ចិននិងឥណ្ឌាធ្វើសមយុទ្ធយោធារួមគ្នា ក្នុងទិសដៅប្រឆាំងភេរវកម្ម
នៅថ្ងៃអង្គារម្សិលមិញនេះ នៅភាគនិរតីប្រទេសចិនក្បែរព្រំដែនជាមួយឥណ្ឌា កងទ័ពចិននិងកងទ័ពឥណ្ឌាបានបើកធ្វើសមយុទ្ធយោធារួមគ្នាមួយ សំរាប់រយៈពេល១០ថ្ងៃ។ ទិសដៅនៃសមយុទ្ធនេះ គឺដើម្បីប្រយុទ្ធប្រឆាំងនឹងអំពើភេរវកម្ម។ ទំនាក់ទំនងរវាងប្រទេសជិតខាងទាំងពីរ ដែលតែងដណ្តើមបូរណភាពតំបន់ហ៊ីម៉ាឡៃយ៉ានោះ បានចាប់ផ្តើមប្រសើរនឹងគ្នាឡើងវិញបន្តិចហើយ ចាប់ពីកំឡុងដើមឆ្នាំ២០១៣មកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
សមយុទ្ធយោធារួមគ្នារវាងកងទ័ពចិននិងកងទ័ពឥណ្ឌា ក្នុងខេត្ត Sichuanភាគនិរតីប្រទេសចិន នៅថ្ងៃអង្គារម្សិលមិញនេះ ធ្វើឡើងសំរាប់រយៈពេល១០ថ្ងៃ ក្នុងទិសដៅប្រយុទ្ធប្រឆាំងអំពើភេរវកម្ម។ ឥណ្ឌាបានបញ្ជូនកងទ័ពខ្លួន១៦២នាក់ មកប្រទេសចិន ដើម្បីធ្វើសមយុទ្ធយោធានេះ។
យោងតាមអ្នកទទួលខុសត្រូវឥណ្ឌា គិតចាប់ពីដើមឆ្នាំមក ទំនាក់ទំនងរវាងចិននិងឥណ្ឌាជាប្រទេសជិតខាងទាំងពីរ បានចាប់ផ្តើមប្រសើរនឹងគ្នាឡើងវិញហើយ។ ហើយបើគិតរវាង៥ឆ្នាំមកនេះ សមយុទ្ធយោធារួមគ្នានៅថ្ងៃអង្គារនេះ បានប្រព្រឹត្តទៅក្នុងបរិយាកាសមួយធូរស្រាល។ គួររំលឹកថា កាលពីខែមុន ចិននិងឥណ្ឌាបានចុះហត្ថលេខាលើកិច្ចព្រមព្រៀងសហប្រតិបត្តិការយោធារួមគ្នាមួយ។ កិច្ចព្រមព្រៀងនេះ មានគោលដៅកាត់បន្ថយភាពតានតឹងក្នុងជម្លោះព្រំដែនរវាងប្រទេសទាំងពីរ។កិច្ចព្រមព្រៀងនេះមានចែងនូវវិធានការសំខាន់ៗ ដើម្បីអោយទំនាក់ទំនងរវាងកងទ័ពចិននិងកងទ័ពឥណ្ឌា បានប្រសើរឡើងវិញ។
គួររំលឹកថា ការចុះហត្ថលេខាលើកិច្ចព្រមព្រៀង បានធ្វើឡើងបន្ទាប់ពីទំនាក់ទំនងរវាងប្រទេសមហាអំណាចទាំងពីរ បានឈានទៅរកភាពតានតឹង ក្នុងកំឡុងខែមេសា និងឧសភា។ បញ្ហានៃភាពតានតឹង គឺជម្លោះដណ្តើមបូរណភាពដែនដីតំបន់ហ៊ីម៉ាឡៃយ៉ានោះឯង។ តំបន់នេះជាកម្មសិទ្ធិស្របច្បាប់របស់ឥណ្ឌា តែចិនក៏ដណ្តើមថាជារបស់ជាតិខ្លួនផងដែរ។ កាលពីថ្ងៃ១៥មេសា កងទ័ពចិនបានចូលទៅតំបន់ហ៊ីម៉ាឡៃយ៉ា បង្កអោយមានភាពតានតឹងជាមួយឥណ្ឌា រហូតដល់ទៅ៣សប្តាហ៍។ ប្រទេសទាំងពីរបានព្យាយាមបន្ធូរបន្ថយបរិយាកាសមកវិញ រហូតសំរេចចេញ នូវសមយុទ្ធយោធារួមគ្នា ដែលប្រព្រឹត្តទៅនៅថ្ងៃអង្គារម្សិលមិញនេះ។ រាប់សិបឆ្នាំមកនេះ ចិននិងឥណ្ឌាតែងតែចរចាគ្នាអំពីបញ្ហាព្រំដែនជានិច្ច តែការចរចាមិនបានផ្តល់លទ្ធផលអ្វីជាក់ស្តែងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ