ជំនួបកំពូល G៧៖អាល្លឺម៉ង់ និងអាមេរិកឯកភាពគ្នាបន្តដាក់គំនាបលើរុស្ស៊ីនៅក្នុងវិបត្តិអ៊ុយក្រែន
ក្រុមប្រទេសមហាអំណាចឧស្សាហកម្មទំាង ៧ប្រទេសហៅកាត់ថា G៧ បានផ្តើមបើកជំនួបកំពូលរបស់ខ្លួនរយៈពេល ២ថ្ងៃ ដោយចាប់ផ្តើមពីថ្ងៃអាទិត្យ ទី៧ មិថុនានេះនៅក្នុងវំាងអែលម៉ូ (Elmau) ស្ថិតក្នុងតំបន់បាវីយែរ (Bavière) ប៉ែកអាស៊ីអាគ្នេយ៍ប្រទេសអាល្លឺម៉ង់។ ក៏ដូចជារៀងរាល់ឆ្នំា ជំនួបកំពូល G៧ នឹងលើកយកប្រធានបទអន្តរជាតិធំៗទៅជជែក។ តែអ្វីជាការកត់សម្គាល់នៅក្នុងជំនួបកំពូលលើកទី៤១ ឆ្នំានេះ គឺអវត្តមានជាលើកទី៣ របស់លោកប្រធានាធិបតីរុស្ស៊ីពូទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៦
កម្មវិធីនៅក្នុងថ្ងៃអាទិត្យ ទី៧ មិថុនាដែលជាថ្ងៃទី១ នៃជំនួបកំពូលបានផ្តើមចេញពីជំនួបទ្វេភាគីរវាងលោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា ម៊ែរកិលជាម្ចាស់ផ្ទះ និងលោកប្រធានាធិបតីអាមេរិកអូបាម៉ា។ លោកស្រីម៊ែរកិលបានទទួលលោកអូបាម៉ានៅក្នុងស្រុកមួយ ដោយមានរៀបចំកម្មវិធីទទួលទានអាហារពេលព្រឹកជាមួយនឹងការចូលរួមរបស់អ្នកស្រុកជិត ២ ០០នាក់។ ការរៀបចំឲ្យមានពិធីនេះឡើងមកពីលោកស្រីម៊ែរកិលចង់បង្ហាញពីភាពស្និទ្ធិស្នាលរវាងថ្នាក់ដឹកនំា និងប្រជាជនសាមញ្ញ។ តែគេក៏មិនត្រូវភ្លេចនិយាយទេថា មានវត្តមានកម្លំាងប៉ូលិស ទាហាន និងកម្លំាងពិសេសសរុបជាង ២០ ០០០នាក់ត្រូវបានគេដាក់ពង្រាយដើម្បីការពារសន្តិសុខនៅក្នុងជំនួបកំពូលនោះ។ ដោយឡែក និងក៏ដូចជារៀងរាល់ឆ្នំា គេឃើញមានការរៀបចំក្បួនបាតុកម្មរបស់ក្រុមអ្នកប្រឆំាងភាវូបនីយកម្មទន្ទឹមពេលនឹងជំនួបកំពូលរបស់ G៧។
បន្ទាប់មកនៅថ្ងៃរសៀលនេះ កិច្ចប្រជុំការងាររបស់ G៧ បានចាប់ផ្តើមនៅក្នុងវំាងអែលម៉ូ (Elmau) ស្ថិតលើកំពូលភ្នំកម្ពស់ជាង ១ ០០០ម៉ែត្រដែលចូលរួមដោយថ្នាក់ដឹកនំាទំាង ៧ប្រទេសជាសមាជិក G៧ គឺអាល្លឺម៉ង់ អាមេរិក កាណាដា បារំាង អ៊ីតាលី អង់គ្លេស និងប្រទេសជប៉ុន។ បន្ទាប់មកទៀតនៅថ្ងៃទី២ នៃជំនួបកំពូលគឺថ្ងៃចន្ទ ទី៨ មិថុនា G៧ នឹងទទួលការរួមពីលោកនាយករដ្ឋមន្រ្តីនៃប្រទេសអ៊ីរ៉ាក់ ព្រមទំាងថ្នាក់ដឹកនំាអាហ្រ្វិកចំនួន ៥រូបផ្សេងទៀត ក្នុងនោះមានប្រធានាធិបតីទុយនីស៊ី និងប្រធានាធិបតីនីហ្សេរីយ៉ា។
របៀបវារៈសំខាន់ៗនៃជំនួបកំពូលឆ្នំានេះ
មានប្រធានបទជាច្រើនដែល G៧ លើកទៅជជែក រួមមាន៖
-បញ្ហាការឡើងកំដៅនៅក្នុងភពផែនដី។
-វិបត្តិប្រាក់បំណុលនៅក្នុងប្រទេសក្រិក វិបត្តិអ៊ុយក្រែនដែលសហគមន៍អន្តរជាតិ និងប្រទេសរុស្ស៊ីកំពុងបន្តដំឡើងសរសៃ ក ដាក់គ្នា។
-យុទ្ធនាការប្រយុទ្ធប្រឆំាងនឹងភេរវនិយមអន្តរជាតិ ពិសេសអង្គការរដ្ឋអ៊ីស្លាមដែលកំពុងបន្តវាតទីនៅក្នុងទឹកដីស៊ីរី និងអ៊ីរ៉ាក់។
-វិបត្តិនយោបាយក្នុងប្រទេសស៊ីរី។
-សំណុំរឿងនុយក្លេអ៊ែរអ៊ីរ៉ង់ បញ្ហានៅតំបន់ដើមបូព៌ារវាងជម្លោះអ៊ីសា្រអែល ប៉ាឡេស្ទីន។
-ការប្រយុទ្ធប្រឆំាងនឹងភាពក្រីក្រ ឬមួយក៏យុទ្ធនាការប្រយុទ្ធប្រឆំាងនឹងភាពអត់ឃ្លាន និងកង្វះអាហារ។
បច្ចុប្បន្ននេះនៅទូទំាងពិភពលោក មានអ្នកអត់ឃ្លាន ឬខ្វះអាហារទទួលទានប្រមាណជា ២ ០០០លាននាក់។ កម្មវត្ថុរបស់ G៧ ពេលនេះ គឺកាត់បន្ថយភាពអត់ឃ្លានឲ្យបាន ៥០០លាននាក់ ចាប់ពីពេលនេះដល់ឆ្នំា ២០៣០។
ក្រៅពីនេះ ប្រទេសអាល្លឺម៉ង់ក្នុងនាមជាម្ចាស់ផ្ទះបានស្នើឲ្យដាក់បញ្ចូលទៅក្នុងរបៀបវារៈនៃជំនួបកំពូលនូវប្រធានបទចំនួនពីរទៀត ទី១ ការឲ្យយុវនារី និងស្រ្តីទទួលបានការអប់រំដ៏ល្អ និងទី២ អនុញ្ញាតឲ្យស្រ្តីទទួលបានតួនាទីជាអ្នកទទួលខុសត្រូវនៅក្នុងរោងចក្រ សហគ្រាស។ ក៏ប៉ុន្តែ និងនៅចំពោះមុខ ប្រធានបទដែលកំពុងគ្របដណ្តប់ខ្លំាងនៅក្នុងជំនួបកំពូល G៧ ឆ្នំានេះ គឺវិបត្តិប្រាក់បំណុលក្នុងប្រទេសក្រិក វិបត្តិអ៊ុយក្រែន យុទ្ធនាការប្រយុទ្ធប្រឆំាងនឹងភេរវនិយមអន្តរជាតិ និងបញ្ហាការឡើងកំដៅនៅក្នុងភពផែនដីដែលប្រទេសបារំាងកំពុងត្រៀមរៀបចំសន្និសីទអន្តរជាតិនៅចុងឆ្នំា ២០១៥ នេះ។
នៅក្នុងជំនួបទ្វេភាគីរវាងលោកស្រីប្រមុខរដ្ឋាភិបាលអាល្លឺម៉ង់អង់ហ្កឺឡា ម៊ែរកិល និងលោកប្រធានាធិបតីអាមេរិកអូបាម៉ានាព្រឹកមិញ លោកអូបាម៉ាបានសម្តែងក្តីបារម្ភចំពោះវិបត្តិប្រាក់បំណុលរបស់ប្រទេសក្រិក និងផលវិបាកចំពោះសេដ្ឋកិច្ចពិភពលោកនៅពេលដែលក្រិកសម្រេចចិត្តចាកចេញពីតំបន់ប្រាក់អឺរ៉ូ។ ទាក់ទងនឹងវិបត្តិអ៊ុយក្រែន លោកស្រីម៊ែរកិល និងលោកអូបាម៉ាបានបង្ហាញពីជំហររួមគ្នាក្នុងការបន្តដាក់គំនាបលើប្រទេសរុស្ស៊ី ពិសេសលើរូបលោកប្រធានាធិបតីពូទីនឲ្យឈប់លូកដៃចូលកិច្ចការផ្ទៃក្នុងរបស់អ៊ុយក្រែន។
អវត្តមានលោកពូទីនអាចជាឧបសគ្គសម្រាប់ដោះស្រាយវិបត្តិមួយចំនួនក្នុងក្នុង
តាមធម្មតា ក្រុមប្រទេសមហាអំណាចឧស្សាហកម្មក្នុងលោកបច្ចុប្បន្នមាន ៨ប្រទេសដែលហៅកាត់ថា G៧។ តែតំាងពីរុស្ស៊ីបានរំលោភយកទឹកដីគ្រីមេរបស់អ៊ុយក្រែនក្នុងខែមីនា ឆ្នំា ២០១៤ មក រុស្ស៊ីក៏ត្រូវបានគេព្យួរពីសមាជិកភាពមកដល់សព្វថ្ងៃ ហើយ G៨ ក៏ត្រូវបានគេហៅថា G៧វិញ។ មួយវិញទៀត នេះជាលើកទី២ ហើយដែលលោកប្រធានាធិបតីរុស្ស៊ីពូទីនបានអវត្តមាននៅក្នុងជំនួបកំពូល G៧។ អវត្តមានរបស់លោកពូទីននៅក្នុងជំនួបកំពូលនេះបានទទួលការរិះគន់ផង និងការគំាទ្រផង។
ក្រុមអ្នករិះគន់បានយល់ឃើញថា អវត្តមានរបស់រុស្ស៊ីនឹងមិនអាចឲ្យពិភពលោកដោះស្រាយបញ្ហាអន្តរជាតិសំខាន់ៗមួយចំនួនបានឡើយ ដូចយ៉ាងវិបត្តិស៊ីរី ឬមួយក៏សំណុំរឿងនុយក្លេអ៊ែរអ៊ីរ៉ង់ជាដើម។ សម្រាប់អ្នកគំាទ្រឲ្យព្យួរជើងលោកពូទីននៅក្នុងជំនួបកំពូល G៧ បានយល់ឃើញថា វាជារឿងចៀសមិនរួច ព្រោះក្នុងនាមជាប្រទេសមហាអំណាចមួយ រុស្ស៊ីត្រូវតែគោរពច្បាប់អន្តរជាតិដែលជាច្បាប់សារវន្តរបស់មនុស្សលោកទូទៅ ពោលមិនត្រូវចូលទៅរំលោភឈ្លនពានប្រទេសផ្សេង ដូចដែលរុស្ស៊ីកំពុងធ្វើទៅលើប្រទេសអ៊ុយក្រែនជិតខាងសព្វថ្ងៃទេ។
យ៉ាងណាក៏ដោយ លោកស្រីប្រមុខរដ្ឋាភិបាលអាល្លឺម៉ង់ម៊ែរកិលបានបញ្ជាក់រួចហើយថា ទ្វារ G៧ នៅតែបើកចំហជានិច្ចដើម្បីទទួលការវិលត្រឡប់វិញរបស់រុស្ស៊ី តែអ្វីៗវាអាស្រ័យទំាងស្រុងលើជំហរ និងជម្រើសរបស់លោកប្រធានាធិបតីពូទីនទាក់ទងនឹងវិបត្តិអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ