អ្នកជំនាញថាត្រូវមានវិធានច្បាប់តឹងតែង ចំពោះការប្រើបច្ចេកវិទ្យាបញ្ញាសិប្បនិម្មិត
បច្ចេកវិទ្យាបញ្ញាសិប្បនិម្មិត កំពុងតែធ្វើឲ្យកាន់តែរីកធំ នូវបញ្ហាវិសមភាព នៅទូទាំងពិភពលោក។ នេះគឺជាការសន្និដ្ឋានរួម របស់អ្នកស្រាវជ្រាវ នៅ AI Now Institute នៅសកលវិទ្យាល័យញូយ៉ក។ អ្នកជំនាញបានសម្តែងការព្រួយបារម្ភ និងបានអំពាវនាវ ឲ្យមានវិធានការប្រុងប្រយ័ត្នម៉ដ្ឋចត់ មុននឹងដាក់ឲ្យប្រើនូវបច្ចេកវិទ្យាទំនើបនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បច្ចេកវិទ្យាបញ្ញាសិប្បនិម្មិត បានរីកសាយភាព និងត្រូវបានគេប្រើប្រាស់សឹងតែគ្រប់កាលៈទេសៈ គ្រប់វិស័យ ទាំងក្នុងវិស័យការងារ ឬជីវិតឯកជនប្រចាំថ្ងៃ របស់មនុស្សសម័យទំនើប។ ក៏ប៉ុន្តែការប្រើប្រាស់បច្ចេកវិទ្យានេះជ្រុលហួសពេក អាចបង្កើតឲ្យមានផលវិបាកមួយចំនួន មកលើសង្គមមនុស្ស។ នេះបើផ្អែកតាមការសន្និដ្ឋាន របស់ក្រុមអ្នកស្រាវជ្រាវ នៃ AI Now Institute នៅសកលវិទ្យាល័យញូយ៉ក។
រាប់ចាប់ពីទូរស័ព្ទដៃទៅ បច្ចេកវិទ្យាសិប្បនិម្មិត ក៏ត្រូវគេប្រើផងដែរ នៅក្នុងម៉ាស៊ីនកុំព្យូទ័រ ប្រើប្រាស់ក្នុងវិស័យសុខាភិបាល វិស័យអប់រំ វិស័យយុត្តិធម៌ និងវិស័យការងារជាដើម ទាំងដោយគ្មានការកំណត់បទដ្ឋានវិធានណាមួយ ដើម្បីទប់ស្កាត់ផលជ្រុលជ្រួស ឬផលវិបាក។ អ្នកជំនាញ បានបង្ហាញការព្រួយបារម្ភ អំពីការរីកធំនូវបញ្ហាវិសមភាព ជាពិសេស នៅក្នុងវិស័យគ្រប់គ្រងធនធានមនុស្ស នៅតាមក្រុមហ៊ុននានា និងក្នុងស្ថាប័នគ្រប់គ្រងអន្តោប្រវេសន៍ ឬសេវាសង្គមជាដើម។
អ្នកជំនាញ បានលើកឡើងថា ការដាក់ឲ្យប្រើនូវ បច្ចេកវិទ្យាចាប់ស្គាល់មុខ និងបច្ចេកវិទ្យាចាប់ស្គាល់ អារម្មណ៍មនុស្ស ត្រូវបានធ្វើដោយឆាប់រហ័សជ្រុលពេក ដោយគ្មានការត្រួតពិនិត្យម៉ដ្ឋចត់។ ក្នុងវិស័យខ្លះ ឧទាហរណ៍ដូចជាក្នុងពេលសម្ភាសន៍រើសបុគ្គលិក ឬការពិគ្រោះជំងឺជាដើម គែមិនអាចពឹងផ្អែកតែទៅលើម៉ាស៊ីនបច្ចេកវិទ្យាប្រើបញ្ញាសិប្បនិម្មិតបានទេ។ ការសម្រេចខ្លះ គឺត្រូវមនុស្សជាអ្នកធ្វើ ដោយផ្អែកលើកត្តាជាក់ស្តែងជាច្រើនបញ្ចូលគ្នា។
ជាមួយនឹងទិន្នន័យដែលប្រមូលបានដោយបច្ចេកវិទ្យា Algorithme បញ្ញាសិប្បនិម្មិតនឹងបង្កើតឲ្យមានបុរេវិនិច្ឆ័យទៅលើមនុស្ស ហើយធ្វើឲ្យមានការរើសអើសប្រកាន់ពូជសាសន៍ ការខ្វះនូវភាពពហុវប្បធម៌ និងភាពចម្រុះ។ អ្នកជំនាញនៃសកលវិទ្យាល័យញ៉ូយ៉ក បានអំពាវនាវ ថាត្រូវតែមានការបញ្ជ្រាបផ្សព្វផ្សាយ ជាពិសេសទៅដល់ អ្នកជំនាញផលិតបច្ចេកវិទ្យាបញ្ញាសិប្បនិម្មិតទាំងនោះ ឲ្យពួកគេបានស្វែងយល់នឹងដឹង អំពីផលវិបាកផ្សេងទៅលើសង្គម មុននឹងផលិតចេញនូវបច្ចេកវិទ្យាណាមួយ។ អ្វីៗ គឺវាអាស្រ័យថា តើប្រព័ន្ធ Algorithme នីមួយៗ ត្រូវបានស្ថាបនាឡើយដោយរបៀបណា និងដើម្បីបំរើប្រយោជន៍ឲ្យក្រុមហ៊ុនណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ