ម៉ូស្គូត្រៀមបំពេញលក្ខខណ្ឌរបស់ទីភ្នាក់ងារពិភពលោកខាងប្រឆាំងថ្នាំលើកកម្លាំង
រុស្ស៊ីដែលជាប់ចោទក្នុងការចាត់ចែងឲ្យមានទ្រង់ទ្រាយខាងប្រើថ្នាំសម្រាប់លើកកម្លាំងអ្នកកីឡាខ្លួន នៅថ្ងៃពុធម្សិលមិញ កាលដែលនៅសល់២ថ្ងៃទៀត ដល់ពេលអាច ត្រូវគេព្យួរបេក្ខភាពខ្លួន មិនឲ្យចូលរួម ក្នុងការប្រកួតណាក៏ដោយផ្នែកអត្តពលកម្ម ហាក់បីបន្ទន់ ឥរិយាបថទៅវិញ ដោយថ្លែងថាខ្លួនត្រៀមតែងតាំងអ្នកឯកទេសបរទេសតែម្តង ឲ្យដឹកនាំ មន្ទីរពិសោធក្រុងម៉ូស្គូខាងប្រឆាំងការប្រើថ្នាំលើកកម្លាំងកីឡាករដែលនាយកវា ជាជាតិរុស្ស៊ី ទើបលាចេញពីតំណែងទៅ។
ចុះផ្សាយនៅថ្ងៃ៖
ស្តាប់ - ០១:៥៥
ថ្លែងទៅទីភ្នាក់ងារពត៌មានកីឡារុស្ស៊ី ល្ងាចថ្ងៃ១១វិច្ឆិកា លោករដ្ឋមន្ត្រីក្រសួងកីឡារុស្ស៊ី Vitaly Mutko លើកឡើងថា ប្រទេសរុស្ស៊ីយើងខ្ញុំ បើកចំហទាំងស្រុង ហើយក្នុងករណីចាំបាច់ បន្ទាប់ពី ការពិគ្រោះប្តូរយោបល់ ជាមួយ ទីភ្នាក់ងារពិភពលោកខាងប្រឆាំងការប្រើថ្នាំសម្រាប់ លើកកម្លាំងអ្នកកីឡាAMA ថែមទាំងត្រៀមតែងតាំង អ្នកឯកទេសបរទេស ទៅផង ឲ្យដឹកនាំ មន្ទីរពិសោធ ក្រុងម៉ូស្គូខាងប្រឆាំងការប្រើថ្នាំលើកកម្លាំងកីឡាករ។ ថ្ងៃពុធ លោក Mutko ត្រូវចូលរួម ក្នុងកិច្ចប្រជុំមួយ ដែលគេទន្ទឹងចាំយូរមកហើយ រវាង ពួកអ្នកទទួលខុសត្រូវ វិស័យកីឡាជាតិ និងលោកប្រធានាធិបតីពូទីន នៅឯនិវេសនដ្ឋានគាត់ ជាយក្រុង Sochi មាត់សមុទ្រខ្មៅ។
នាយកមន្ទីរពិសោធក្រុងម៉ូស្គូនោះ គឺលោក Grigori Rodtchenkov ជាផ្លូវការ បានលាចេញ ពី តំណែងនេះទៅហើយ កាលពីល្ងាចថ្ងៃអង្គារម្សិលម៉្ងៃ។ គាត់ជា អ្នករងថ្មបាក់មុនគេ ក្នុងវិស័យ កីឡាជាតិ ដោយមកពីរឿងអាស្រូវពុំធ្លាប់មានដូច ពាក់ព័ន្ធនឹង ការចោទប្រកាន់ក្នុងការប្រើ ថ្នាំ លើកកម្លាំងកីឡាកររុស្ស៊ី លាយឡំនិង អំពើពុករលួយ ដែលស៊ីរូងដល់ថ្នាក់លើៗ នៃប្រទេស។ ក្នុងរបាយការណ៍ចេញផ្សាយថ្ងៃចន្ទដើមសប្តាហ៍នេះ ដែលបណ្តាលឲ្យផ្ទុះឡើងជារឿងអាស្រូវ ទីភ្នាក់ងារពិភពលោកខាងប្រឆាំងថ្នាំលើកកម្លាំង AMA បានចោទលោក Rodtchenkov ថា ជាអ្នក ចាត់ចែង ប្រព័ន្ធខាងប្រើថ្នាំលើកកម្លាំងកីឡាកររុស្ស៊ី ដែលរួមក្តោបទាំង ការកំទេចចោល Test ជាវិជ្ជមាន បន្សល់ទុកនៅជាប់នឹងសរីរាង្គកាយកីឡាករ បណ្តាលមកពីការប្រើថ្នាំលើកកម្លាំង។
គឺក្នុងបរិបទនៃក្តីមន្ទិលសង្ស័យជាទូទៅចំពោះប្រទេសរុស្ស៊ី ដែលលោកពូទីន ក្នុងកិច្ចប្រជុំនៅ ក្រុងSochi ជាបុរីធ្លាប់បានទទួលឲ្យប្រព្រឹត្តទៅ កីឡាអូឡាំពិករដូវត្រជាក់ឆ្នាំ២០១៤ គ្រោងលើក ជារបៀបវារៈគឺ បញ្ហារៀបចំពួកអ្នកកីឡារុស្ស៊ី សម្រាប់ទៅប្រកួតក្នុងល្បែងកីឡាអូឡាំពិករដូវក្តៅ ឆ្នាំ២០១៦ នៅប្រទេសប្រេស៊ីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ