គម្រោងការថ្មីដើម្បីដាក់ទណ្ឌកម្មទៅលើប្រទេសអៀរ៉ង់
ក្រុមប្រឹក្សាសន្តិសុខនៃអង្គការ សហប្រជាជាតិបានពិនិត្យមើលនៅថ្ងៃអង្គារម្សិលមិញទៅលើគម្រោងការថ្មី ដើម្បីដាក់ទណ្ឌកម្មទៅលើប្រទេសអៀរ៉ង់។ គម្រោងថ្មីនេះគឺជាលទ្ធផលនៃការព្រមព្រៀងរវាងក្រុមប្រទេសមហាអំណាច ទោះបីជាមានកិច្ចព្រមព្រៀងរវាងប្រេស៊ីល ទួរគី និងអៀរ៉ង់ដែលសម្រេចបានកាលពីថ្ងៃចន្ទដើម្បីបញ្ចៀសអៀរ៉ង់ឲ្យគេច ផុតពីការទទួលរងទណ្ឌកម្មក៏ដោយ។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
លោកស្រីប្រមុខការទូតអាមេរិកHillary Clinton បានប្រកាសឲ្យដឹងនៅព្រឹកថ្ងៃពុធនេះថា ប្រទេសរុស្ស៊ីនិងប្រទេសចិនយល់ព្រមគាំទ្រគម្រោងការថ្មីដើម្បីដាក់ទណ្ឌកម្មទៅលើប្រទេសអៀរ៉ង់។
អត្ថបទថ្មីនេះគឺជាចម្លើយយ៉ាងប្រសើរឆ្លើយតបទៅនឹងទង្វើរបស់ទីក្រុងតេហេរ៉ង់នារយៈប៉ុន្មានថ្ងៃចុងក្រោយនេះ។ ពោលគឺឆ្លើយតបទៅនឹងកិច្ចព្រមព្រៀងដែលសម្រេចបានកាលពីថ្ងៃចន្ទកន្លងទៅរវាងប្រទេសអៀរ៉ង់ ទួរគី និងប្រេស៊ីលដែលមានបំណងកាត់បន្ថយភាពតានតឹងនៅក្នុងបញ្ហានុយក្លេអ៊ែរអៀរ៉ង់តែប៉ុណ្ណោះ។
គម្រោងនៃសេចក្តីសម្រេចចិត្តដែលរៀបចំដោយអាមេរិកនឹងត្រូវបញ្ជូនទៅក្រុមប្រឹក្សាសន្តិសុខនៃអ ស ប នៅថ្ងៃរសៀលនេះ។ អត្ថបទថ្មីនេះគ្រោងហាមឃាត់ពុំឲ្យប្រទេសអៀរ៉ង់អាចបោះទុនធ្វើវិនិយោគនៅបរទេសនៅក្នុងវិស័យសំខាន់ៗដូចជាអណ្តូងរ៉ែUranium ហើយនាវារបស់ប្រទេសអៀរ៉ង់អាចនឹងត្រូវគេឆែកឆេរត្រួតពិនិត្យនៅតាមសមុទ្រ។ គម្រោងនៃសេចក្តីសម្រេចចិត្តថ្មីក៏គ្រោងផងទៀត ហាមឃាត់ពុំលក់សព្វាវុធធ្ងន់ៗឲ្យប្រទេសអៀរ៉ង់ មានដូចជារថក្រោះជាដើម។
គួរកត់សម្គាល់ថា ប្រទេសមហាអំណាចដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខនៃអ ស ប បីប្រទេស ដែលក្នុងនោះមានប្រទេសចិន រុស្ស៊ី និងប្រទេសបារាំងបានវិនិច្ឆ័យថា គម្រោងការថ្មីដើម្បីដាក់ទណ្ឌកម្មទៅលើប្រទេសអៀរ៉ង់គឺជាគម្រោងការមានលក្ខណៈ”វិជ្ជមាន”។ ចំណែកឯលោកអគ្គលេខាធិការនៃអ ស ប បាន គីមូន ក៏បានគូសបញ្ជាក់ផងដែរថា គម្រោងការថ្មីដើម្បីដាក់ទណ្ឌកម្មទៅលើប្រទេសអៀរ៉ង់ពុំមានលក្ខណៈអ្វីធ្វើឲ្យប៉ះពាល់ដល់ការបន្តធ្វើកិច្ចចរចាជាមួយទីក្រុងតេហេរ៉ង់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ