គារវកិច្ចចំពោះវិញ្ញាណក្ខន្ធនៃអ្នករងគ្រោះធ្លាក់យន្តហោះ ប្រធានាធិបតីប៉ូឡូញ
មួយសប្ដាហ៍គត់ នៅវេលាម៉ោង ៨ -៥៦នាទី- ដែលយន្តហោះប្រធានាធិបតីប៉ូឡូញ ផ្ទុកទៅដោយអ្នកជិះ ៩៦នាក់បានធ្លាក់ នៅជិតទីក្រុង Smolensk ខាងលិចប្រទេសរុស្ស៊ី។ នៅថ្ងៃសៅរ៍១៧ មេសានេះ-ប្រទេសប៉ូឡូញទាំងមូលសំដែងគារវកិច្ចចំពោះវិញ្ញាណក្ខន្ធ អ្នករងគ្រោះដោយការធ្លាក់យន្តហោះ។
ចុះផ្សាយនៅថ្ងៃ៖
ជួងនៃវិហារសាសនាកាតូលិកនានា នៅទីក្រុងវ៉ាសូវី លាន់ឮសូរជាថ្មី នៅថ្ងៃត្រង់ ដើម្បីកំណត់ការចាប់ផ្តើមពិធីគោរពវិញ្ញាណក្ខន្ធអ្នករងគ្រោះទាំង អស់។
នឹងមានមនុស្សរហូតដល់ចំនួនមួយលាននាក់ឈរ នៅពីមុខទីអាសនៈសក្ការៈកំពស់១០ម៉ែត្រនិងទទឹង៤០ម៉ែត្រ សទាំងអស់ នៅក្នុងក្របខ័ណ្ឌខ្មៅ។ គ្មានការដាក់តាំងក្តារមឈូសទេ ប៉ុន្តែទីកន្លែងត្រូវតែងលម្អទៅដោយរូបភាពធំៗនៃពួកអ្នកទាំងអស់ ដែលបានបាត់បង់ជីវិត នៅក្នុងគ្រោះថ្នាក់ធ្លាក់យន្តហោះ។ មហាជនត្រូវត្រួតពិនិត្យឃ្លាំមើល និងការពារដោយប៉ូលិសជាងមួយពាន់នាក់ និងដោយក្រុមអ្នកជួយសង្គ្រោះជាច្រើននាក់។ ចាប់ពីពាក់កណ្តាលអធ្រាត្រមក រាល់ចរាចរណ៍រថយន្ត នៅកណ្តាលរដ្ឋធានីវ៉ាសូវី ត្រូវហាមប្រាម។ ផ្ទុយទៅវិញ គ្រប់តែយានយន្តដឹកជញ្ជូនរួមជាសាធារណៈឥតយកថ្លៃទេ រីឯខ្សែម៉េត្រូវិញ មានចរាចរណ៍រាល់តែ៣នាទី។
ចាប់ពីម៉ោង ៧ព្រឹកថ្ងៃសោរ៍នេះ សាធារណជនពុំអាចឈរបន្តកន្ទុយគ្នាវែងអន្លាយរហូតដល់វិមាន ប្រធានាធិបតីជាទីដែលគេអាចឈរស្មិងស្មាធិ៍ នៅពីមុខក្តារមឈូសប្រធានាធិបតី និងភរិយារបស់។ គេត្រូវឈរបន្តកន្ទុយគ្នាដប់ម៉ោង ដើម្បីអាចចូលទៅក្នុងវិមានប្រធានាធិបតី នៅពេលដែលក្តារមឈូសប្រធានាធិបតី និងភរិយាត្រូវចាកចេញពីវិមានប្រធានាធិបតី នៅម៉ោង១៧រសៀលថ្ងៃសៅរ៍នេះ ដើម្បីអាចត្រូវដឹកទៅកាន់វិសាលវិហារSaint-Jeanជាទីដែលពិធីmesse តាមសាសនាកាតូលិក យ៉ាងឩឡារិកនឹងបើកពិធីប្រារព្ធបុណ្យសពលោកLech Kaczynski និងលោកជំទាវ Maria ដែលនឹងត្រូវចប់ នៅថ្ងៃអាទិត្យស្អែក នៅទីក្រុងក្រាកូវី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ