OIM-HCR៖មានជនអន្តោប្រវេសន៍ ១លាននាក់បានមកដល់អឺរ៉ុបក្នុងឆ្នាំ ២០១៥
ឧត្តមស្នងការដ្ឋានសហប្រជាជាតិទទួលបន្ទុកជនភៀសខ្លួនហៅកាត់ថា HCR និងអង្គការអន្តរជាតិទទួលបន្ទុកជនអន្តោប្រវេសន៍ហៅកាត់ថា OIM បានប្រកាសឲ្យដឹងនៅចន្ទ ទី២២ ធ្នូថា ពេញមួយឆ្នាំ ២០១៥ នេះ មានជនអន្តោប្រវេសន៍ចំនួន ១លាននាក់បានមកដល់ទ្វីបអឺរ៉ុប។ ជនអន្តោប្រវេសន៍ទាំង ១លាននាក់នោះ ភាគច្រើនបានធ្វើដំណើរផ្សងព្រេងឆ្លងកាត់មហាសមុទ្រមេឌីទែរ៉ាណេ។ បើគិតតាំងពីក្រោយសង្រ្គាមលោកលើកទី២ មក នេះជាលំហូរជនអន្តោប្រវេសន៍ដ៏ច្រើនសម្បើមមួយដែលអឺរ៉ុបមិនធ្លាប់ជួបប្រទះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គិតពីត្រឹមថ្ងៃទី១ មករាដល់ថ្ងៃទី២១ ធ្នូ ឆ្នាំ ២០១៥ មានជនអន្តោប្រវេសន៍ចំនួន ៩៧២ ០០០នាក់បានធ្វើដំណើរផ្សងព្រេងឆ្លងកាត់មហាសមុទ្រមេឌីទែរ៉ាណេមកកាន់ទ្វីបអឺរ៉ុប នេះជាតួលេខផ្តល់ដោយឧត្តមស្នងការដ្ឋានសហប្រជាជាតិទទួលបន្ទុកជនភៀសខ្លួន HCR។ ចំណែកអង្គការអន្តរជាតិទទួលបន្ទុកជនអន្តោប្រវេសន៍ OIM បានប៉ាន់ប្រមាណថា មានជាង ៣៤ ០០០នាក់បានធ្វើដំណើរទៅកាន់ប្រទេសប៊ុលហ្ការី និងក្រិចដោយឆ្លងកាត់តាមប្រទេសតួកគី។ ជាសរុប វត្តមានជនអន្តោប្រវេសន៍ក្នុងទ្វីបអឺរ៉ុបមានយ៉ាងច្រើនសម្បើមដែលអឺរ៉ុបមិនដែលស្គាល់ទេ បើគិតតាំងពីក្រោយសង្រ្គាមលោកលើកទី២ នេះជាការបញ្ជាក់បន្ថែមរបស់ OIM។ ក្នុងចំណោមអ្នកដែលបានផ្សងព្រេងតាមផ្លូវសមុទ្រ មាន ៣ ៦៩២នាក់បានស្លាប់ ឬបាត់ខ្លួននៅក្នុងទឹកសមុទ្រ។
សេចក្តីប្រកាសព័ត៌មានរួមគ្នារបស់ HCR និង OIM បានប្រាប់ឲ្យដឹងទៀតថា ក្នុងចំណោមជនអន្តោប្រវេសន៍ដែលបានឆ្លងកាត់តាមមហាសមុទ្រមេឌីទែរ៉ាណេដោយប្រថុយប្រថានឆ្នាំ ២០១៥ មានម្នាក់ក្នុងចំណោមពីរនាក់ ពោលមានកន្លះលាននាក់ជាជនជាតិស៊ីរីដែលបានរត់ភៀសខ្លួនគេចពីសង្រ្គាមស៊ីវិលក្នុងស្រុក។ ចំណែកជនអន្តោប្រវេសន៍ជាជនជាតិអាហ្វហ្កានីស្ថានមានប្រមាណជា ២០% និងជនជាតិអ៊ីរ៉ាក់មាន ៧%។ លោក Antonio Guterres ឧត្តមស្នងការសហប្រជាជាតិទទួលបន្ទុកជនភៀសខ្លួនបានបញ្ជាក់ថា វាជារឿងសំខាន់ណាស់ដែលគេត្រូវដឹងពីការដែលប្រទេសអឺរ៉ុបនីមួយៗយល់ព្រមទទួលយកចំនួនជនភៀសខ្លួន និងជនអន្តោប្រវេសន៍ ព្រោះលោកយល់ឃើញថានៅក្នុងប្រទេសខ្លះ មានផ្ទុះឡើងនូវចលនាប្រឆាំងនឹងជនបរទេស។
ទន្ទឹមគ្នានេះ លោកAntonio បានឆ្លៀតរម្លឹកពីតម្លៃជាសារវន្តរបស់អឺរ៉ុប ដូចការគោរពសិទ្ធិមនុស្ស ការអត់ឱន និងភាពសម្បូរបែប។ ចំណែកលោក William Lacy Swing អគ្គនាយក OIM បានយល់ឃើញថា រឿងចំណាកស្រុកជារឿងមួយដែលគេមិនអាចរារាំងបាន ចាំបាច់ និងជាការចង់បានទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ