើងថា សមាគមរោងច្រកកាត់ដេរសម្លៀកបំពាក់កម្ពុជា GMAC កំពុងផ្ដល់មូលនិធិដល់មន្ដ្រីរាជការជាន់ខ្ពស់ និងបានផ្ដល់ជំនួយរាប់ពាន់ដុល្លារដល់ក្រសួងនានា។ ហើយទំនាក់ទំនងជិតស្និទ្ធរវាង GMAC និងស្ថាប័នរដ្ឋនេះ គឺជាដើមចមនៃការដំឡើងប្រាក់ឈ្នួលកម្មករកាត់ដេរ មានការលំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ