លោក ពូទីនលួងលោក ហូឡង់ ឱ្យបង្រួមហានិភ័យដើម្បីប្រយោជន៍រុស្ស៊ីនិងបារាំង
នាឱកាសបើកជំនួបទ្វេភាគី នៅក្រុងBrisbane ប្រទេសអូស្ត្រាលី ថ្ងៃសៅរ៍ទី ១៥វិច្ឆិកានេះ ប្រធានាធិបតីរុស្ស៊ី លោក វ្លាដេមៀ ពូទីន បានអំពាវនាវឱ្យសមភាគីបារាំង លោក ហ្វ្រង់ស័រហូឡង់ បង្រួមហានិភ័យ និងផលវិបាកនៃបរិបទតានតឹងអន្តរជាតិ ដើម្បីកុំឱ្យប៉ះពាល់ដល់ទំនាក់ទំនងទ្វេភាគីបារាំងរុស្ស៊ី។ ប៉ុន្តែប្រធានបទដ៏រសើប និងដែលគេរង់ចាំបំផុតមិនត្រូវបានលើកយកពិភាក្សាគ្នាទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គ្មានការបង្ហាញមនោសញ្ចេតនា គ្មានទេស្នាមញញឹម ថ្នាក់ដឹកនាំទាំងពីរ បារាំង និងរុស្ស៊ី បានត្រឹមតែចាប់ដៃគ្នា ដើម្បីឱ្យអ្នកកាសែតថតរូប។ ក្នុងចំណោមគម្រោងជំនួបទ្វេភាគី ចំនួន៧ជាមួយសមភាគីអន្តរជាតិ ការជួបប្រាស្រ័យដែលតានតឹងនិងទទួលការតាមដានខ្លាំងគឺជំនួបទ្វេភាគី ពូទីន-ហូឡង់ !
“ត្រូវប្រឹងឱ្យអស់ពីសមត្ថភាព បង្រួមឱ្យតូចហានិភ័យ និងផលវិបាកអវិជ្ជមានបង្កឡើងបរិបទតានតឹងអន្តរជាតិ ដើម្បីទំនាក់ទំនងល្អទ្វេភាគី!” នេះគឺជាប្រសាសន៍របស់លោក វ្លាដេមៀ ពូទីន ទៅកាន់សមភាគី បារាំង នាឱកាសជំនួបទ្វេភាគី នៅប្រទេសអូស្ត្រាលី ក្រៅក្របខ័ណ្ឌជំនួបកំពូលG២០។ ចំណែកលោកហ្វ្រង់ស័រហូឡង់វិញ បានត្រឹមអះអាងថា ទំនាក់ទំនងបារាំងរុស្ស៊ី មិនត្រូវរងគ្រោះ ពីព្យុះភ្លៀងយូរទៀតទេ។
ប៉ុន្តែបញ្ហាដ៏ក្តៅគគុក ទាក់ទងនឹងនាវាផ្ទុកយន្តហោះMistral មិនត្រូវបានលើកយកមកនិយាយនាឱកាសជំនួបបឋម ដែលមានអ្នកកាសែតចូលរួមទេ។ មុននឹងឈានដល់ការពិភាក្សាមួយទល់នឹងមួយ កំបាំងមុខអ្នកកាសែត ប្រមុខដឹកនាំទាំងពីរ បានត្រឹមតែបង្ហាញឆន្ទៈ ដោះស្រាយវិបត្តិរួមគ្នា មិនថាវិបត្តិអ៊ុយក្រែន ឬវិបត្តិនៅទីផ្សេងទៀតនៅលើលោកទេ ព្រោះទាំងបារាំង ទាំងរុស្ស៊ី សុទ្ធតែចំណែកទទួលខុសត្រូវទាំងអស់គ្នា។
ទំនាក់ទំនងបារាំងរុស្ស៊ី ទទួលបានការចាប់អារម្មណ៍ខ្លាំង ដោយហេតុតែប្រទេសពីរនេះមានការដោះដូរផ្នែកបច្ចេកវិទ្យាយោធា រុស្ស៊ីរង់ចាំជានិច្ចការប្រគល់នាវាផ្ទុកយន្តហោះទិញបារាំង។ នាវាដែលរុស្ស៊ីគ្រោងយកទៅបញ្ឈរជើងនៅគ្រីមេ (បើតាមប្រភពរុស្ស៊ី) ប៉ុន្តែបារាំងក្រោមគំនាបសហគមន៍អន្តរជាតិ និងដើម្បីសម្របខ្លួនជាមួយសម្ព័ន្ធមិត្ត ប្រឆាំងនឹងម៉ូស្គូដែលលូកលាន់ក្នុងវិបត្តិអ៊ុយក្រែន បានផ្អាប់ផ្អាកមិនបញ្ជូននាវាMistral ទៅឱ្យរុស្ស៊ីតាមកាលកំណត់។
សូមបញ្ជាក់ថាមុននឹងជំនួបជាមួយនឹងប្រធានាធិបតីបារាំង លោក ពូទីន ក៏បានជួបពិភាក្សាផងដែរ ជាមួយនាយករដ្ឋមន្ត្រីអង់គ្លេស ដើម្បីសាកល្បងបន្ធូរបន្ថយភាពតានតឹងក្នុងសំណុំរឿងអ៊ុយក្រែននេះតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ