ប្រធានសភាជាន់ទាបអង់គ្លេសថា មិនបញ្ជូនអាវុធទៅជួយអ៊ុយក្រែនទេ
ប្រឈមមុខជាមួយវិបត្តិនៅអ៊ុយក្រែន ដែលកំពុងតែធ្លាក់ដុនដាបទៅ ទោះបីជាមានកិច្ចព្រមព្រៀងសន្តិភាព ពីរដងរួចមកហើយ សហគមន៍អន្តរជាតិ កំពុងពិចារណា អំពីថាតើ គួរបញ្ជូនអាវុធ ទៅជួយទាហានរដ្ឋាភិបាល អ៊ុយក្រែន ដែររឺទេ។ ដោយឡែក ប្រធានសភាជាន់ទាបចក្រភពអង់គ្លេស បានបដិសេធថា អង់គ្លេស នឹងមិនបញ្ជូនអាវុធ ទៅជួយអ៊ុយក្រែន ជាដាច់ខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក William Hague អតីតរដ្ឋមន្ត្រីក្រសួងការបរទេសអង់គ្លេស ហើយដែលបច្ចុប្បន្ន ជាប្រធានសភាជាន់ទាប បានមានប្រសាសន៍ឲ្យដឹង នៅថ្ងៃអាទិត្យ ទី ២២ កុម្ភៈថា ចក្រភពអង់គ្លេស នឹងមិនបញ្ជូនជំនួយសព្វាវុធ ទៅជួយកងទ័ពរដ្ឋាភិបាលអ៊ុយក្រែន ក្នុងការទប់ទល់ជាមួយក្រុមឧទ្ទាមទេ។ លោកបន្តថា ការផ្តល់ជំនួយជាអាវុធយុទ្ធភណ្ឌ ទៅជួយភាគីណាមួយក្នុងជម្លោះ ត្រូវតែធ្វើឡើង ដោយប្រយ័ត្នប្រយែង និងគិតគូរឲ្យបានល្អិតល្អន់ ជាទីបំផុត។ លោកបន្ថែមទៀតថា អង់គ្លេសបានផ្តល់ជំនួយជាសម្ភារៈយោធា ធន់ស្រាល ដូចជារថពាសដែកការពារខ្លួន តែអង់គ្លេសមិនត្រូវ ផ្តល់ជំនួយ ជាសព្វាវុធ កាំភ្លើងធំ រឺគ្រាប់មីស៊ីលឡើយ។
លោក Philip Hammond រដ្ឋមន្រ្តី ក្រសួងការបរទេសអង់គ្លេស បច្ចុប្បន្ន ធ្លាប់បានប្រាប់អ្នកកាសែតថា រដ្ឋាភិបាលអង់គ្លេស បានឈរលើគោលជំហរមួយ គឺថាមិនផ្តល់ជំនួយ ជាគ្រឿងសព្វាវុធ ទៅឲ្យនរណាទេ។ ប៉ុន្តែលោកបានបញ្ជាក់ថា ទោះបីជាយ៉ាងណា អង់គ្លេសមានសិទ្ធិ សើរើគោលជំហរនេះឡើងវិញ បើសិនជាមានករណីចាំបាច់។
គួរបញ្ជាក់ផងដែរថា ប្រតិកម្មផ្ទួនៗគ្នា ជុំវិញការផ្តល់ជំនួយសព្វាវុធ ដល់អ៊ុយក្រែន ធ្វើឡើងដោយសារស្ថានភាពនៅអ៊ុយក្រែន មានភាពវិកវរកាន់តែខ្លាំង ហើយការប្រយុទ្ធគ្នា នៅតែបន្ត បើទោះជាមានការព្រមព្រៀងគ្នា ថាឈប់បាញ់ក៏ដោយ។ ការប្រយុទ្ធគ្នាចុងក្រោយនេះ ខាងកងទ័ពអ៊ុយក្រែន បានទទួលរងនូវបរាជ័យ ស្លាប់ច្រើននាក់ ព្រមទាំងបានបាត់បង់ដែនដីបន្ថែមទៀត ចូលទៅក្នុងការកាន់កាប់ របស់ពួកឧទ្ទាមនិយមរុស្ស៊ី។
កាលពីថ្ងៃសៅរ៍ ទី ២១ កុម្ភៈ លោក John Kerry ប្រមុខការទូតអាមេរិក បានធ្វើដំណើរ ទៅទីក្រុងឡុងដ៍ ហើយបានថ្លែងថា រដ្ឋាភិបាលអាមេរិក កំពុងពិចារណា អំពីលទ្ធភាពបញ្ជូនជំនួយសព្វាវុធ ទៅជួយអ៊ុយក្រែន ព្រោះថា រុស្ស៊ីឯណោះ នៅតែបន្តបញ្ជូនអាវុធ ទៅឲ្យពួកឧទ្ទាមយ៉ាងសន្ធឹកសន្ធាប់។ ទោះបីការបញ្ជូនអាវុធ នៅមិនទាន់ជាក់លាក់ យ៉ាងណាក៏ដោយ ក៏បន្តែ លោកបានបញ្ជាក់ថា អ្វីដែលប្រាកដ គឺអាមេរិក នឹងដាក់ទណ្ឌកម្មសេដ្ឋកិច្ច បន្ថែមទៀតលើរុស្ស៊ី។
សូមរលឹកផងដែរថា តាមតួលេខរបស់អង្គការសហប្រជាជាតិ ជម្លោះនៅភាគខាងកើតអ៊ុយក្រែន ជិតមួយឆ្នាំមកនេះ បានសម្លាប់ជីវិតមនុស្ស អស់ប្រមាណជា ៥៧០០នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ