រដ្ឋធានីរុស្ស៊ីត្រៀមខ្លួនទទួលក្បួនព្យុហយាត្រាកងទ័ពដ៏សម្បើម
ថ្ងៃនេះ មហាវិថីសង្កាត់កណ្តាលក្រុងម៉ូស្គូត្រូវបានប្រកាសបិទចរាចរណ៍ជាថ្មីសម្រាប់ការសមជើងមួយលើកទៀតនៃក្បួនព្យុហយាត្រាកងទ័ពសែនអធិកអធមដែលនឹងប្រព្រឹត្តទៅនៅលើទីលានក្រហម មុខវិមានក្រេមឡាំងនៅថ្ងៃសៅរ៍ ទី៩ ឧសភា ជាកិត្តិយសដល់ខួបគម្រប់ ៧០ឆ្នាំនៃជ័យជំនះលើរបបណាហ្ស៊ីអាល្លឺម៉ង់។ ប៉ុន្តែ ថ្នាក់ដឹកនាំបស្ចិមលោកដែលពុំព្រមវត្តមានក្នុងពិធីថ្ងៃមុខ ចាត់ទុកព្យុហយាត្រានេះថា ជាការបញ្ចេញសាច់ដុំយោធានៃលោកប្រធានាធិបតីរុស្ស៊ីពូទីន។
ចុះផ្សាយនៅថ្ងៃ៖
ស្តាប់ - ០២:៣០
សឲ្យឃើញពីភាពគគ្រឹកគគ្រេងនៃព្យុហយាត្រានេះ គឺនឹងមានការចូលរួមនៃយោធាដល់ជាង ១៦.០០០នាក់ យានយន្តចម្បាំងប្រភេទប្លែកៗ ១៩៤គ្រឿង យន្តហោះ និងឧទ្ធម្ភាគចក្រ ១៤៣គ្រឿង ព្រមទាំងទាហានមកពី១០ប្រទេសជាមិត្តក្នុងចំនួន ១.៣០០នាក់ បែបយ៉ាងមកពី ចិន ឥណ្ឌា ម៉ុងហ្គោលី ស៊ែរបី និងរដ្ឋឯករាជ្យថ្មីៗនៃអតីតសហភាពសូវៀត។ ក្នុងក្បួនព្យុហយាត្រានេះ ទស្សនិកជននឹងបានឃើញជាលើកទី១ គឺរថក្រោះធុនថ្មីស្រឡាង មានឈ្មោះថា Armata T-14 និងប្រព័ន្ធការពារដែនអាកាសដែលពុំធ្លាប់បង្ហាញជាសាធារណៈឡើយ ហេតុដែលអនុញ្ញាតឲ្យប្រទេសរុស្ស៊ីហ៊ានអះអាងថា ពីមួយឆ្នាំទៅមួយឆ្នាំ មហិទ្ធិរិទ្ធយោធារបស់ខ្លួនត្រូវបានស្តារឡើងវិញជាដរាប។
ប្រាកដណាស់ដែលអស់ទាំងនេះនឹងពុំឃើញផ្ទាល់ភ្នែក ដោយពួកអ្នកដឹកនាំនៃប្រទេសបស្ចិមលោកដែលប្រកែកមិនមកវត្តមាននៅលើទីលានក្រហមក្រុងម៉ូស្គូឡើយ ព្រោះគេបាននាំគ្នាដាក់ទណ្ឌកម្មទល់នឹងរុស្ស៊ីចំពោះការភ្ជាប់យកទឹកដីគ្រីមេផ្តាច់ចេញពីអ៊ុយក្រែន និងចំពោះការគាំទ្ររបស់ក្រុងម៉ូស្គូដល់ពួកឧទ្ទាមផ្តាច់ទឹកដីរុស្ស៊ីនិយមនៅប៉ែកខាងកើតអ៊ុយក្រែន។ ក៏ប៉ុន្តែ តាមដែលវិមានក្រេមឡាំងប្រកាសឲ្យដឹងជាផ្លូវការ នឹងអញ្ជើញមកវត្តមាននៅលើទីលានក្រហម ផ្តល់កិត្តិយសដល់លោកប្រមុខរដ្ឋរុស្ស៊ីពូទីនក្នុងទិវាជ័យជំនះ៩ឧសភា គឺមេដឹកនាំកំពូលៗ បែបយ៉ាង មហាប្រទេសចិន វៀតណាម ឥណ្ឌា គុយបា ចំណែក កូរ៉េខាងជើង គឺ ប្រធានរដ្ឋសភាដែលនឹងជំនួសមុខឲ្យលោកអគ្គមគ្គុទេសក៏ គឹម ជុនអ៊ុន។
ជាសរុប ពីក្នុងចំណោមអ្នកដឹកនាំបរទេស៦៨នាក់ដែលបានទទួលសេចក្តីអញ្ជើញនឹងវត្តមាន គឺតែ២២នាក់ ព្រមទាំងលោកអគ្គលេខាធិការអ.ស.ប. និងលោកស្រីអគ្គនាយិកាអង្គការយូនេស្កូ។ ចំណែកលោកស្រីនាយករដ្ឋមន្ត្រីអាល្លឺម៉ង់ Angela Merkel ទោះបីថ្ងៃ៩ឧសភាមិនវត្តមានក្នុងព្យុហយាត្រានៅលើទីលានក្រហមក្តី ក៏ថ្ងៃទី១០ ឧសភា គាត់នឹងអញ្ជើញមកដាក់កម្រងផ្កាលើផ្នូរទាហានមិនស្គាល់ឈ្មោះ រួមជាមួយលោកប្រធានាធិបតីរុស្ស៊ីផ្ទាល់ ដ្បិតតាមប្រសាសន៍គាត់ ពិតជាចេញពីប្រទេសអាល្លឺម៉ង់តែម្តងដែលមានឆាបឆេះទៅ ភ្លើងសង្គ្រាមលោកលើកទី២។
ដោយហេតុថា សង្គ្រាមនេះបានផ្តាច់ជីវិតពលរដ្ឋសហភាពសូវៀតអស់២៧លាននាក់ឯណោះ បានជាបច្ចុប្បន្ន មតិពលរដ្ឋរុស្ស៊ី ៤២% ចាត់ទុកការប្រារព្ធទិវាខួប៧០ឆ្នាំនៃជ័យជំនះក្នុងសង្គ្រាមនេះថា ជាបុណ្យដែលមានសារៈសំខាន់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ