ស៊ីព្រី៖រុស្ស៊ីទទួលបានចំណូលពីការលក់អាវុធច្រើនក្នុងឆ្នាំ ២០១៤
នៅថ្ងៃចន្ទ ទី១៤ ធ្នូនេះ វិទ្យាស្ថានស្រាវជ្រាវសន្តិភាពអន្តរជាតិហៅកាត់ថាស៊ីព្រី (Sipri) ដែលមានមូលដ្ឋានក្នុងទីក្រុងស្តុកខូម ប្រទេសស៊ុយអែតបានប្រាប់ឲ្យដឹងថា ថវិកាបានមកពីការលក់អាវុធក្នុងឆ្នាំ ២០១៤ មានការធ្លាក់ចុះ។ របាយការណ៍របស់ស៊ីព្រីបានបញ្ជាក់ថា ជួនចំពេលដែលថវិកាបានមកពីការលក់អាវុធមានការធ្លាក់ចុះសម្រាប់ក្រុមប្រទេសលោកខាងលិច ថវិកាបានមកពីការលក់អាវុធរបស់ប្រទេសរុស្ស៊ីមានការកើនឡើងយ៉ាងសម្បើមក្នុងឆ្នាំ ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
គិតត្រឹមឆ្នាំ ២០១៤ កន្លងទៅ ចំណូលសរុបបានមកពីការលក់អាវុធរបស់ក្រុមប្រទេសផលិតអាវុធទាំង ១០០ប្រទេសដំបូងមានការធ្លាក់ចុះ ៤ឆ្នាំជាប់គ្នា។ បើគិតតែក្នុងឆ្នាំ ២០១៤ មួយ ចំណូលបានមកពីការលក់អាវុធមានការធ្លាក់ចុះ ១,៥% ពោលទទួលបានចំណូលតែប្រមាណ ៤០១ ០០០លានដុល្លារប៉ុណ្ណោះ នេះបើតាមរបាយការណ៍របស់ស៊ីព្រី។ ជាការប្រៀបធៀប ចំណូលបានមកពីការលក់អាវុធ ៤០១ ០០០លានដុល្លារគឺមានទំហំធំជាង ១០០ដងនៃថវិកាបេសកម្មរក្សាសន្តិភាពរបស់អង្គការសហប្រជាជាតិ។
យោងតាមស៊ីព្រី រោងចក្រ សហគ្រាសផលិតអាវុធដែលមានមូលដ្ឋានក្នុងទឹកដីអាមេរិក និងអឺរ៉ុបបានគ្របដណ្តប់ទីផ្សារអាវុធជាង ៨០%ក្នុងលោក តែមានចំណូលធ្លាក់ចុះចំនួន ៣,២ពិន្ទុក្នុងឆ្នាំ ២០១៤ ធៀបនឹងឆ្នាំ ២០១៣។ ដោយឡែក និងទន្ទឹមនឹងចំណូលបានមកពីការលក់អាវុធធ្លាក់ចុះសម្រាប់ក្រុមប្រទេសលោកខាងលិចនាឆ្នាំ ២០១៤ ពិសេសសកម្មភាពថយចុះរបស់រោងចក្រ សហគ្រាសផលិតអាវុធនៅអឺរ៉ុបខាងលិចនោះ រោងចក្រ សហគ្រាសផលិតអាវុធប្រមាណ ៣៦ផ្សេងទៀតក្នុងលោកកំពុងមានសកម្មភាពយ៉ាងខ្លាំង ដោយទទួលបានកំណើន ២៥%។ អ្នកដែលទទួលបានផលចំណេញខ្លាំងជាងគេ គឺប្រទេសរស្ស៊ីដែលចំណូលបានកើនជិត ៥០%។
អតិថិជនរបស់រុស្ស៊ីសុទ្ធសឹងជាប្រទេសសំខាន់ៗ និងគ្រាក់ៗ ដូចយ៉ាងចិន និងឥណ្ឌាដែលកំពុងបង្ហាញសាច់ដុំដាក់គ្នានៅក្នុងតំបន់អាស៊ី។ ក្រៅពីនោះ ប្រទេសស៊ីរីក៏ជាអ្នកទិញអាវុធពីរុស្ស៊ីតាំងពីសម័យសហភាពសូវៀតមកម្ល៉េះ។ តែតាំងពីផ្ទុះវិបត្តិក្នុងឆ្នាំ ២០១១ មក ស៊ីរីមិនមានលទ្ធភាពទិញអាវុធដូចដែលខ្លួនធ្លាប់បានធ្វើនាពេលកន្លងមកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ