អាជ្ញាធរខេត្តមួយចំនួនបានរៀបចំទីតាំងចាក់វ៉ាក់សាំងបន្ថែមរួចរាល់
អាជ្ញាធរខេត្តនីមួយៗបានត្រៀមលក្ខណៈរួចជាស្រេចបន្ថែមនូវទីតាំងចាក់វ៉ាក់សាំងបង្ការកូវីដ១៩ ក្នុងឱកាសឈប់សម្រាក៤ថ្ងៃនៃពិធីបុណ្យចូលឆ្នាំខ្មែរចាប់ពីថ្ងៃទី១៣-១៧មេសា។ យន្តការរយៈពេលខ្លីនេះ ធ្វើឡើងតបតាមការជូនដំណឹងរបស់ក្រសួងសុខាភិបាលឲ្យអាជ្ញាធរខេត្ត-ក្រុងទាំង២៥ ត្រូវត្រៀមលក្ខណៈបន្ថែមទីតាំងចាក់វ៉ាក់សាំងឲ្យនៅកៀកជិតពលរដ្ឋ ជាពិសេសអ្នកធ្វើដំណើរកំសាន្ត កម្មករ កម្មការិនី ងាយទទួលបានការចាក់វ៉ាក់សាំងទាំងដូសមូលដ្ឋាន និងដូសជម្រុញ ដើម្បីបង្កើនភាពស៊ាំនៅក្នុងសហគមន៍ឱ្យកាន់តែខ្លាំង។
ចុះផ្សាយនៅថ្ងៃ៖
យ៉ាងហោចណាស់មានទីតាំងវ៉ាក់សាំងថ្មីចំនួន១៦កន្លែងត្រូវបានរៀបចំរួចរាល់សម្រាប់ភូមិសាស្ត្ររាជធានីភ្នំពេញ ដែលស្ថិតក្នុងទីអារ៉ាមនៃ ខណ្ឌពោធិ៍សែនជ័យ កំបូល ព្រែកព្នៅ បឹងកេងកង ៧មករា សែនសុខ ដូនពេញជាដើម។ រីឯខេត្តតាកែវវិញ ទីអារ៉ាមមិនក្រោម១០០កន្លែងឡើយបំរើឲ្យដំណើរចាក់វ៉ាក់សាំងបង្ការកូវីដ១៩ទាំងដូសមូលដ្ឋាន និងដូសជម្រុញ ខណៈខេត្តសៀមរាបទីរ៉ាមជិត២០កន្លែងក្នុងស្រុកចំនួន១២ត្រូវបានរៀបចំរួចរាល់សម្រាប់ដំណើរការចាក់វ៉ាក់ក្នុងពេលដ៏ខ្លីខាងមុខ។ ក្រៅពីខេត្តទាំងបី ខេត្តដទៃទៀតក៏បានត្រៀមខ្លួនរាល់ក្នុងការបន្ថែមទីតាំងចាក់វ៉ាក់សាំងរួចហើយដែរ គិតមកដល់ថ្ងៃទី៩មេសានេះ ដូចជាៈ ខេត្តកែប កោះកុង ឧត្តរមានជ័យ បន្ទាយមានជ័យជាដើម។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលលើកឡើងថា ប្រជាពលរដ្ឋអាចអញ្ជើញទៅចាក់វ៉ាក់សាំងបង្ការកូវីដ១៩ នៅតាមកន្លែងទេសចរណ៍ និងនៅតាមទីវត្តអារាមនានា ចាប់ពីថ្ងៃទី១៣ ដល់ ថ្ងៃទី១៧ ខែមេសា ឆ្នាំ២០២២ ខាងមុខនេះដើម្បីជំរុញដល់ការងារចាក់វ៉ាក់សាំងបង្ការជំងឺកូវីដ១៩ និងដើម្បីបង្កើនភាពស៊ាំនៅក្នុងសហគមន៍ឱ្យកាន់តែខ្លាំង។
ថ្លែងប្រាប់វិទ្យុបារាំងអន្តរជាតិRFI នៅថ្ងៃសៅរ៍ទី៩មេសានេះ លោក នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិតសភាកម្ពុជាមើលឃើញថា ការបង្កើនទីតាំងចាក់វ៉ាក់សាំងដែលជ្រើសយកទីធ្លាវត្តអារ៉ាមឈរជើង ជារឿងល្អពោលងាយស្រួលដល់ពលរដ្ឋមិនចាំបាច់ធ្វើដំណើរទៅទីតាំងឆ្ងាយដែលធ្លាប់កំណត់កន្លងដោយអាជ្ញាធរភូមិឃុំនាពេលកន្លងមក។ ការធ្វើបែបនេះក៏បង្កលក្ខណៈងាយស្រួលដល់អ្នកភ្នំពេញទៅលេងស្រុកដែលគ្នាគ្មានពេលចាក់វ៉ាក់សាំងដូសជម្រុញ ដោយប្រើប្រាស់ឱកាសឈប់សម្រាកចាក់វ៉ាក់សាំងតែម្ដង។
តែយ៉ាងមិញអ្នកជំនាញរូបនេះបានព្រមានទុកជាមុនថា ផលរំខានខ្លះៗរបស់វ៉ាក់សាំងអាចធ្វើឲ្យពលរដ្ឋរារែកចិត្តទទួលចាក់វ៉ាក់អំឡុងពេលសប្បាយនឹងបុណ្យទានផងក៏ថាបាន ហើយភាពក្រែងរអាលឬមិនទុកចិត្តលើគុណភាពវ៉ាក់សាំងក៏នៅតែជាឧបសគ្គមួយដែលពលរដ្ឋមិនប្រើប្រាស់ឱកាសឈប់សម្រាកទៅចាក់វ៉ាក់សាំងដែរ។ តែបើតាមលោក នុត សម្បត្តិ អាជ្ញាធរគួរតែបង្កើនការផ្សព្វផ្សាយឲ្យបានទ្វេដងពីប្រយោជន៍របស់វ៉ាក់សាំងនិងធ្វើការអំពាវនាវតាមគ្នាឲ្យពលរដ្ឋមកស្វែងរកសេវាចាក់វ៉ាក់សាំង ក្នុងវត្តអារ៉ាមដែលមានទីតាំងនៅក្បែរផ្ទះស្រាប់។
សូមជម្រាបជូនថា អត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី០៨ ខែមេសាមានចំនួន ៩២,៧៧%នៃចំនួនប្រជាជនសរុប១៦លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ