SwissLeaks៖កាសែតបារំាង « Le Monde » បានបង្ហាញពីប្រតិបត្តិការគេចពន្ធជាលក្ខណៈអន្តរជាតិ
កាសែតក្នុងប្រទេសបារំាងឈ្មោះ « Le Monde » បានចុះផ្សាយជាសាធារណៈនូវលទ្ធផលនៃការស៊ើបអង្កេតអន្តរជាតិមួយដែលគេឲ្យឈ្មោះថា « SwissLeaks »។ លទ្ធផលបានទម្លាយឲ្យដឹងនូវប្រតិបត្តិការលួចពន្ធជាលក្ខណអន្តរជាតិរៀបចំដោយធនាគារអង់គ្លេសឈ្មោះ HSBC តាមរយៈសាខាឯកជនមួយរបស់ខ្លួននៅក្នុងប្រទេសស្វ៊ីសឈ្មោះ HSBC Private Bank។ កាលពីខែមករាកន្លងទៅ កាសែតបារំាង « Le Monde » ទទួលបានបញ្ជីឈ្មោះអតិថិជនទំាងអស់របស់ធនាគារ HSBC ក្នុងប្រទេសស្វ៊ីស ក្នុងនោះ មាន ១០០ ០០០គណនីដែលជាប់ពាក់ព័ន្ធនឹងរឿងលួចពន្ធ។
ចុះផ្សាយនៅថ្ងៃ៖
ប្រតិបត្តិការក្រោមឈ្មោះថា « SwissLeaks » គឺជាប្រតិបត្តិការស៊ើបអង្កេតអន្តរជាតិមួយដើម្បីស្វែងរកអ្នកដែលបានលួចបង្វែរលុយទៅលាក់ទុកកន្លែងផ្សេងក្រៅពីប្រទេសខ្លួនដើម្បីគេចពន្ធ។ ក្នុងរយៈពេល ៦ខែ ដែលកាសែតអន្តរជាតិប្រមាណជា ៦០ បានធ្វើការស្រាវជ្រាវ តាមដានយ៉ាងល្អិតល្អន់ មុននឹងទម្លាយព័ត៌មានដ៏គួរឲ្យភ្ញាក់ផ្អើលពេលនេះ។ យោងតាមកាសែតបារំាង Le Monde ក្នុងចំណោមបញ្ជីអតិថិជនទំាងជាង ១០០ ០០០នាក់ដែលខ្លួនយកបានពីធនាគារ HSBC Private Bank ក្នុងប្រទេសស្វីសនោះ មានសឹងតែគ្រប់ជនជាតិទំាងអស់ ក្នុងនោះមានជនជាតិបារំាងប្រមាណជា ៣ ០០០នាក់ និងមានពី ២ ០០០ ទៅ ៣ ០០០នាក់ជាជនជាតិអាហ្រ្វិក។
យោងតាម Le Monde ការស៊ើបអង្កេតត្រូវបានធ្វើឡើងក្នុងចន្លោះពីថ្ងៃទី៩ វិច្ឆិកា ឆ្នំា ២០០៦ ដល់ថ្ងៃទី៣១ មីនា ឆ្នំា ២០០៧។ ក្នុងរយៈពេលនោះគេបានរកឃើញថា មានទឹកលុយប្រមាណជា ១៨០ ៦០០លានអឺរ៉ូត្រូវបានបង្វែរទៅដាក់នៅក្នុងគណនីរបស់អតិថិជនទំាងជាង ១០០ ០០០នាក់ដោយគ្មានរាយការណ៍ និងគ្មានបញ្ជាក់ពីប្រភពរបស់លុយទំាងនោះ។ ម្យ៉ាងទៀត គេក៏មិនបានដឹងច្បាស់ថា តើលុយទំាងនោះត្រូវបានគេប្រើក្នុងគោលដៅអ្វីច្បាស់លាស់ទេ។ អ្វីដែលគេដឹង ធនាគារ HSBC Private Bank បានបន្តបម្រើសេវាដល់គ្រប់អថិជនដោយមិនរើសមុខ ទោះបីជាមានអតិថិជនខ្លះត្រូវបានអង្គការសហប្រជាជាតិដាក់ក្នុងបញ្ជីជាអ្នកជាប់ពាក់ព័ន្ធក្នុងរឿងរត់ពន្ធអាវុធ រត់ពន្ធត្បូងពេជ្រ ឬមួយក៏អំពើពុករលួយជាដើម។
អ្វីដែលគួរឲ្យភ្ញាក់ផ្អើលខ្លំាងនោះគឺថា អ្នកដែលជាប់ពាក់ព័ន្ធនៅក្នុងរឿងលួចបង្វែរលុយទៅដាក់ក្នុងធនាគារ HSBC Private Bank ក្នុងប្រទេសស្វីសដើម្បីគេចពន្ធនោះ មានតំាងពីមហាក្សត្រ ដូចយ៉ាងមហាក្សត្រមហាម៉េដទី៦ ក្នុងប្រទេសម៉ារ៉ុក ស្តេចអាប់ដាឡាទី២ ក្នុងប្រទេសហ្សកដានី ឥស្សរជននយោបាយជាន់ខ្ពស់ អ្នកជំនួញគ្រាក់ៗ និងពួកតារា រួមទំាងអ្នកបង្ហាញម៉ូដល្បីៗជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ