វេទិកាលើកដំបូងនៅការិយាល័យអ្នកតំណាងរាស្ត្រខេត្តបាត់ដំបង
ការិយាល័យអ្នកតំណាងរាស្ត្រខេត្តបាត់ដំបង រៀបចំវេទិការាស្ត្រ និងអ្នកតំណាងរាស្ត្រ ជាលើកដំបូង នៅថ្ងៃអង្គារ ទី២៨ ខែតុលា ឆ្នាំ២០១៤ វេលាម៉ោង២រសៀល។ វេទិកាថ្ងៃស្អែក ដឹកនាំដោយលោកស្រី មួរ សុខហួរ អ្នកតំណាងរាស្ត្រមកពីគណបក្សសង្គ្រោះជាតិ។ មន្ត្រីការិយាល័យអ្នកតំណាងរាស្ត្រខេត្តបាត់ដំបង បានបញ្ជាក់អំពីការត្រៀមរៀបចំព្រឹត្តិការណ៍នោះ ខណៈអគ្គលេខាធិការដ្ឋានរដ្ឋសភាជាតិអះអាងថា «មិនបានដឹង»អំពីរឿងនេះ។
ចុះផ្សាយនៅថ្ងៃ៖
ស្តាប់ - ០១:៤១
គេអាចនិយាយបានថា វេទិការាស្ត្រ និងអ្នកតំណាងរាស្ត្រ នៅថ្ងៃអង្គារ ទី២៨ ខែតុលា ឆ្នាំ២០១៤ វេលាម៉ោង២រសៀល គឺជាព្រឹត្តិការណ៍ដំបូងបំផុត ដែលត្រូវរៀបចំធ្វើនៅការិយាល័យអ្នកតំណាងរាស្ត្រខេត្តបាត់ដំបង។ វាក៏ជាវេទិកាលើកទី១ដែរ សម្រាប់ការិយាល័យអ្នកតំណាងរាស្ត្រនៅទូទាំងប្រទេស ដែលស្ថិតនៅក្រោមការគ្រប់គ្រងរបស់អគ្គនាយកដ្ឋានសេវា និងបច្ចេកទេស នៃរដ្ឋសភាជាតិកម្ពុជា។
លោក ហ៊ុយ ហៀង មន្ត្រីការិយាល័យអ្នកតំណាងរាស្ត្រខេត្តបាត់ដំបង បានបញ្ជាក់ឱ្យដឹងថា ការត្រៀមរៀបចំវេទិកាសាធារណៈ ត្រូវបានធ្វើរួចរាល់ហើយ ដូចជាការកាត់ស្មៅ និងសម្អាតទីតាំង ដែលស្ថិតនៅសង្កាត់ព្រែកព្រះស្តេចនោះជាដើម។ បើតាមមន្ត្រីរូបនេះ ព្រឹត្តិការណ៍នៅរសៀលថ្ងៃអង្គារ ត្រូវបាន«ជូនដំណឹង»ទៅអគ្គនាយកដ្ឋានសេវា និងបច្ចេកទេស នៃរដ្ឋសភាជាតិរួចហើយ។ ដោយឡែក មន្ត្រីនៅអគ្គលេខាធិការដ្ឋានរដ្ឋសភាពជាតិបានអះអាងថា«មិនបានដឹង»អំពីរឿងនេះទេ។
យ៉ាងណាក៏ដោយ លោកស្រី មួរ សុខហួរ អ្នកតំណាងរាស្ត្រមណ្ឌលខេត្តបាត់ដំបង មកពីគណបក្សសង្គ្រោះជាតិ ដែលដឹកនាំធ្វើវេទិកានោះ ពន្យល់ថា វាជាផ្នែកមួយនៃសកម្មភាពសមាជិកសភាជាតិ ហើយសាលាខេត្តបាត់ដំបងក៏«បានឯកភាព»ដែរ។ លោកស្រី មួរ សុខហួរ បានបន្ថែមថា លិខិតអញ្ជើញត្រូវបានចែករួចជាស្រេច គ្រាន់តែថា វាជាវេទិកាដែលក្រុមអ្នកតំណាងរាស្ត្រគណបក្សប្រឆាំងផ្តួចផ្តើមធ្វើ។ លោកស្រី «មិនប្រាកដទេ»ថា តំណាងរាស្ត្រមកពីគណបក្សប្រជាជនកម្ពុជា ចូលរួមឬអត់។
លោក សម រង្ស៊ី ដែលទើបវិលត្រឡប់មកពីអឺរ៉ុបវិញ នឹងមិនមានវត្តមាន នៅក្នុងវេទិកាថ្ងៃអង្គារនោះទេ ប៉ុន្តែប្រធានគណបក្សសង្គ្រោះជាតិរូបនេះ នឹងទៅចូលរួមក្នុងវេទិកាសាធារណៈមួយផ្សេងទៀត នៅឃុំចែងមានជ័យ ស្រុកបាណន់ ខេត្តបាត់ដំបងនាថ្ងៃបន្ទាប់។ នេះបើតាមលោកស្រី មួរ សុខហួរ ដែលជាអគ្គនាយិកាទំនាក់ទំនងសាធារណៈនៃគណបក្សប្រឆាំងផងដែរ។
កន្លងទៅ ការិយាល័យអ្នកតំណាងរាស្ត្រនៅតាមខេត្ត ក្រុងទូទាំងប្រទេស ត្រូវបានសាធារណៈជនកត់សម្គាល់ថា មិនសូវធ្វើសកម្មភាពទេ ហើយខ្វះការសម្អាតនិងមានស្មៅដុះទ្រុបទ្រុល។ ប្រជាពលរដ្ឋម្ចាស់ឆ្នោតច្រើនតែមកដល់ភ្នំពេញតែម្តង នៅពេលមានបញ្ហាចង់ឱ្យអ្នកតំណាងរាស្ត្រជួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ