ព្រះសង្ឃពុទ្ធសាសនា៦អង្គនិមន្តទៅកាន់ទីប្រជុំកោះSpratleys
ព្រះសង្ឃពុទ្ធសាសនាវៀតណាម៥អង្គ បាននិមន្តចេញដំណើរនៅថ្ងៃសុក្រ១៣មេសា ឆ្ពោះទៅកាន់ទីប្រជុំកោះ Spratleys នៅក្នុងសមុទ្រចិនខាងត្បូង តំបន់ដែលប្រទេសវៀតណាម ចិន និងប្រទេសអាស៊ីមួយចំនួនផ្សេងទៀតនៅក្នុងតំបន់ ប្រកាសទាមទារថាជាដែនអធិបតេយ្យរបស់គេរៀងៗខ្លួន។ នៅប្រជុំកោះ Spratleys សង្ឃវៀតណាមទាំង៥អង្គ នឹងគង់នៅក្នុងវត្ត៣ដែលវៀតណាម បានបោះបង់ចោលនៅឆ្នាំ១៩៧៥ក្រោយចប់សង្គ្រាមវៀតណាមនិងទើបជួសជុលឡើងវិញនៅពេលថ្មីៗនេះ ដើម្បីបញ្ជាក់ថាទីប្រជុំកោះSpratleys ជាដែនអធិបតេយ្យរបស់វៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
“គម្រោងរបស់យើងគឺត្រូវស្ថិតនៅលើកោះ Truong Sa ភាសាវៀតណាមមានន័យថាSpratleys ក្នុងរយៈពេល៦ខែ “-នេះជាការថ្លែងរបស់ព្រះតេជព្រះគុណ Thich Giac Nghiaបា្រប់ទីភ្នាក់ងារព័ត៌មានបារាំងAFPនៅថ្ងៃសុក្រ១៣មេសានេះតាមទូរស័ព្ទពីលើនាវាដែលដឹកសង្ឃវៀតណាមទៅកាន់ Spratleys-ដោយបានបន្ថែមទៀតថា « ព្រះសង្ឃមួយអង្គទៀតនឹងនិមន្តមកតាមក្រោយ »។
គោលដៅនៃដំណើរទៅកាន់ប្រជុំកោះSpratleysគឺដើម្បីជួយពង្រឹងខាងសាសនាដល់ប្រជាជនរស់នៅទីនោះដែលភាគច្រើនជាអ្នកកាន់ពុទ្ធសាសនា ជាទាហានអ្នកនេសាទនិងកសិករ ជាពិសេស ដើម្បីជួយលើកទឹកចិត្តពួកគេក្នុងការជំនះរាល់ឧបសគ្គនានានៅក្នុងជីវភាពរស់នៅ-នេះជាការពន្យល់បន្ថែមរបស់ ព្រះសង្ឃ Thich Giac Nghia ។
ប៉េកាំងនិងហាណូយ ឈ្លោះប្រកែកគ្នាជាយូរយារមកហើយនៅក្នុងការដណ្តើមទាមទារកម្មសិទ្ធិលើទីប្រជុំកោះSpratley និង Paracels នេះ ពីព្រោះទីប្រជុំកោះពីរនេះ គឺជាដែនសមុទ្រសម្បូណ៌ហូរហៀរដោយប្រេងឥន្ទនៈ។ ដូចយ៉ាង នៅឆ្នាំ១៩៨៨ កងទ័ពវៀតណាមនិងចិន បានផ្ទុះអាវុធដាក់គ្នាយ៉ាងខ្លាំងក្លាបំផុតក្នុងដែនសមុទ្រម្តុំជុំវិញកោះក្នុងរយៈពេលខ្លី ក៏ប៉ុន្តែការប្រយុទ្ធនេះ បានបណ្តាលឲ្យកងទ័ពជើងទឹកវៀតណាមស្លាប់៦៤នាក់។
ម្យ៉ាងទៀត តាំងពី១ឆ្នាំកន្លងមកនេះ មានឧប្បត្តិហេតុប៉ះទង្គិចគ្នា រវាងចិននិងវៀតណាម កើនឡើងផង ជាញឹកញាប់។ ដោយហេតុថា នៅថ្ងអង្គារកន្លងផុតទៅនេះ នាវាទេសចរណ៍របស់ចិនមួយគ្រឿង បានសាកល្បងធ្វើដំណើរទៅដល់ទីប្រជុំកោះParacels ដើម្បីចង់សិក្សាអំពីលទ្ធភាពពង្រីកវិស័យទេសចរណ៍របស់ខ្លួន។
ព្រឹត្តិការណ៍នេះ ត្រូវបានទីក្រុងហាណូយ បរិហារទីក្រុងប៉េកាំងជាបន្ទាន់ភ្លាមដោយចោទថា ជាបេសកកម្មមួយខុសច្បាប់និងរំលោភបំពានយ៉ាងធ្ងន់ធ្ងរលើអធិបតេយ្យរបស់ប្រទេសវៀតណាម។
គួររំលឹកថា ប្រទេសជិតខាងកុម្មុយនិស្តទាំងពីរនេះ កំពុងតែទ័លច្រកនៅក្នុងសំណុំរឿង ស្តីពី សិទ្ធិនេសាទ នៅទីប្រជុំកោះ Paracels ជាទីដែលអ្នកនេសាទវៀតណាម២១នាក់ ត្រូវបានអាជ្ញាធរចិន ចាប់ឃុំឃាំងតាំងពីជាងមួយខែកន្លងមកហើយ។
ទីប្រជុំកោះSpratleys ត្រូវបានប្រទេសអាស៊ីមួយចំនួនផ្សេងទៀត ដូចជាកោះតៃវ៉ាន់ប្រទេសប្រុយណេ ម៉ាឡេស៊ី និង ហ្វីលីពីន ស្រែក ទាមទារជាកម្មសិទ្ិធរបស់គេមួយចំណែកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ