អគ្គិភ័យឆាបឆេះជំរំជនអន្តោប្រវេន៍នៅបារាំង
ជំរំជនអន្តោប្រវេសន៍ដ៏ធំមួយ នៅប៉ែកខាងជើងប្រទេសបារាំង ត្រូវបានអគ្គិភ័យលេបត្របាក់ កាលពីយប់ថ្ងៃចន្ទ។ ជម្រកជាកូនផ្ទះឈើប្រមាណជា ៣០០ខ្នង ត្រូវបានឆេះខ្ទេចស្ទើរគ្មានសល់ ហើយមនុស្សយ៉ាងតិច ១០នាក់ត្រូវរងរបួស។
ចុះផ្សាយនៅថ្ងៃ៖ កែប្រែថ្ងៃទី៖
ជំរំជនអន្តោប្រវេសន៍ដែលត្រូវភ្លើងឆេះ កាលពីយប់ថ្ងៃចន្ទនេះ ត្រូវបានសាងសង់ឡើង ដោយអង្គការគ្រូពេទ្យគ្មានព្រំដែន កាលពីខែមីនា ឆ្នាំ២០១៦កន្លងទៅ ហើយដែលគិតមកទល់នឹងចុងខែមីនាឆ្នាំ២០១៧នេះ មានជនអន្តោប្រវេសន៍ស្នាក់នៅ ប្រមាណជា ១៥០០នាក់ ភាគច្រើនជាជនជាតិគួឌីស្ថានមកពីអ៊ីរ៉ាក់។
យោងតាមអាជ្ញាធរដែនដីនៅក្នុងតំបន់នោះ អគ្គិភ័យទំនងជាកើតឡើងដោយសារមានការលួចដុតដោយចេតនា ហើយកើតចេញពីទំនាស់ រវាងជនអន្តោប្រវេសន៍នៅក្នុងជំរំ។ ជម្លោះបានចាប់ផ្ទុះឡើង កាលពីថ្ងៃរសៀល រវាងម្ខាងជនអន្តោប្រវេសន៍មកពីអ៊ីរ៉ាក់ និងម្ខាងទៀតជនអន្តោប្រវេសន៍មកពីអ៊ីរ៉ាក់។ ជម្លោះបានឈានដល់ការវាយតប់គ្នា បង្កឲ្យមនុស្ស ៦នាក់ត្រូវរងរបួស រហូតដល់មានអន្តរាគមន៍ពីកងកម្លាំងប៉ូលិសទើបអាចបញ្ឈប់ការវាយតប់គ្នានេះបាន។ ក៏ប៉ុន្តែ នៅយប់ឡើង ជម្លោះនេះក៏បានផ្ទុះឡើងសាជាថ្មីម្តងទៀត គឺនៅក្នុងអំឡុងពេលនោះហើយ ដែលភ្លើងចាប់ផ្តើមឆាបឆេះឡើង នៅក្នុងជំរំ។
អាជ្ញាធរក៏បានឲ្យដឹងផងដែរថា ជនអន្តោប្រវេសន៍ដែលស្នាក់នៅក្នុងជំរំ ត្រូវបានជម្លៀសចេញ ហើយអាជ្ញាធរបានបើកសាលកីឡាចំនួនពីរកន្លែង ដើម្បីឲ្យពួកគេជ្រកជាបណ្តោះអាសន្ន។ ក៏ប៉ុន្តែ រហូតមកទល់នឹងពេលនេះ គេនៅតែមិនទាន់ដឹងថា តើអ្វីទៅជាដំណោះស្រាយបន្ទាប់ ដើម្បីជំនួសជម្រកបណ្តោះអាសន្ននេះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ