ធាតុអាកាសត្រជាក់ខ្លាំង ផ្អាកការរៀនសូត្រនៅតាមសាលាមធ្យមសិក្សា
ដំណឹងនេះ ផ្សាយគ្មានរំលងឡើយ តាំងពីព្រឹកមិញមក ដោយប៉ុស្តទូរទស្សន៍ធំៗនៃប្រទេស ដែលលំអិតថា ឆ្នាំនេះ រដូវធា្លក់ទឹកកក ពាំនាំមកនូវសីតុណ្ហភាពត្រជាក់ប្លែកពីធម្មតា នៅតាមតំបន់ភាគច្រើននៃប្រទេស ជាពិសេសនៅតំបន់ស៊ីបេរី គឺចុះដល់ទ្រនិចពី៤០ ទៅ៥០អង្សាក្រោមសូន្យ ទាល់តែអាជ្ញាធរអនុគ្រោះដល់សិស្សសាលាកុំធ្វើដំណើរទៅរៀនអី។
ចុះផ្សាយនៅថ្ងៃ៖
ស្តាប់ - ០២:៤៧
ត្រជាក់មែនទែន គឺគ្របដណ្តប់ពេញលើតំបន់ស៊ីបេរីខាងលិច និងខាងកើត បែបយ៉ាងនៅខេត្ត Altai Novosibirsk Irkoutsk Omsk Tyva ភ្នំ Oural ជាទីដែលសីតុណ្ហភាពជាទូទៅ នៅជុំវិញ៤០អង្សាក្រោមសូន្យ ហើយនៅឯឧបទ្វីប Kamchatka ចុងបូព៌ាប្រទេស ចម្ងាយ ៨.២០០គ.ម. ពីម៉ូស្គូគឺដល់ទៅ៥២អង្សាក្រោមសូន្យ ឬពី១០ ទៅ១៥ អង្សាទាបជាងធម្មតា។ ករណីខេត្ត Tyva នៅចម្ងាយជាង៤.៦០០គ.ម.ខាងកើតពីរដ្ឋធានីម៉ូស្គូ ក្នុងក្រុង Kysyl ដោយមកពីព្រឹកមិញ ធាតុអាកាសចុះដល់៤៤អង្សាក្រោមសូន្យ ការសិក្សានៅតាមសាលារៀននៃក្រុងនេះ ដែលមានបណ្តាជន ១សែន១ម៉ឺននាក់ ត្រូវលុបមិនឲ្យប្រព្រឹត្តទៅទេ។ ដ្បិតស្របនឹងបទណែនាំចេញដោយអាជ្ញាធរសិក្សាធិការខេត្ត ដរាបណាដែលធាតុអាកាសចុះដល់៤០អង្សាក្រោមសូន្យ គឺហាមមិនឲ្យសិស្សពីថ្នាក់ទី១ ដល់ទី៤ទៅរៀនឡើយ បើចុះដល់៤១-៤២អង្សា បម្រាមនោះប៉ះដល់សិស្សរហូតដល់ថ្នាក់ទី៩ នៅទីបំផុត បើចុះដល់ក្រោម ៤៣អង្សា គឺរួមក្តោបទាំងសិស្សថ្នាក់លើ គឺថ្នាក់ទី១០ និងទី១១។
របបសិក្សាបែបនេះ ក្នុងលក្ខណៈនៃអាកាសធាតុត្រជាក់ខ្លាំងក៏ត្រូវគេអនុវត្តនៅតាមខេត្តផ្សេងៗនៃតំបន់ស៊ីបេរី។ តាមឧត្តុនិយម ធាតុអាកាសត្រជាក់ខ្លាំងនៅតំបន់នោះដែលបានចាប់ផ្តើមប៉ុន្មានថ្ងៃ មុននឹងពន្យារទៅពេញមួយសប្តាហ៍នេះតែម្តង។ ឧត្តុនិយមខេត្ត Irkoutsk ដែលស្ថិតនៅចម្ងាយ ៥.២០០គ.ម. ពីម៉ូស្គូបានឲ្យដឹងថា បើគិតក្នុង៣០ឆ្នាំចុងក្រោយ គឺតែ ២លើកប៉ុណ្ណោះ ដែលសីតុណ្ហភាពធ្លាក់ចុះយ៉ាងគំហុកបែបនេះ។ ព្រឹកមិញ នៅអាកាសយានដ្ឋានទីរួមខេត្តនេះ យន្តហោះដែលត្រូវដឹកទេសចរទៅសម្រាកនៅឆ្នេរសមុទ្រថៃ ស្រាប់តែមិនអាចហោះចេញ ដោយមកពីធាតុអាកាសត្រជាក់ ធ្វើឲ្យរអាក់រអួលដល់ប្រព័ន្ធ Computer របស់វា។
ទាំងសត្វក៏រងគ្រោះដែរនឹងធាតុអាកាសត្រជាក់ខ្លាំង។ ប៉ុន្មានថ្ងៃមុន ទូរទស្សន៍បញ្ចាំងឲ្យឃើញឧប្បត្តិហេតុមួយកើតឡើង មកពីអគ្គីភ័យ ស្រាប់តែឆេះក្នុងរថយន្តទ្រុង ដឹកដំរី២ក្បាល ជាដំរីលេងសៀកនៅខេត្ត Novosibirsk ចម្ងាយ៣.៣០០គ.ម.ពីម៉ូស្គូ។ ម្ចាស់ដំរីទាំង២នោះ ដោយខំជួយសង្គ្រោះវា រូបគាត់ផ្ទាល់ត្រូវរលាកខ្លាំងនឹងធាតុអាកាសត្រជាក់ជាង៤០អង្សា ក្រោមសូន្យ ហើយត្រូវដឹកទៅមន្ទីរពេទ្យ។ ចំណែកដំរីទាំង២ក្បាលនោះដែលអាយុសុទ្ធតែជាង៣០ឆ្នាំ ក៏រលាកនៅត្រង់ស្លឹកត្រចៀកវា ហើយដើម្បីកុំឲ្យវារងារពេក ក្រុមសង្គ្រោះបានឲ្យវាផឹកទឹក ដោយលាយនឹងស្រា Vodka សរុបទៅអស់២កែស។
បើនិយាយពីរដ្ឋធានីរុស្ស៊ីវិញ ក៏ត្រជាក់គួរដែរ អស់ប៉ុន្មានថ្ងៃជាប់មកហើយ សីតុណ្ហភាពពេលថ្ងៃ គឺពី១៤ ទៅ១៧អង្សាក្រោមសូន្យ ហើយយប់គឺចុះដល់២១-២២អង្សា។ ឧត្តុនិយមព្យាករណ៍ថា របបសីតុណ្ហភាពនេះនឹងពន្យារទៅរហូតដល់ចុងសប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ