“ស្ត្រីបំរើភេទទាហានជប៉ុន” ក្រុងតូក្យូមិនសើរើការសុំទោសរបស់ខ្លួនក្នុងឆ្នាំ១៩៩៣ទេ
នៅថ្ងៃចន្ទនេះ រដ្ឋាភិបាលជប៉ុនបានប្រកាសថា គ្មានបំណងបកក្រោយសើរើមើលការសុំទោសជាសាធារណៈ ដែលជប៉ុនធ្លាប់បានធ្វើកាលពីឆ្នាំ១៩៩៣ ចំពោះស្ត្រីដែលត្រូវគេបង្ខំអោយបំរើផ្លូវភេទកងទ័ពជប៉ុន ក្នុងសម័យសង្គ្រាមលោកលើកទី២នោះទេ។ ប៉ុន្តែ ជប៉ុននឹងពិនិត្យឡើងវិញនូវអំណះអំណាងសាក្សីរបស់ស្ត្រីកូរ៉េ១៦នាក់ ដែលធ្លាប់បានបំរើផ្លូវភេទកងទ័ពជប៉ុន ក្នុងសម័យសង្គ្រាមលោក។ រដ្ឋាភិបាលជប៉ុនប្រកាសបែបនេះ បន្ទាប់ពីអ្នកប្រវត្តិសាស្ត្រជប៉ុនច្រើនរូប បានថ្កោលទោស កាលពីថ្ងៃសុក្រ ចំពោះការដែលរដ្ឋាភិបាលចង់បកក្រោយចំពោះការសុំទោសរបស់ខ្លួន កាលពីឆ្នាំ១៩៩៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
នៅថ្ងៃចន្ទនេះ លោក យ៉ូស្ហ៊ីហ៊ីត ស៊ូហ្កា តំណាងរដ្ឋាភិបាលជប៉ុន បានលើកឡើងថា រដ្ឋាភិបាលជប៉ុនគ្មានបំណងបកក្រោយនិយាយពីការសុំទោសដែលខ្លួនធ្លាប់ធ្វើជាសាធារណៈ កាលពីឆ្នាំ១៩៩៣ ចំពោះស្ត្រីដែលធ្លាប់បំរើផ្លូវភេទកងទ័ពជប៉ុន ក្នុងសម័យសង្គ្រាមលោកលើកទី២ទេ។ កាលពីចុងខែកុម្ភៈកន្លងទៅ រដ្ឋាភិបាលជប៉ុនធ្លាប់ប្រាប់ថា ខ្លួននឹងសិក្សាលើអំណះអំណាងកក្សិណសាក្សីរបស់ស្ត្រីកូរ៉េ១៦នាក់ ដែលធ្លាប់បំរើផ្លូវភេទកងទ័ពជប៉ុន។ ការប្រកាសនេះ ធ្វើអោយគេគិតថា ជប៉ុននឹងសិក្សាចម្លើយកក្សិណសាក្សីរបស់ស្ត្រីកូរ៉េទាំងនេះ ដើម្បីសើរើមើលពាក្យសុំទោសខ្លួនឡើងវិញ។
គួររំលឹកឡើងវិញថា ក្នុងសម័យសង្គ្រាមលោកលើកទី២ ស្ត្រី២សែននាក់ ជាជនជាតិកូរ៉េ ចិន ឥណ្ឌូណេស៊ី ហ្វីលីពីន និងតៃវ៉ាន់ ភាគច្រើនជាអនិតិជន បានត្រូវគេបង្ខំអោយធ្វើជាទាសករបំរើផ្លូវភេទកងទ័ពជប៉ុន។ ស្ត្រីភាគច្រើនជាជនជាតិកូរ៉េ។ កាលពីឆ្នាំ១៩៩៣ រដ្ឋាភិបាលជប៉ុនធ្លាប់បានធ្វើការសុំទោសជាសាធារណៈ និងសំដែងការសោកស្តាយ ចំពោះការដែលស្ត្រីទាំងនោះត្រូវបានបង្ខំអោយធ្លាក់ខ្លួនចូលក្នុង ទាសភាពផ្លូវភេទ។ ប៉ុន្តែនៅខែកុម្ភៈមុននេះ រដ្ឋាភិបាលជប៉ុនបានប្រកាសពិចារណា ដកពាក្យសុំទោសឆ្នាំ១៩៩៣ចេញវិញ។
ជប៉ុនបានប្រើពាក្យថា "ស្ត្រីបំរើផ្លូវភេទ" ដើម្បីដាក់និយមន័យអោយស្ត្រីរងគ្រោះក្នុងទាសភាពទាំងនោះ។ ដោយសារតែរឿងនេះ កូរ៉េខាងត្បូងនិងចិនមានការខឹងសម្បារចំពោះរដ្ឋាភិបាលជប៉ុន។ ភាពតានតឹងរវាងជប៉ុននិងកូរ៉េខាងត្បូងបានផ្ទុះឡើង ក្នុងខែកុម្ភៈមុននេះ នៅពេលដែលប្រធានក្រុមហ៊ុនវិទ្យុនិងទូរទស្សន៍រដ្ឋជប៉ុនមួយរូប បានប្រកាសថា ការបង្ខំអោយមានពេស្យាចា គឺតែងតែកើតឡើងក្នុងប្រទេសមានសង្គ្រាមជានិច្ច។ ពាក្យពេចន៍អស់នេះបានធ្វើអោយចិននិងកូរ៉េខាងត្បូងផ្ទុះកំហឹង។ ប្រធានក្រុមហ៊ុនទូរទស្សន៍រូបនោះក៏បានធ្វើការសុំទោសវិញ ប៉ុន្តែបានលើកឡើងថា ពាក្យពេចន៍ដែលបានប្រើនោះគ្រាន់តែបង្ហាញពីការយល់ឃើញផ្ទាល់ខ្លួនគាត់តែប៉ុណ្ណោះ។
ដោយសាររឿងជូរចត់ទាសភាពផ្លូវភេទនេះ ប្រធានាធិបតីកូរ៉េខាងត្បូងប៉ាក់ គុនហឺ បានព្រមានជប៉ុនថា ជប៉ុនអាចនឹងនៅឯកា ប្រសិនបើនៅតែបន្តដើរផ្លូវនេះទៀត។ កូរ៉េខាងត្បូងពិបាកនឹងជឿជាក់ថា ជប៉ុនបានសំដែងការសោកស្តាយចំពោះបញ្ហានេះដោយសុទ្ធចិត្តណាស់។ តាំងពីនាយករដ្ឋមន្ត្រីជប៉ុន ស្ហ៊ីនហ្សូ អាបេ កាន់អំណាចនៅចុងឆ្នាំ២០១២មក គេមិនដែលឃើញមានជំនួបកំពូលរវាងប្រធានាធិបតីកូរ៉េខាងត្បូងប៉ាក់គុនហឺ និងលោកអាបេនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ