អ៊ុយក្រែន នឹងទទួលបានជំនួយ ១៧,៥ពាន់លានដុល្លារ បន្ថែម
ស្របពេលដែលកិច្ចព្រមព្រៀងទីក្រុងមីនស្គ៍ ស្តីពីការបញ្ចប់ជម្លោះនៅភាគខាងកើត អ៊ុយក្រែន ទើបតែបានចុះហត្ថលេខា នៅថ្ងៃ ១២ កុម្ភៈ មូលនិធិរូបិយវត្ថុអន្តរជាតិ ទើបតែបានបញ្ជាក់ថា ខ្លួនបានសម្រេចផ្តល់កញ្ចប់ប្រាក់ចំនួន ១៧,៥ពាន់លានដុល្លារ បន្ថែមទៀតឲ្យទៅអ៊ុយក្រែន ដើម្បីស្តារសេដ្ឋកិច្ចអ៊ុយក្រែន ឲ្យងើបចេញពីឱនភាព។ តាមរយៈជំនួយនេះ អ៊ុយក្រែនត្រូវសន្យា នឹងប្រឹងប្រែង ធ្វើកំណែទម្រង់ លើគ្រប់វិស័យ ដើម្បីជម្រុញសន្ទុះសេដ្ឋកិច្ច និងរកប្រាក់សងបំណុលគេ។
ចុះផ្សាយនៅថ្ងៃ៖
ស្តាប់ - ០២:១៧
សេចក្តីសង្ឃឹមរបស់អ៊ុយក្រែន មានពន្លឺសន្សឹមៗ ស្របពេលដែលកិច្ចព្រមព្រៀងសន្តិភាព ជាមួយក្រុមឧទ្ទាមនិយមរុស្ស៊ី ត្រូវបានចុះហត្ថលេខា កាលពីថ្ងៃម្សិលមិញ ដោយមានការជ្រោមជ្រែង ពីបារាំង និងអាល្លឺម៉ង់។ រុស្ស៊ីដែលមាន លោកប្រធានាធិបតី ពូទីន ក៏បានចូលរួម ហើយបានទាំងសន្យាទទួលស្គាល់ បូរណភាពទឹកដីរបស់អ៊ុយក្រែនថែមទៀតផង។ ប៉ុន្តែទោះបីជាយ៉ាងណា មិនមែនមានន័យថា ជម្លោះបំបែកទឹកដី ដែលដឹកនាំដោយ ក្រុមឧទ្ទាមនិយមរុស្ស៊ី ត្រូវបាន បញ្ចប់ទាំងស្រុងនោះដែរ។ វាគ្រាន់តែជាការដាក់អាវុធ បណ្តោះអាសន្នតែប៉ុណ្ណោះ។
ដំណឹងល្អមួយទៀតសម្រាប់រដ្ឋាភិបាលអ៊ុយក្រែន គឺមូលនិធិរូបិយវត្ថុអន្តរជាតិ ហៅកាត់ថា FMI បានសម្រេចផ្តល់ប្រាក់កម្ចីបន្ថែមទៀត ឲ្យដល់អ៊ុយក្រែន ចំនួន ១៧,៥ពាន់លានដុល្លារ ក្នុងរយៈពេល ៤ឆ្នាំ។ ជាការពិតណាស់ ទន្ទឹមដែលពិភពលោកជួបនូវវិបត្តិសេដ្ឋកិច្ច យ៉ាងធ្ងន់ធ្ងរ សេដ្ឋកិច្ចរបស់អ៊ុយក្រែន ត្រូវរងការបំផ្លេចបំផ្លាញលើសមួយកម្រិតទៀត ដោយសារតែជម្លោះនៅភាគខាងកើត ដែលបានសម្លាប់ជិវិតមនុស្ស អស់ជាច្រើនពាន់នាក់។ តំបន់ភាគខាងកើតនេះ ជាដង្ហើមឧស្សាហកម្មដ៏សំខាន់របស់អ៊ុយក្រែន។
លោកស្រី Christine Lagarde នាយកមូលនិធិរូបិយវត្ថុអន្តរជាតិ បានមានប្រសាសន៍ថា កម្ចីបន្ថែមនេះ នឹងអនុញ្ញាតឲ្យអ៊ុយក្រែន មានលទ្ធភាពចរចាជាមួយ ម្ចាស់បំណុលឯកជនមួយចំនួន។ សូមបញ្ជាក់ថា បច្ចុប្បន្ននេះ បំណុលរបស់អ៊ុយក្រែន កើនដល់ ៧៣ភាគរយ នៃផលិតផលសរុបក្នុងស្រុក។
ប្រាក់កម្ចីទាំងប៉ុន្មាន ត្រូវធ្វើឡើង ជាថ្នូរជាមួយនឹងកម្មវិធីកំណែទម្រង់ចាំបាច់ ជាច្រើនវិស័យ ដែលអ៊ុយក្រែនត្រូវតែសម្រេចឲ្យបាន។ កន្លងមក កាលពីខែ មេសា ឆ្នាំមុន មូលនិធិរូបិយវត្ថុអន្តរជាតិ ធ្លាប់បានផ្តល់ ប្រាក់កម្ចី ចំនួន ១៧ពាន់លានដុល្លាររួចមកហើយ ប៉ុន្តែទឹកប្រាក់នោះ នៅមិនទាន់គ្រប់តំរូវការ របស់អ៊ុយក្រែនទេ ព្រោះថាចរន្តសេដ្ឋកិច្ចស្ទើរតែទាំងស្រុង ត្រូវបានបំផ្លាញ ដោយសារសង្រ្គាមនៅភាគខាងកើត។
យ៉ាងណាក៏ដោយ រដ្ឋាភិបាលអ៊ុយក្រែនដែលដឹកនាំ ដោយលោក ប៉េត្រូ ប៉ូរ៉ូឆិនកូ បានប្តេជ្ញាចិត្ត
ធ្វើការស្តារសេដ្ឋកិច្ចឡើងវិញ ដោយបានធ្វើកំណែទម្រង់សំខាន់ៗជាច្រើន មានដូចជា កម្មវិធីទប់ស្កាត់អំពើពុករលួយ និងការលួចលុយរដ្ឋ ការរៀបចំឡើងវិញ នូវសហគ្រាសសាធារណៈធំៗរបស់រដ្ឋ ជាដើម។ ជាមួយនឹងប្រាក់កម្ចីថ្មីនេះ អ៊ុយក្រែន នឹងមានកាតព្វកិច្ចបន្ថែមទៀត ដូចជាការកាត់បន្ថយការចំណាយសាធារណៈ កាត់បន្ថយបុគ្គលិករដ្ឋ និងការសើររើរៀបចំឡើងវិញ នូវវិស័យថាមពល។
លោកនាយករដ្ឋមន្រ្តី អ៊ុយក្រែន បាននិយាយថា កម្មវិធីកំណែទម្រង់ទាំងនេះ មានការលំបាកណាស់ ប៉ុន្តែ វាជាការចាំបាច់ ហើយបើសិនជារុស្ស៊ី បញ្ចប់ការឈ្លានពាន មកលើអ៊ុយក្រែន នោះសន្តិភាព និងសេដ្ឋកិច្ចអ៊ុយក្រែន ប្រាកដជា មានពន្លឺឡើងវិញ ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ