ភេរវកម្មផ្ទួនៗនៅបារាំង ទុយនីស៊ី កូវ៉ែត និងសូម៉ាលីនៅមុនខួប១ឆ្នាំនៃការបង្កើត "រដ្ឋអ៊ីស្លាម"
កាលពីថ្ងៃសុក្រម្សិលមិញ ការវាយប្រហារភេរវកម្មដោយក្រុមអ៊ីស្លាមជ្រុលនិយម បានកើតមានឡើងនៅក្នុងប្រទេស ៤ ផ្សេងគ្នាក្នុងថ្ងៃតែមួយ គឺនៅបារាំង ទុយនីស៊ី កូវ៉ែត និងនៅសូម៉ាលី។ ការវាយប្រហារទាំងនេះទំនងជាមិនជាប់ទាក់ទងគ្នាទាំងអស់នោះទេ ក៏ប៉ុន្តែ ទោះជាយ៉ាងណា វាបានកើតឡើងតែប៉ុន្មានថ្ងៃប៉ុណ្ណោះ មុនខួប១ឆ្នាំនៃការប្រកាសបង្កើត “រដ្ឋអ៊ីស្លាម” ដោយពួកជីហាតនៅអ៊ីរ៉ាក់និងស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ថ្ងៃសុក្រម្សិលមិញ ដែលជាថ្ងៃសុក្រទី២នៃខែបួសរបស់អ្នកកាន់សាសនាអ៊ីស្លាម ត្រូវបានគ្របដណ្តប់ទៅដោយភេរវកម្មបង្ហូរឈាមផ្ទួនៗគ្នា ដែលសុទ្ធតែមានជាប់ពាក់ព័ន្ធនឹងពួកអ៊ីស្លាមជ្រុលនិយម។
នៅបារាំង មនុស្សម្នាក់ត្រូវបានភេរវជនសម្លាប់ដោយកាត់ក្បាល នៅក្នុងការវាយប្រហារទៅលើសហគ្រាសមួយ នៅតំបន់ប៉ែកខាងត្បូងប្រទេស។ នៅទុយនីស៊ី ខ្មាន់កាំភ្លើងម្នាក់បានបើកការបាញ់ប្រហារទៅលើអ្នកទេសចរនៅក្នុងសណ្ឋាគារមួយនៅជាប់មាត់សមុទ្រ បណ្តាលឲ្យមនុស្សយ៉ាងតិច ៣៨នាក់ត្រូវបាត់បង់ជីវិត ក្នុងនោះ ភាគច្រើនជាទេសចរបរទេសមកពីអង់គ្លេស បារាំង អាល្លឺម៉ង់ និងបែលហ្ស៊ិក។ មនុស្ស ២៧នាក់ផ្សេងទៀតត្រូវស្លាប់ក្នុងការវាយប្រហារដោយគ្រាប់បែកទៅលើវិហារសាសនាអ៊ីស្លាមនិកាយស្ហ៊ីអ៊ីត នៅក្នុងប្រទេសកូវ៉ែត។ ចំណែកឯនៅក្នុងប្រទេសសូម៉ាលីវិញ ទាហានជាច្រើននាក់ នៅក្នុងកងកម្លាំងរក្សាសន្តិភាពរបស់សហភាពអាហ្វ្រិក ត្រូវបាត់បង់ជីវិត នៅក្នុងការវាយប្រហារដោយក្រុមឧទ្ទាមអ៊ីស្លាមជ្រុលនិយមសូម៉ាលី ដែលគេហៅថា ក្រុម Shebab។
នៅឯប្រទេសទុយនីស៊ី មួយថ្ងៃក្រោយភេរវកម្ម ទេសចរបរទេសរាប់ពាន់នាក់ត្រូវបានគេជម្លៀសចេញជាបន្តបន្ទាប់ ក្រោយពីគេមើលឃើញថា ភេរវកម្ម កាលពីថ្ងៃសុក្រ គឺធ្វើឡើងដោយមានចេតនាវាយប្រហារទៅលើទេសចរបរទេស។ ក្រុមហ៊ុន Thomson ដែលជាទីភ្នាក់ងារទេសចរណ៍ដ៏ធំមួយរបស់អង់គ្លេសបានប្រកាសឲ្យដឹងថា ខ្លួននឹងបញ្ជូនយន្តហោះចំនួន ១០គ្រឿងឲ្យទៅជម្លៀសអតិថិជនរបស់ខ្លួនប្រមាណជា ២ ៥០០នាក់ ដែលកំពុងស្ថិតនៅក្នុងប្រទេសទុយនីស៊ី។
នៅបារាំងវិញ លោកប្រធានាធិបតីហ្វ្រង់ស័រ ហូឡង់ បានកោះប្រជុំក្រុមប្រឹក្សាការពារជាតិជាលើកទី២ នៅថ្ងៃសៅរ៍នេះ ដើម្បីជជែកអំពីវិធានការទប់ស្កាត់ភេរវកម្ម។ ភេរវកម្មដែលនៅតែអាចកើតមាន បើទោះបីជាមានការរឹតបន្តឹងសន្តិសុខយ៉ាងខ្លាំងនៅពេញផ្ទៃប្រទេសបារាំង ចាប់តាំងពីភេរវកម្មលើកាសែត Charlie Hebdo កាលពីខែមករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ