ចំនួនអ្នកស្លាប់ដោយទឹកជំនន់កើនដល់៦១នាក់គិតត្រឹមថ្ងៃអាទិត្យ
ទឹកជំនន់ចាប់ផ្តើមស្រក រីឯទំហំនៃការខូចខាតកាន់តែកើនឡើង។ តួលេខចុងក្រោយបានបង្ហាញថា ទឹកជំនន់ដោយទឹកភ្លៀង និងទឹកជំនន់ទន្លេមេគង្គបានសម្លាប់ប្រជាជនខ្មែរអស់៦១នាក់។ ប្រជាជនជាង៨ម៉ឺនគ្រួសារត្រូវបានប៉ះពាល់ដោយសារទឹកជំនន់ ក្នុងនោះជាង១ម៉ឺនគ្រួសារត្រូវបានសង្គ្រោះទៅកាន់ទីទួលសុវត្ថិភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
លោក លឹម គានហោ រដ្ឋមន្ត្រីក្រសួងធនធានទឹកនៃប្រទេសកម្ពុជា បានថ្លែងប្រាប់តាមទូរស័ព្ទ នៅរសៀលថ្ងៃអាទិត្យនេះថា ស្ថានភាពទឹកជំនន់ទន្លេមេគង្គ និងទឹកភ្លៀង បានចាប់ផ្តើមស្រកបន្តិចហើយ។ ទឹកទន្លេមេគង្គនៅក្នុងខេត្តស្ទឹងត្រែង និងខេត្តក្រចេះចាប់ផ្តើមស្រកតាំងពីម្សិលមិញ ហើយវានឹងបន្តស្រកចុះថែមទៀតនៅថ្ងៃខាងមុខនេះ។ រីឯបញ្ហាទឹកភ្លៀងវិញក៏ចាប់ផ្តើមធូរស្រាលហើយដែរ។
ទឹកជំនន់ទឹកភ្លៀង និងទឹកជំនន់ទន្លេមេគង្គបានវាយប្រហារមកលើខេត្តក្រុង ចំនួន១៥ នៅក្នុងប្រទេសកម្ពុជា។ តួលេខចុងក្រោយ ដែលផ្តល់ដោយលោក កែវ វី នាយខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃអាទិត្យនេះ បានបញ្ជាក់ថា រហូតមកដល់ពេលនេះ ចំនួនអ្នកស្លាប់ដោយសារទឹកជំនន់ទឹកភ្លៀងនិងទឹកជំនន់ទន្លេមេគង្គបានកើនដល់ ៦១នាក់ ក្នុងនោះមានក្មេង ចំនួន៣៤នាក់។
ខេត្តដែលមានមនុស្សស្លាប់ច្រើនជាងគេ គឺខេត្តកំពង់ចាមចំនួន២០នាក់ ខេត្តកំពង់ធំចំនួន១៨នាក់ ខេត្តព្រៃវែងចំនួន១៥នាក់។ ក្នុងខេត្តកំពង់ធំ មនុស្សពីរនាក់ស្លាប់ដោយសារពស់ចឹកពេលទឹកជំនន់។ ក្រៅពីនេះ អ្នកស្លាប់ទាំងអស់ គឺបណ្តាលមកពីការលង់ទឹក។
លោក កែវ វី នាយខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបាន
លម្អិតបន្ថែមថា ទឹកជំនន់បានសម្លាប់ គោ ក្របី ចំនួន ៦៧ក្បាល សាលារៀន ២៥៥ខ្នងត្រូវលិចលង់ វត្តអារាម១៤៧កន្លែងត្រូវរងគ្រោះ ផ្ទះសម្បែងជាង៧ម៉ឺនខ្នងត្រូវលិចលង់ និងដំណាំកសិកម្មរាប់ពាន់ហិចតាផ្សេងទៀតបានទទួលរងផលប៉ះពាល់ដោយសារទឹកជំនន់។
នៅព្រឹកថ្ងៃអាទិត្យនេះ លោកនាយករដ្ឋមន្រ្តី ហ៊ុន សែន បានថ្លែងនៅក្នុងខេត្តកំពង់ធំ ពីទីកន្លែងលិចទឹកថា នេះជាលើកទី១ហើយ ដែលប្រទេសកម្ពុជាបានប្រើប្រាស់ឧទ្ធម្ភាគចក្រ ជួយសង្រ្គោះជនរងគ្រោះដោយសារទឹកជំនន់នៅក្នុងខេត្តសៀមរាប ។ លោកប្រមុខរាជរដ្ឋាភិបាលកម្ពុជា បានបញ្ជាអោយអាជ្ញាធរពាក់ព័ន្ធទាំងអស់ត្រូវប្រញាប់ប្រញាល់ដោះស្រាយបញ្ហាទឹកជំនន់នេះជាបន្ទាន់។
សូមបញ្ជាក់ថា កាលពីឆ្នាំ២០០០កន្លងទៅ ដោយសារទឹកជំនន់ ប្រទេសកម្ពុជាខាតបង់ទឹកប្រាក់១៦០លានដុល្លារអាមេរិក និងបាត់បង់ជីវិតមនុស្សជាង៦០នាក់។ នៅឆ្នាំ២០០១ ដោយសារទឹកជំនន់ដដែល ប្រទេសកម្ពុជាខាតបង់ទឹកប្រាក់ជាង៨០លានដុល្លារអាមេរិក និងមានមនុស្សស្លាប់ជាង៥០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ