គេហដ្ឋានមេដឹកនាំប្រឆាំង អភិសិត វេចាជីវ៉ា រងការផ្ទុះ
នៅប្រទេសថៃ ក្នុងយប់ថ្ងៃអង្គារម្សិលមិញនេះ មានការផ្ទុះមួយបានកើតឡើង នៅគេហដ្ឋានរបស់មេដឹកនាំសកម្មភាពប្រឆាំងរដ្ឋាភិបាលថៃ គឺអតីតនាយករដ្ឋមន្ត្រីថៃ អភិសិត វេចាជីវ៉ា។ ដំបូលផ្ទះមួយភាគ របស់លោកអភិសិត បានរងការបំផ្លាញ ប៉ុន្តែ គ្មានមនុស្សណាម្នាក់រងរបួសនោះទេ។ នៅថ្ងៃពុធនេះដែរ សកម្មភាពបាតុកម្មប្រឆាំងរដ្ឋាភិបាល នៅតែបន្តធ្វើ នៅក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នៅប្រទេសថៃ យប់ថ្ងៃអង្គារម្សិលមិញនេះ ការផ្ទុះកើតឡើងនៅគេហដ្ឋានមេដឹកនាំប្រឆាំងថៃ អភិសិត វេចាជីវ៉ា មិនបានបង្កការខូចខាតអ្វីធំដុំនោះទេ។ មានតែដំបូលផ្ទះមួយចំណែកប៉ុណ្ណោះ ដែលរងការបំផ្លាញ។ យោងតាមប៉ូលិសថៃ ការផ្ទុះនេះមិនមែនបង្កឡើងដោយគ្រាប់បែកទេ។ ប៉ូលិសគិតថា គឺភ្លើងកាំជ្រួចទៅវិញទេ ដែលបង្កអោយមានការផ្ទុះ។
នៅថ្ងៃពុធនេះដែរ អាជ្ញាធរថៃបានប្រាប់ថា ការបាញ់ប្រហារទៅលើក្រុមបាតុករប្រឆាំងរដ្ឋាភិបាលថៃ បានបង្កអោយមានមនុស្សរបួស២នាក់។ រូបភាពទូរទស្សន៍ បានបង្ហាញពីជនមិនស្គាល់អត្តសញ្ញាណមួយរូប ដែលបានបាញ់កាំភ្លើងប្រមាណជាង១០គ្រាប់។
ដោយឡែក នៅថ្ងៃពុធនេះ សកម្មជនប្រឆាំងរដ្ឋាភិបាលលោកស្រីយីងឡាក់ បានបន្តបាតុកម្មរបស់ខ្លួន ដោយបានគំរាមបង្កការរាំងស្ទះ ដល់ទីផ្សារភាគហ៊ុន និងអាកាសយានដ្ឋានជាច្រើនកន្លែង។ ទោះយ៉ាងនេះក្តី គេមិនបានសង្កេតឃើញមានការរាំងស្ទះអ្វីនោះទេ។ ជាង២ខែមកនេះ សកម្មជននៅតែទាមទារអោយរដ្ឋាភិបាលចុះចេញពីតំណែង។ សម្រាប់ពួកគេ លោកស្រីយីងឡាក់ដឹកនាំប្រទេសតាមបែបផែនរបស់អតីតនាយករដ្ឋមន្ត្រី ថាក់ស៊ីន ដែលជាបងប្រុសលោកស្រី។ ដូច្នេះ អំពើពុករលួយនៅតែបន្តមានក្នុងប្រទេសដដែល។
នៅថ្ងៃពុធនេះ តុលាការថៃបានចេញដីកាចាប់ខ្លួនមេដឹកនាំប្រឆាំងមួយរូបទៀត គឺលោក ស៊ូថេប ថូស៊ូបាន ពីបទបង្កការបះបោរ។ លោកស៊ូថេប នៅតែបន្តដឹកនាំក្បួនបាតុកម្មប្រឆាំងរដ្ឋាភិបាល នៅថ្ងៃពុធនេះ។ លោកបានគំរាមចាប់នាយករដ្ឋមន្ត្រីយីងឡាក់ និងរដ្ឋមន្ត្រីជាច្រើនរូប ប្រសិនបើពួកគេទាំងនេះ មិនចុះចេញពីតំណែង ក្នុងប៉ុន្មានថ្ងៃខាងមុខនេះទេ។
លោកស្រី យីងឡាក់ បានទទូចសុំអោយប្រជាជនថៃចូលរួមការបោះឆ្នោតក្នុងពេលខាងមុខ ដើម្បីដោះស្រាយវិបត្តិនយោបាយក្នុងប្រទេស។ នៅថ្ងៃពុធនេះ លោកស្រីបានរៀបចំការប្រជុំមួយ សុំអោយមេដឹកនាំបក្សប្រឆាំង និងមេដឹកនាំក្រុមប្រឆាំងនានា ចូលរួមចរចា លើប្រធានបទស្តីពី លទ្ធភាពលើកថ្ងៃបោះឆ្នោត ទៅពេលក្រោយវិញ។ ប៉ុន្តែ សមាជិកគណៈកម្មការបោះឆ្នោតជាតិ ជាគណៈកម្មការឯករាជ្យបំផុតនោះ បានបដិសេធមិនចូលរួមកិច្ចប្រជុំនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ