ទាហានបារាំងបាញ់ឲ្យរបួសជនដែលប៉ុនប៉ងវាយប្រហារដោយកាប់នឹងកាំបិត
នៅព្រឹកថ្ងៃសុក្រ ទី៣កុម្ភៈនេះ ទាហានបារាំងដែលប្រចាំការរក្សាសន្តិសុខនៅជុំវិញសារៈមន្ទីរ Louvre ក្នុងក្រុងប៉ារីស បានបាញ់ជនម្នាក់ឲ្យរបួសធ្ងន់ ក្រោយពីជននេះបានប៉ុនប៉ងវាយប្រហារទៅលើទាហានដោយចាក់នឹងកាំបិត។ នាយករដ្ឋមន្រ្តីបារាំងបានអះអាងថា ការវាយប្រហារនេះមានទម្រង់ជាការវាយប្រហារភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមការអះអាងរបស់ប៉ូលិស ហេតុការណ៍បានកើតឡើង នៅម៉ោងប្រមាណជាជិត ១០ព្រឹក ម៉ោងនៅប៉ារីស (ត្រូវនឹងម៉ោងជិត ៣ល្ងាច នៅកម្ពុជា)។ ជនម្នាក់ប្រដាប់ដោយកាំបិតបានធ្វើការវាយប្រហារទៅលើទាហានដែលកំពុងដើរល្បាត នៅក្នុងហាងលក់ទំនិញ ក្រោមដីមួយ (Carrousel du Louvre) ស្ថិតនៅជាប់នឹងសារៈមន្ទីរ Louvre ក្នុងក្រុងប៉ារីស។ ការវាយប្រហារនេះបានបណ្តាលឲ្យទាហានម្នាក់ត្រូវរងរបួសស្រាល ចំណែកខ្មាន់កាំបិតត្រូវបានទាហានបាញ់ឲ្យរបួសធ្ងន់។
គួរបញ្ជាក់ថា ចាប់តាំងពីមានការវាយប្រហារភេរវកម្មជាបន្តបន្ទាប់ ទាហានបារាំងត្រូវបានគេដាក់ពង្រាយជាជំនួយដល់កម្លាំងប៉ូលិស ក្នុងការរក្សាសន្តិសុខនៅជុំវិញទីតាំងសំខាន់ៗ រួមមានដូចជា ស្ថានីយ៍រថភ្លើង, សារៈមន្ទីរ មជ្ឈមណ្ឌលពាណិជ្ជកម្ម ព្រមទាំងគោលដៅផ្សេងទៀត ដែលអាចជាចំណុចស៊ីបនៃការវាយប្រហារភេរវកម្ម។
ក្រសួងមហាផ្ទៃបារាំងបានឲ្យដឹងតាម Twitter ថា ភ្លាមៗក្រោយពីកើតហេតុការណ៍នៅព្រឹកថ្ងៃសុក្រនេះ ច្រកចេញចូលទាំងអស់នៃសារៈមន្ទីរ Louvre ត្រូវបានបិទ ហើយអ្នកចូលទស្សនាសារៈមន្ទីរប្រមាណជា ២៥០នាក់ នឹងត្រូវជម្លៀសចេញជាក្រុមតូចៗ ក្រោយពីឆ្លងកាត់ការត្រួតពិនិត្យអត្តសញ្ញាណច្បាស់លាស់។ ច្រកចេញចូលមេត្រូក្រោមដី ដែលនៅក្បែរនោះ ក៏ត្រូវបានបិទផងដែរ។
លោកប៊ែរណា កាសណូវ នាយករដ្ឋមន្រ្តីបារាំង បានអះអាងថា ការវាយប្រហារនេះមានទ្រង់ទ្រាយជាការវាយប្រហារភេរវកម្ម ចំណែកឯ មេប៉ូលិសក្រុងប៉ារីសវិញបានឲ្យដឹងថា ជនសង្ស័យបានធ្វើការវាយប្រហារទៅលើទាហាន ដោយស្រែកថា "អាឡាហ៍អាក់បា” ដែលជាភាសាអារ៉ាប់មានន័ថា “ព្រះធំអស្ចារ្យ” ហើយដែលជាទូទៅតែងតែត្រូវបានក្រុមជីហាតស្រែក នៅពេលធ្វើការវាយប្រហារភេរវកម្ម។ ប៉ូលិសក្រុងប៉ារីសក៏បានឲ្យដឹងផងដែរថា ជនសង្ស័យមានសាកាដូពីរជាប់នឹងខ្លួន ក៏ប៉ុន្តែ ក្រោយការត្រួតពិនិត្យ គេមិនឃើញមានគ្រឿងផ្ទុះណាមួយនោះទេ នៅក្នុងសាកាដូនេះ។
គួររំឭកឡើងវិញថា កាលពីថ្ងៃទី១៣ ខែមិថុនា ឆ្នាំ២០១៦ ការវាយប្រហារដោយកាំបិតបែបនេះធ្លាប់បានកើតមានម្តងរួចមកហើយ នៅតំបន់ជាយក្រុងប៉ារិស ដោយនៅពេលនោះ ជនដៃដល់ ដែលអះអាងថាខ្លួនជាអ្នកគាំទ្រក្រុមជីហាតរដ្ឋអ៊ីស្លាម បានចាក់សម្លាប់ប៉ូលិសម្នាក់ មុននឹងចាប់ជំរិត រួចហើយអារ ក សម្លាប់ស្រ្តីជាភរិយានៅក្នុងផ្ទះ។ ចំណែកការវាយប្រហារដោយកាំបិតមួយទៀត បានកើតឡើង នៅទីក្រុងនីស (ខាងត្បូងប្រទេសបារាំង) កាលពីថ្ងៃទី៣ ខែកុម្ភៈ ឆ្នាំ២០១៥ ដោយបណ្តាលឲ្យទាហាន ៣នាក់ត្រូវរងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ