វិបត្តអ៊ុយក្រែន៖ការចរចាជួបបរាជ័យ អាវុធផ្ទុះកាន់តែខ្លាំង
ការប្រយុទ្ធតទល់គ្នា រវាងក្រុមឧទ្ទាមផ្តាច់ទឹកដីនិយមរុស្ស៊ី និងយោធារដ្ឋាភិបាលអ៊ុយក្រែន បានបន្តរ៉ាំរ៉ៃ អស់រយៈពេលជាច្រើនខែមកហើយ។ បើទោះណាជាមានការជួបចរចាគ្នា ដើម្បីដាក់ចុះ នូវបទឈប់បាញ់ បណ្តោះអសន្ន ក៏ការព្រមព្រៀងគ្នានេះ មានសុពលភាពមិនបានយូរដែរ។ ក្នុងវេលាយប់ថ្ងៃសៅរ៍ ទី៣១ មករា ឈានចូលព្រឹកថ្ងៃអាទិត្យ ទី១ កុម្ភៈ មានមនុស្សស្លាប់យ៉ាងហោចណាស់ ១៩នាក់ ដែលក្នុងនោះ មាន៦នាក់ ជាប្រជាជនសាមញ្ញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បើទោះបីជា មានការព្រមព្រៀងគ្នា ដាក់អាវុធបណ្តោះអាសន្ន ប៉ុន្តែការបាញ់ផ្លោងដាក់គ្នារវាង កងទាហានរដ្ឋាភិបាលអ៊ុយក្រែន និងក្រុមឧទ្ទាមផ្តាច់ទឹកដីនិយមរុស្ស៊ី នៅភាគខាងកើតអ៊ុយក្រែន មិនត្រឹមតែមិនបានចុះថយប៉ុណ្ណោះទេ ផ្ទុយទៅវិញ គឺវាកាន់តែ មានលក្ខណៈខ្លាំងទៅៗ។ ចំនួនអ្នកស្លាប់ ក្នុងរយៈពេលប៉ុន្មានថ្ងៃនេះ មានចំនួនមិនដែលក្រោម ១០នាក់ទេ។
ជាក់ស្តែង ក្នុងខណៈពេលដែល ការចរចាគ្នា កាលពីថ្ងៃសៅរ៍ទី ៣១ មករា មិនបានផ្តល់ជាលទ្ធផល នៅវេលាយប់ថ្ងៃសៅរ៍ដដែល នេះ មានការបាញ់ប្រហារគ្នា រវាងក្រុមឧទ្ទាម និងទាហាន រដ្ឋាភិបាលអ៊ុយក្រែន ដែលបានសម្លាប់ ជីវិតមនុស្សអស់ ១៩នាក់ ក្នុងនោះ ១៣នាក់ ជាទាហាន និង៦នាក់ផ្សេងទៀត ជាប្រជាជនស្លូតត្រង់។
អង្គការ ដើម្បីសហប្រតិបត្តិការនិងសន្តិសុខអឺរ៉ុប ហៅកាត់ថា OSCE បានចោទដោយចំៗ ទៅលើក្រុមឧទ្ទាមរណបរុស្ស៊ី ថាបានរំលោភ លើកិច្ចព្រមព្រៀងដាក់អាវុធបណ្តោះអាសន្ន ដែលបានចុះហត្ថលេខា នៅក្រុងមីនស្គ៍ កាលពីខែកញ្ញាកន្លងទៅ។ ចំណែក ក្រុមឧទ្ទាមវិញ បានទាមទារសើររើ កិច្ចព្រមព្រៀងនេះឡើងវិញ ហើយថាព្រំដែនដែលបានគូសចែកគ្នាកាន់កាប់ កាលពីខែកញ្ញា ឥឡូវនេះ លែងដូចមុនហើយ ពោលគឺក្រុមឧទ្ទាម បានវាយដណ្តើមបានធំជាងមុន។
ការបាញ់ប្រហារគ្នាដែលកំពុងតែមានសន្ទុះខ្លាំង និងមានមនុស្សស្លាប់កាន់តែច្រើននេះ កើតឡើងក្នុងក្រុងមួយឈ្មោះ ឌឺបាល់ត្សេវ(Debaltsev) ដែលមានប្រជាជនរស់នៅប្រហែល ២ម៉ឺន៥ពាន់នាក់។ បច្ចុប្បន្នក្រុងនេះ គ្មានអគ្គីសនីប្រើប្រាស់ ប្រព័ន្ធទូរគមនាគមន៍ ត្រូវបានកាត់ផ្តាច់ទាំងស្រុង ប្រជាជនជួបការលំបាកជាខ្លាំង ដោយសារតែ អាកាសធាតុត្រជាក់ខ្លាំង។ ក្រុងនេះ មានទួនាទីយុទ្ធសាស្ត្រសំខាន់ណាស់ ព្រោះថា ជាកន្លែងតភ្ជាប់ខ្សែរថភ្លើងរវាង ទីក្រុងដូនែតស្ក៍ និងក្រុងលូហ្គង់ស្ក៍ ដែលជាទីក្រុង ដ៏ធំទាំងពីរ នៃតំបន់ដុងបាស។ តំបន់ដុងបាសនេះហើយ ដែលក្រុមឧទ្ទាមនិយមរុស្ស៊ី ធ្វើការវាយដណ្តើមពីរដ្ឋាភិបាលអ៊ុយក្រែន ដើម្បីបង្កើតជាសាធារណៈរដ្ឋមួយ រណបនឹងសហព័ន្ធរុស្ស៊ី។
អ្នកនាំពាក្យរដ្ឋាភិបាលរុស្ស៊ី ឌីមីទ្រី ប៉េស្កូវ បាននិយាយថា ការចរចគ្នាទើបតែបានបញ្ចប់ ដូច្នេះលទ្ធផល គឺវាមិនទាន់ហុចឲ្យភ្លាមៗទេ។ យ៉ាងណាក៏ដោយ សម្តីរបស់អ្នកនាំពាក្យ របស់រដ្ឋាភិបាលរុស្ស៊ី គឺគ្រាន់តែនិយាយ ឲ្យតែរួចពីមាត់ប៉ុណ្ណោះ។ មានភស្តុតាងជាច្រើន ដែលបង្ហាញថា រុស្ស៊ី នៅតែបន្តបញ្ជូនកម្លាំងទ័ព និងគ្រឿងសព្វាវុធ ចូលទៅជួយក្រុមឧទ្ទាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ