ធនាគារជាតិរុស្ស៊ីដំឡើងការបា្រក់ដល់កម្រិតខ្ពស់មិនធ្លាប់មាន
ការដំឡើងនេះបានប្រព្រឹត្តទៅ នៅវេលាម៉ោង១ កណ្តាលអធ្រាត្រយប់មិញ។ មូលហេតុ មកពីពេញមួយថ្ងៃម្សិលមិញ ពេលជួញលើទីផ្សាររូបិយវត្ថុក្រុងម៉ូស្គូ អាត្រាប្រាក់រូប្ល ស្រាប់តែដាំដូងចុះមែនទែន ពុំធ្លាប់មានដូចក្នុងប្រវត្តិរូបិយវត្ថុនេះរបស់ជាតិរុស្ស៊ី។ ហើយទៅទល់ពេលយប់ រឹតតែបន្តចុះទៀត លុះទាល់តែបង្ខំធនាគារជាតិឲ្យដំឡើងពី ១០,៥% រហូតដល់ ១៧%តែម្តង គឺការប្រាក់នៃប្រាក់កម្ចីដែលធនាគារជាតិផ្តល់ទៅក្រុមហ៊ុន និងធនាគារឯកជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
តាមការពន្យល់បំភ្លឺនៃធនាគារជាតិរុស្ស៊ី សេចក្តីសម្រេចដំឡើងការប្រាក់នេះត្រូវបានអនុម័តក្នុងគោលដៅកម្រិតជាចាំបាច់ ការធ្លាក់ចុះយ៉ាងខ្លាំងនៃតម្លៃប្រាក់រូប្ល។ ជាការកត់សម្គាល់ ទើបក្នុងសប្តាហ៍មុនសោះ ធនាគារកណ្តាលរុស្ស៊ីក្នុងផ្ទៃនៃអត្រាប្រាក់រូប្លចេះតែចុះទៅ គឺបានដំឡើងការប្រាក់នេះម្តងទៅហើយ ពី ៩,៥% ដល់ ១០,៥%។ ប៉ុន្តែច្បាស់ជានៅស្ទើរណាស់ ក្រោយពីសង្កេតឃើញបរិយាកាសបោកកញ្ជ្រោលម្សិលមិញនៅលើទីផ្សារជួញរូបិយវត្ថុក្រុងម៉ូស្គូដែលត្រូវមជ្ឈដ្ឋានធុរកិច្ចប្រសិទ្ធិនាមថា ជា “ថ្ងៃចន្ទខ្មៅ”។ តាមសម្តីអ្នកនាំពាក្យផ្លូវការរបស់ប្រធានាធិបតីរុស្ស៊ី លោកឌ្មីទ្រី ពេស្កូវ វិមានក្រេមឡាំងមិនធ្វើអត្ថាធិប្បាយអ្វីណាទេ អំពីវិធានការថ្មីនេះរបស់ធនាគារកណ្តាល។
ដំណឹងស្តីអំពីការដំឡើងការប្រាក់យ៉ាងខ្លាំងតែម្តងបានជះចំហាយវិជ្ជមាន លុះទាល់តែស្រង់អត្រាប្រាក់រូប្លឲ្យស្ទុះឡើងខ្លះៗវិញ គឺថាបើយប់មិញ ១ដុល្លារ ស្មើនឹង ៦៥រូប្លទៅហើយ នោះព្រឹកមិញ វាឡើងដល់១ដុល្លារស្មើនឹង ៦០រូប្លប៉្លាយ ចំណែក ១អឺរ៉ូ ដែលយប់មិញស្មើនឹង ៨១រូប្ល ឯណោះ ក៏រំកិលឡើងស្រឺតៗដល់ ១អឺរ៉ូស្មើនឹង ៧៥រូប្ល។ ជាការកត់សម្គាល់ អត្រាប្រាក់រូប្ល ទាំងទល់នឹងដុល្លារ ទាំងទល់នឹងអឺរ៉ូ គ្រាន់តែក្នុង១”ថ្ងៃចន្ទខ្មៅ” ម្សិលមិញ គឺបានស្រាលទម្ងន់អស់ប្រមាណ ១០%។
អំពីខ្លឹមសារនៃការដំឡើងការប្រាក់ដោយធនាគារកណ្តាលរុស្ស៊ី ចាប់ពីថ្ងៃ១៦ ធ្នូនេះទៅ លោកស៊ែរហ្គៃ ឌូប៊ីនីន ដែលពីឆ្នាំ១៩៩៥ ដល់ ១៩៩៨ ធ្លាប់ធ្វើជាប្រធានធនាគារនេះ ក្នុងសម្ភាសន៍ទៅទីភ្នាក់ងារព័ត៌មានផ្លូវការរុស្ស៊ី ITAR-TASS ថ្លែងថា ការដំឡើងការប្រាក់ គឺក្នុងគោលដៅធ្វើឲ្យខ្វះប្រាក់រូប្លទៅវិញ។ ពីព្រោះធនាគារបន្ថយប្រាក់កម្ចីផ្តល់ទៅក្រុមហ៊ុន និងធនាគារឯកជន ដើម្បីបង្ខំគេឲ្យលក់រូបិយវត្ថុដែលគេមាន បើគេត្រូវការប្រាក់រូប្ល។ ហើយការប្រាក់សោត ដែលគេត្រូវបង់ទៅធនាគារជាតិ គឺខ្ពស់ជាងប្រាក់ចំណេញដែលគេរកបានពីការជួញរូបិយវត្ថុ តាមផ្លូវកេងប្រវ័ញ្ច។ ដូច្នេះ គឺរំសាយចំណង់ពួកគេខ្ចីប្រាក់ពីធនាគារជាតិ។
លោកប្រធានាធិបតីពូទីន ក្នុងសារប្រចាំឆ្នាំថ្លែងទៅកាន់ប្រជាជាតិពេលថ្មីៗបានផ្ទុកផ្តាក់ធនាគារជាតិ និងរដ្ឋាភិបាលឲ្យចាត់វិធានការយ៉ាងដិតដល់ប្រឆាំងពួកកេងប្រវ័ញ្ចបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ