បារាំង៖មធ្យោបាយធ្វើដំណើរ នៅបន្តកក់ស្ទះនិងរងការរំខានខ្លាំង នៅចុងសប្តាហ៍
ក្រុងប៉ារីស កំពុងតែរងវិបត្តិគ្មានមធ្យោបាយធ្វើដំណើរ ដែលកាន់តែបន្តលំបាកខ្លាំងតទៅទៀត ថ្ងៃអាទិត្យ ទី១៥ធ្នូ។ ខ្សែរថភ្លើងចំនួន១៤ ដែលដឹកជញ្ចូនអ្នកធ្វើដំណើររាប់លាននាក់ ត្រូវបន្តបិទទ្វារឈឹងតែម្តង។ នៅកន្លែងនានាក្នុងក្រុងប៉ារីស ត្រូវកក់ស្ទះខ្លាំងនៅត្រង់កន្លែងខ្លះ ហើយកន្លែងខ្លះទៀត គ្មានឡានក្រុង ឬមធ្យោបាយសាធារណៈជិះឡើយ។ បញ្ហានេះគឺដោយសារតែកំហឹងតវ៉ារបស់សហជីពវិស័យដឹកជញ្ជូន ដែលប្រឆាំងនឹងកំណែទម្រង់ចូលនិវត្តន៍របស់រដ្ឋាភិបាលបារាំង។
ចុះផ្សាយនៅថ្ងៃ៖
ស្តាប់ - ០២:២៧
ជាងដប់ថ្ងៃហើយ ដែលក្រុមអ្នកបើកបរ បុគ្គលិកធ្វើការវិស័យខាងដឹកជញ្ចូន និងក្រុមសហជីពខាងសេវាសាធារណៈនេះ បានធ្វើកូដកម្ម មិនធ្វើការ រៀងរាល់ជាប់ៗគ្នា គ្មានប្រដាក់ថ្ងៃសោះ។
សម្រាប់ថ្ងៃអាទិត្យក៏ដូចថ្ងៃសៅរ៍នេះដែរ TGV រថភ្លើងរត់ផ្លូវឆ្ងាយ បើគិតជាមធ្យម គឺដំណើរការតែមួយប៉ុណ្ណោះ ក្នុងចំណោមរថភ្លើងផ្លូវឆ្ងាយ៤។ ចំណែក រថភ្លើងចេញពីរដ្ឋធានី ទៅកាន់ជាយៗក្រុង គឺដើរតែមួយគត់ ក្នុងចំណោម៥។ Métro រថភ្លើងរត់ក្រោមដី ចំនួន ១៤ ខ្សែ ត្រូវបន្តបិទច្រកទ្វារជិតឈឹង ជាបន្តទៀត។ ទន្ទឹមនេះ Tramway រថភ្លើងនៅលើដីនិងរថយន្តក្រុងសាធារណៈខ្លះៗ ក៏ភាគច្រើន មិនដំណើរការដែរ។ នេះបើតាមការបញ្ជាក់របស់ក្រុមហ៊ុនដឹកជញ្ជូនរបស់រដ្ឋ SNCF និងក្រុមហ៊ុន RATP។ រីឯការធ្វើចរាចរណ៍ចេញចូលអន្តរជាតិ ឆ្លងពីបារាំងទៅប្រទេសដទៃ ក៏ត្រូវរងការប៉ះពាល់រំខានខ្លាំងដែរ នៅចុងសប្តាហ៍នេះ។
ការលំបាកខ្លាំងក្នុងការធ្វើដំណើរយ៉ាងដូច្នេះ គឺកើតមានជាង១០ថ្ងៃមកនេះ ដែលបង្កជាក្តីបារម្ភរឹតតែច្រើន ចំពោះការប្រារព្ធពិធីបុណ្យណូអែល និងបុណ្យឆ្លងថ្មី នាពេលខាងមុខនេះ ដែលនៅតែប្រមាណជាង១០ថ្ងៃទៀត តែប៉ុណ្ណោះ។
បើតាមទិន្នន័យកាលបុណ្យពីឆ្នាំមុន នៅបើរាប់តែនៅក្រុងប៉ារីសមួយ គឺមានអ្នកធ្វើដំណើរ ជាង៣លាន ដែលបានជិះរថភ្លើង នៅពេលបុណ្យណូអែល។ ហើយមនុស្សជាង៨លាននាក់ ដែលធ្វើដំណើរផ្លាស់ទី ក្នុងឱកាស១៥ថ្ងៃ នៃថ្ងៃឈប់សម្រាកបុណ្យសំខាន់ៗទាំងពីរ នាចុងឆ្នាំនេះ។
ដើម្បីជួយសម្រួល, រដ្ឋាភិបាលបារាំង បានស្នើឱ្យក្រុមហ៊ុនដឹកជញ្ជូន ត្រូវធានាការដឹកជញ្ជូនឡើងវិញ ក្នុងឱកាសប្រចាំឆ្នាំដូច្នេះ និងត្រូវចេញកាលវិភាគម៉ោងពេលរថភ្លើង និងប្លង់ ថ្មីមួយ សម្រាប់ឱកាសបុណ្យដ៏សំខាន់នេះ។ ក៏ប៉ុន្តែ ក្រុមហ៊ុនដឹកជញ្ជូន នៅមិនទាន់តបអ្វី ឱ្យច្បាស់លាស់នៅឡើយទេ ហើយអ្នកតំណាងខាងក្រុមហ៊ុនដឹកជញ្ជូន ក៏ធ្លាប់បាននិយាយដែរ ថាអ្នករស់នៅក្រុងប៉ារីស ប្រហែលជាត្រូវសម្រាកនៅផ្ទះជួបជុំគ្រួសារ ច្រើនជាង ធ្វើដំណើរតាមរថភ្លើង។
ដូច្នេះនៅក្នុងឱកាសបុណ្យទានខានមុខនេះ សម្រាប់អ្នកដែលត្រូវការធ្វើដំណើរ ឬអ្នកដែលនៅជាប់ធ្វើការងារនោះ គឺនឹងត្រូវប្រឈមមុខនឹងការខ្វះមធ្យោបាយធ្វើដំណើរសាធារណៈតទៅទៀត ជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ