ជំនួបថ្នាក់រដ្ឋមន្ត្រីហិរញ្ញវត្ថុនៃហ្សេ២០ ដើម្បីត្រៀមទទួលជំនួបកំពូល
រដ្ឋមន្ត្រីក្រសួងហិរញ្ញវត្ថុនិងប្រធានធនាគារកណ្តាលនៃក្រុមប្រទេសមានសេដ្ឋកិច្ចលូតលាស់ខ្លាំង ទាំង២០ ឬហៅកាត់ថាG២០ ត្រូវជួបប្រជុំគ្នានៅថ្ងៃសុក្រនិងថ្ងៃសៅរ៍ស្អែកនេះ នៅក្រុងម៉ូស្គូប្រទេសរុស្ស៊ី។ ជាជំនួបប្រជុំត្រៀមបើកជំនួបកំពូលប្រចាំឆ្នាំ ដែលនឹងប្រព្រឹត្តទៅនៅខែកញ្ញាខាងមុខ។ ប៉ុន្តែនេះគឺជាលើកទីបីហើយដែលក្រុមអ្នកក្តាប់ហិរញ្ញវត្ថុរបស់ប្រទេសអ្នកមាន និងប្រទេសកំពុងមានសេដ្ឋកិច្ចស្ទុះឡើងជួបគ្នាដូច្នេះ។ ប្រធានបទចម្រូងចម្រាសគ្នាមានខ្វះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ជាមួយនឹងតំបន់ចាយប្រាក់អឺរ៉ូ ស្អិតដិតដាមទៅដោយវិបត្តិសេដ្ឋកិច្ចដើរថយក្រោយចេញពុំរួច កំណើនសេដ្ឋកិច្ចចាប់ផ្តើមរើបយ៉ាងត្រដាបត្រដួសនៅសហរដ្ឋអាមេរិក និងការបន្ថយល្បឿនសេដ្ឋកិច្ចរបស់ចិន ផ្ទៃមេឃនៃសេដ្ឋកិច្ចពិភពលោកគ្មានពន្លឺសោះ ពេលខាងមុខ។ ហើយក្រុមប្រទេសហ្សេ២០ដែលត្រូវជួបគ្នាជាថ្មីនៅទីក្រុងម៉ូស្គូថ្ងៃនេះ ហាក់ដូចជាមានគំនិតខ្វែងគ្នាដដែល។
ប្រទេសអាល្លឺម៉ង់បានឱ្យដឹងជាមុនស្រេច ទន្ទេញដដែលៗពីភាពចាំបាច់នៃកាត់បន្ថយបំណុល។ សម្រាប់បែរឡាំង កំណើនសេដ្ឋកិច្ចពិតជាអាចមានទោះបីជាត្រូវត្បិតត្បៀតចំណាយសាធារណៈយ៉ាងណាក៏ដោយ។ ផ្ទុយទៅវិញ សហរដ្ឋអាមេរិកនឹងទាមទារឱ្យដៃគូអឺរ៉ុបរៀបចំផែនការមួយដើម្បីធ្វើឱ្យមានការចាយវាយ និងមានកំណើនសេដ្ឋកិច្ច។
ចំណែកក្រុមប្រទេសមានសេដ្ឋកិច្ចកំពុងលូតលាស់ខ្លាំងវិញ នឹងស្នើសុំសំណងពីអាមេរិក ! ការប្រកាសចេតនាចង់កាត់បន្ថយកម្មវិធីទ្រទ្រង់់សេដ្ឋកិច្ច នឹងអាចធ្វើឱ្យថវិកាជាច្រើនហូរចេញពីប្រទេស។ ផែនការផ្តល់សន្ទុះសេដ្ឋកិច្ចរបស់ជប៉ុន ក៏នឹងត្រូវពនិត្យពិច័យ យ៉ាងលម្អិតដែរ ព្រោះតូក្យូមិនទាន់បានធ្វើកំណែទម្រង់ប្រព័ន្ធសេដ្ឋកិច្ច ចាស់គំរិលរបស់ខ្លួនដូចសន្យានៅឡើយទេ។
ប៉ុន្តែជាសំណាងល្អ ក្រុមប្រទេសហ្សេ២០ បានព្រមព្រៀងគ្នាលើសំណុំរឿងខ្លះ មានជាអាទិ៍ ការប្រយុទ្ធប្រឆាំងនឹងការគេចពន្ធ ឬរឿងសំងាត់ធនាគារ។ ជំនួបប្រជុំក្រុងម៉ូស្គូនេះ ជាឱកាសដែលអ្នកទទួលខុសត្រូវហិរញ្ញវត្ថុទាំងអស់ត្រូវបូកសរុបបញ្ចប់លទ្ធផលដែលទទួលបាន។ របាយការណ៍របស់អង្គការ OCDE លើប្រធានបទនេះ នឹងត្រូវចេញផ្សាយនៅថ្ងៃសុក្រនេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ