ស៊ីរី៖ បារាំងនឹងកោះប្រជុំបន្ទាន់ក្រុមប្រឹក្សាសន្តិសុខអ.ស.ប.
លោកឡូរ៉ង់ ហ្វាប៊្យូស (Laurent Fabius) រដ្ឋមន្រ្តីក្រសួងការបរទេសបារាំង បានប្រកាស នៅថ្ងៃចន្ទនេះ ថា បារាំងនឹងកោះប្រជុំបន្ទាន់ក្រុមប្រឹក្សាសន្តិសុខ ដើម្បីជជែកពីវិបត្តិនៅស៊ីរី។ ការកោះប្រជុំនេះធ្វើឡើង នៅក្នុងពេលដែលការវាយប្រយុទ្ធគ្នារវាងកងកម្លាំងរដ្ឋាភិបាល និងកម្លាំងឧទ្ទាមស៊ីរី នៅទីក្រុង Alep បានឈានចូលដល់ថ្ងៃទី៣ ហើយទីភ្នាក់ងារអ.ស.ប.បានរាយការណ៍ថា ជនស៊ីវិលស៊ីរីប្រមាណ ២០ម៉ឺននាក់ បានបង្ខំចិត្តរត់ភៀសចោលផ្ទះសម្បែង ដើម្បីគេចចេញពីការវាយប្រយុទ្ធគ្នានេះ។
ចុះផ្សាយនៅថ្ងៃ៖
ស្តាប់ - ០១:៣៨
លោកហ្វាប៊្យូសបានថ្លែងប្រាប់វិទ្យុបារាំងមួយ នៅព្រឹកថ្ងៃចន្ទនេះថា ក្នុងឋានៈជាប្រធានក្រុមប្រឹក្សាសន្តិសុខអ.ស.ប. ប្រចាំខែសីហានេះ លោកនឹងកោះប្រជុំបន្ទាន់ក្រុមប្រឹក្សា ដើម្បីពិភាក្សាអំពីវិបត្តិស៊ីរី។ ការកោះប្រជុំនេះនឹងត្រូវធ្វើនៅមុនចុងសប្តាហ៍នេះ ហើយទំនងជានឹងប្រជុំថ្នាក់រដ្ឋមន្រ្តីការបរទេស ដោយមានរូបលោកផ្ទាល់ធ្វើជាប្រធានអង្គប្រជុំ។
រដ្ឋមន្រ្តីការបរទេសបារាំងបានបញ្ជាក់បន្ថែមថា បើទោះជារុស្ស៊ី និងចិន ធ្លាប់បានប្រើសិទ្ធិវ៉េតូ ចំនួន ៣លើករួចមកហើយក៏ដោយ ក្រុមប្រឹក្សាសន្តិសុខត្រូវតែបន្តប្រជុំពិភាក្សាគ្នា ស្វះស្វែងរកគ្រប់វិធីទាំងអស់ ដើម្បីបញ្ចប់វិបត្តិស៊ីរី ពីព្រោះថា បញ្ហានេះមិនមែនជាបញ្ហាផ្ទៃក្នុងស៊ីរីតែម្នាក់ឯងទេ គឺវាអាចបង្កផលវិបាកទៅដល់ប្រទេសជិតខាងនៅក្នុងតំបន់។
លោកស្រី Valerie Amos អគ្គលេខាធិការរងអ.ស.ប.ទទួលបន្ទុកកិច្ចការមនុស្សធម៌បានប្រកាសថា គ្រាន់តែក្នុងរយៈពេល ២ថ្ងៃកន្លងទៅនេះ មានជនស៊ីវិលប្រមាណ ២០ម៉ឺននាក់ បានរត់ភៀសខ្លួនចេញពីទីក្រុង Alep ហើយមិនដឹងជាមានប៉ុន្មាននាក់ទៀត ដែលកំពុងជាប់ក្នុងក្រុង កណ្តាលសមរភូមិ ហើយកំពុងតែត្រូវការទឹកស្អាត ចំណីអាហារ និងថ្នាំសង្កូវជាចាំបាច់។ លោកស្រី Amos ក៏បានសំដែងនូវក្តីបារម្ភយ៉ាងខ្លាំងផងដែរ ចំពោះផលប៉ះពាល់កើតឡើងពីការដែលកងកម្លាំងរបស់លោកអាសាដ ប្រើកាំភ្លើងធំ រថក្រោះ ព្រមទាំងអាវុធធុនធ្ងន់ផ្សេងទៀតបាញ់ផ្លោងទៅលើទីក្រុង Alep ដែលមានប្រជាជនស៊ីវិលរស់នៅប្រមាណជា ២,៥លាននាក់។
កាលពីម្សិលមិញ រដ្ឋមន្រ្តីក្រសួងការពារជាតិអាមេរិក ដែលកំពុងបំពេញទស្សនកិច្ច នៅក្នុងតំបន់មជ្ឈិមបូព៌ា បានលើកឡើងថា លោកបាស្ហា អាល់អាសាដ ដែលប្រើកម្លាំងទ័ព និងអាវុធធុនធ្ងន់ វាយលុកលើទីក្រុង Alep គឺមានន័យថាកំពុងតែវាយដែកគោលលើក្តាមឈូសរបស់ខ្លួនឯង។
ចំណែកលោកហ្វាប៊្យូសវិញ បានហៅលោកអាសាដថាជា “ពេជ្ឈឃាត” ដែលកំពុងតែកាប់សម្លាប់ប្រជាជនខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ