កូវីដ១៩ កំពុងតែឈានទៅសម្លាប់មនុស្សក្នុងឆ្នាំ២០២១ ច្រើនជាងឆ្នាំ២០២០
កូវីដ១៩ មិនទាន់ទៅណាឆ្ងាយទេ ថ្វីបើប្រទេសអ្នកមានបានចាក់វ៉ាក់សាំងទៅឲ្យប្រជាជន បានកាន់តែច្រើនក្តី។ លោកអគ្គលេខាធិការអង្គការសុខភាពពិភពលោក បានលើកឡើងថា បើមើលតាមរបត់បច្ចុប្បន្ននេះ គឺក្នុងឆ្នាំ២០២១ កូវីដ១៩ កំពុងតែឈានទៅសម្លាប់មនុស្ស ច្រើនជាងនៅក្នុងឆ្នាំ២០២០ទៅទៀត។ លោកបានអំពាវនាវ ឲ្យគ្រប់គ្នាបន្តប្រុងប្រយ័ត្ន និងជាពិសេស គឺត្រូវជួយចែករំលែកវ៉ាក់សាំង ដល់ប្រទេសក្រីក្រ។
ចុះផ្សាយនៅថ្ងៃ៖
ស្តាប់ - ០២:៤៦
ខណៈប្រទេសកាន់តែច្រើន នៅអឺរ៉ុប និងអាេមរិក បានចាប់ផ្តើមបើកចំហរឡើងវិញ ជាបណ្តើៗលោកអគ្គលេខាធិការអង្គការសុខភាពពិភពលោក បានថ្លែងថា ឆ្នាំ២០២១នេះ ចំនួនមនុស្សស្លាប់ដោយកូវីដ១៩ អាចនឹងមានច្រើនជាងក្នុងឆ្នាំ២០២០។ បើគិត ពីចាប់ផ្តើម មានកូវីដ១៩ គឺមនុស្សយ៉ាងហោច ៣លាន៣សែននាក់ហើយ ដែលបានស្លាប់។ អ្វីដែលអ្នកជំនាញ កំពុងតែព្រួយបារម្ភបំផុតនោះ គឺ ការលេចរូបរាង្គ នូវទម្រង់មេរោគបំប្លែងខ្លួនថ្មីៗ ដែលទំនងជាមានកម្រិតឆ្លងរាលដាលខ្លាំង និងអាចបង្កជំងឺកាន់តែធ្ងន់ធ្ងរផងដែរ។
នៅក្នុងបរិបទនេះ លោកអគ្គលេខាធិការអង្គការសុខភាពពិភពលោក បានអំពាវនាវថា សូមប្រទេសអ្នកមាន មេត្តាបោះបង់ចោលគំនិតយកវ៉ាក់សាំង ទៅចាក់ឲ្យកុមារ និងក្មេងជំទង់។ សូមប្រទេសអ្នកមាន មេត្តាទុកវ៉ាក់សាំងនេះ ធ្វើជាវិភាគទាន ជួយប្រទេសក្រីក្រវិញ តាមរយៈយន្តការ Covax។
គួរកត់សំគាល់ថា ស្ថានការណ៍នៅប្រទេសឥណ្ឌា កំពុងតែធ្វើឲ្យមានការព្រួយបារម្ភជាខ្លាំង។ ប្រមាណ២សប្តាហ៍មកហើយ ដែលមនុស្សស្លាប់ដោយកូវីដ១៩ ប្រមាណខ្ទង់៤ពាន់នាក់ សឹងជារៀងរាល់ថ្ងៃ។ អ្នកជំងឺកូវីដ១៩ ដេករងចាំសេចក្តីស្លាប់ ដោយមិនអាចទទួលបានការព្យាបាល។ សាកសពមនុស្សច្រើនសន្ធឹក បូជាមិនទាន់ អ្នកខ្លះ បានយកសព ទៅបោះបង់ចោលនៅក្នុងទន្លេគង្គារ។ ជាមួយនឹងប្រជាជនពេញវ័យ ប្រមាណ៦០០លាននាក់ ឥណ្ឌាគ្មានវ៉ាក់សាំងចាក់ឲ្យគ្រប់គ្នាទេ។
ដោយឡែក នៅសហរដ្ឋអាេមរិកវិញ ការចាក់វ៉ាក់សាំង បានប្រព្រឹត្តិធ្វើទៅយ៉ាងលឿនរហ័ស ដោយគិតមកត្រឹមពេលនេះ ៣៥%នៃប្រជាជនអាេមរិក បានទទួលវ៉ាក់សាំង បាន២ដូសគ្រប់គ្រាន់អស់ហើយ។ នេះ គឺមកពីគោលនយោបាយបិទទ្វារជិត ដោយរដ្ឋាភិបាលអាេមរិក ហាមដាច់ខាត មិនឲ្យនាំចេញវ៉ាក់សាំង ដែលផលិតលើដីអាេមរិក ទៅលក់ឲ្យប្រទេសផ្សេងទេ។ កាលពីថ្ងៃសុក្រទី១៤ឧសភា លោកចូ បៃដិន បានអះអាងថា អ្នកដែលចាក់វ៉ាក់សាំងហើយ មិនបាច់ពាក់ម៉ាសទៀតទេ។ តែការលើកឡើងនេះ បានធ្វើមានការយល់ច្រលំ និងដេញដោល ចោទសួរជាខ្លាំង។ តើធ្វើម្តេច ដឹងថាមនុស្សណា បានទទួលវ៉ាក់សាំងគ្រប់ មនុស្សណាមិនទាន់បានទទួល? ប្រជាជនអាមេរិកខ្លះ បានលើកឡើងថា ការដកវិធានការពាក់ម៉ាសនេះ មិនគួរធ្វើដោយតក់ក្រហល់ពេលទេ។
ចំណែកនៅអឺរ៉ុប ប្រទេសភាគច្រើន បានចាប់ផ្តើមដកចេញវិធានការរិតបន្តឹង ក្នុងកម្មវត្ថុស្រោចស្រង់សេដ្ឋកិច្ច ខណៈដែល រដូវកាលវិស្សមកាលទេសចរណ៍ កាន់តែខិតជិតមកដល់។ ទោះយ៉ាងនេះក្តី អ្នកជំនាញខ្លះបញ្ជាក់ថា ការឆ្លងរាលដាលកូវីដ១៩ នៅតែមិនទាន់ចុះថយគ្រប់គ្រាន់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ