ពលរដ្ឋរុស្ស៊ីចូលរួមគោរពវិញ្ញាណក្ឋន្ធសពលោកបូរីស ញ៉េមសូវ តែអាដ៍កំបំាងកំពុងបន្តមាន
នៅប្រទេសរុស្ស៊ី ជិត ៤៨ម៉ោង ក្រោយឃាតកម្មសម្លាប់មេបក្សប្រឆំាងលោកបូរីស ញ៉េមសូវក្នុងកណ្តាលទីក្រុងមូស្គូមក ពីធីដង្ហែរក្បួនគោរពវិញ្ញាណក្ខន្ធសពលោកញ៉េមសូវត្រូវបានរៀបចំនៅថ្ងៃអាទិត្យ ទី១ មីនានេះដោយមានមនុស្សចូលរួមជាច្រើនពាន់នាក់។ រីឯការស៊ើបអង្កេតជុំវិញឃាតកម្មលោកបូរីស ញ៉េមសូវកំពុងបន្តធ្វើ ដោយរដ្ឋអំណាចបានលើកយកសម្មតិកម្មជាច្រើនទៅសិក្សាពិនិត្យ។ ខណៈនេះ រដ្ឋអំណាចបានចាត់ទុកឃាតកម្មសម្លាប់លោកញ៉េមសូវថា ជាការបង្ករឿងដើម្បីទម្លាក់កំហុសដាក់វិមានក្រិមឡំាង ចំណែកក្រុមប្រឆំាងបានចាត់ទុកជាឃាតកម្មនយោបាយ។ យ៉ាងណាក៏ដោយ លោកប្រធានាធិបតីរុស្ស៊ីពូទីនបានប្រកាសក្តែងៗថា លោកនឹងចាត់វិធានការផ្ទាល់ខ្លួនដើម្បីវែកមុខរកក្រុមអ្នករៀបចំ និងចាប់ជនដៃដល់ទៅកាត់ទោស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៦
ក្រុមប្រឆំាងនៅរស្ស៊ីដែលមានរូបលោកបូរីស ញ៉េមសូវម្នាក់ដែរនោះបានគ្រោងរៀបចំក្បួនបាតុកម្មនៅក្នុងទីក្រុងមូស្គូនាថ្ងៃទី១ មីនាថ្ងៃនេះតំាងពីយូរមកហើយ។ គោលដៅពីដំបូងនៃគម្រោងក្បួនបាតុកម្មថ្ងៃទី១ មីនានេះ គឺដើម្បីប្រឆំាងនឹងលោកប្រធានាធិបតីរុស្ស៊ីពូទីនដែលបានលូកដៃចូលជ្រៀតជ្រែកកិច្ចការផ្ទែក្នុងរបស់ប្រទេសអ៊ុយក្រែន។ តែនៅមួយថ្ងៃមុនក្បួនបាតុកម្មឈានមកដល់ ស្រាប់តែលោកបូរីស ញ៉េមសូវត្រូវបានជនមិនស្គាល់មុខបាញ់សម្លាប់នៅកណ្តាលក្រុងមូស្គូស្ថិតមិនឆ្ងាយប៉ុន្មានពីវិមានក្រិមឡំាង។ អ៊ីចឹងហើយបានជាក្បួនបាតុកម្មប្រឆំាងលោកពូទីនថ្ងៃនេះត្រូវបានក្រុមប្រឆំាងប្រែក្លាយទៅជាការដង្ហែក្បួនដើម្បីគោរពវិញ្ញាក្ខន្ធសពលោកបូរីស ញ៉េមសូវ។
ចំនួនមនុស្សចូលរួមនៅក្នុងក្បួនបាតុកម្មក្នុងទីក្រុងមូស្គូត្រូវបានចៅហ្វាយក្រុងអនុញ្ញាតឲ្យមានច្រើនបំផុត ៥០ ០០០នាក់។ តែជាមួយនឹងព្រឹត្តិការណ៍ដ៏សោកសៅពេលនេះ ចំនួនមនុស្សចូលរួមមានច្រើនជាងការអនុញ្ញាត ព្រោះក្បួនដង្ហែថ្ងៃនេះបានចូលរួមពីពលរដ្ឋរុស្ស៊ីគ្រប់លំដាប់ថ្នាក់។ តំាងតែពីថ្ងៃសៅរិ៍ ទី២៨ កុម្ភៈមកដល់ថ្ងៃអាទិត្យ ទី១ មីនានេះ មានប្រជាជនរុស្ស៊ីជារាប់រយពាន់នាក់បាន និងកំពុងបន្តនំាគ្នាទៅដាក់កម្រងផ្កា និងអុជទាននៅលើស្ពានចំទីកន្លែងដែលលោកបូរីស ញ៉េមសូវត្រូវបានគេបាញ់សម្លាប់។ ជាទូទៅ ពលរដ្ឋរុស្ស៊ីបានបញ្ចេញប្រតិកម្មដោយបានចាត់ទុកឃាតកម្មសម្លាប់លោកញ៉េមសូវថា ជាការគំរាមកំហែងលទ្ធិប្រជាធិបតេយ្យ និងក្តីសង្ឃឹមរបស់យុវជនរុស្ស៊ីជំនាន់ក្រោយ។
អ្វីដែលគេដឹងជុំវិញឃាតកម្មសម្លាប់លោកបូរីស ញ៉េមសូវ
ព័ត៌មានជុំវិញឃាតកម្មសម្លាប់លោកបូរីស ញ៉េមសូវមានច្រើន តែអ្វីដែលគួរឲ្យកត់សម្គាល់ខ្លំាងមកដល់ពេលនេះ គឺការបន្តទម្លាក់កំហុសដាក់គ្នារវាងរដ្ឋអំណាច និងក្រុមប្រឆំាង។ នៅខាងរដ្ឋអំណាច គេថាឃាតកម្មសម្លាប់លោកបូរីស ញ៉េមសូវគឺជាឆាកល្ខោនមួយដែលរៀបចំឡើងដោយក្រុមប្រឆំាងគ្នាឯងដើម្បីទម្លាក់កំហុសដាក់រដ្ឋអំណាចក្នុងគោលបំណងបង្កឲ្យមានអស្ថិរភាពក្នុងសង្គមរុស្ស៊ី។ មានក្រុមអ្នកជំនិតនឹងរបបមូស្គូជាច្រើនថែមទំាងបានទម្លាក់កំហុសដាក់កម្លំាងពិសេសអ៊ុយក្រែនដើម្បីបំផុសបំផុលឲ្យមានចលនាប្រឆំាងរុស្ស៊ីកាន់តែខ្លំាងឡើងៗនៅបរទេសទាក់ទងនឹងវិបត្តិអ៊ុយក្រែន។
គួររម្លឹកជូនថាកាលពីប៉ុន្មានឆ្នំាមុននេះ លោកប្រធានាធិបតីរុស្ស៊ីពូទីនធ្លាប់បានប្រមើលទុកពីឃាតកម្មសម្លាប់អ្នកប្រឆំាងណាម្នាក់ដោយអ្នកប្រឆំាងគ្នាឯង។ អ៊ីចឹងហើយបានជានៅប៉ុន្មានម៉ោង ក្រោយឃាតកម្មសម្លាប់លោកញ៉េមសូវ លោកពូទីនបានបញ្ចេញប្រតិកម្មភ្លាមៗដោយចាត់ទុកឃាតកម្មនោះថា ជាការបង្ករឿងដើម្បីទម្លាក់កំហុសដាក់រូបគាត់។ តែក្រុមអ្នកប្រឆំាងបានបដិសេធ ដោយពួកគេបានចាត់ទុកជាឃាតកម្មនយោបាយដើម្បីបំបិទមាត់អ្នកប្រឆំាង។
យ៉ាងណាក៏ដោយ គណៈម្មាធិការស៊ើបអង្កេតរុស្ស៊ីបានបង្ហើបឲ្យដឹងនូវសម្មតិកម្មមួយចំនួន រួមមាន ការរួមគំនិតផ្ទៃក្នុងរបស់បក្សប្រឆំាងដើម្បីទម្លាក់កំហុសដាក់រដ្ឋអំណាច រឿងវិបត្តិអ៊ុយក្រែន រឿងគំនុំក្នុងជីវិតផ្ទាល់ខ្លួនរបស់លោកញ៉េមសូវ ឬមួយក៏ជាប់ទាក់ទងនឹងអ៊ីស្លាមនិយមជ្រុលដែលលោកញ៉េមសូវធ្លាប់បានទទួលការគំរាមសម្លាប់ជាច្រើនដង ដោយសារតែលោកបានចេញមុខគំាទ្រទស្សនាវដ្តីបារំាង Charlie Hebdo បន្ទាប់ពីទស្សនាវដ្តីថ្លុកកំប្លែងមួយនេះបានរងការវាយប្រហារកាលពីដើមខែមករាកន្លងទៅក្នុងទីក្រុងប៉ារីស។
បញ្ជីឈ្មោះឃាតកម្មនយោបាយមានកាន់តែវែងក្នុងអំណាចលោកពូទីន
តំាងពីក្រោយឃាតកម្មសម្លាប់លោកបូរីស ញ៉េមសូវមកដល់ពេលនេះ លោកពូទីនបានប្រកាសក្តែងៗជាសាធារណៈថា លោកគ្មានជាប់ពាក់ព័ន្ធនឹងរឿងឃាតកម្មនោះទេ ព្រមទំាងចាត់ទុកទង្វើនោះថា ជាការបង្ករឿង និងថា រូបលោកផ្ទាល់នឹងចាត់វិធានការវែកមុខរកក្រុមអ្នករៀបចំ និងចាប់ជនដៃដល់ទៅកាត់ទោស។ តែអ្វីដែលគួរឲ្យកត់សម្គាល់នោះគឺថា ឃាតកម្មនយោបាយនៅរុស្ស៊ីក្នុងអំណាចរបស់លោកពូទីនមិនមែនទើបតែកើតមានជាលើកទី១ ទេ។ ក្នុងរយៈពេលប៉ុន្មានឆ្នំាចុងក្រោយនេះ ទង្វើបំភិតបំភ័យ សម្លុតគំរាមកំហែង ចាប់ដាក់គុក និងសម្លាប់អ្នកនយោបាយប្រឆំាង អ្នកកាសែត ព្រមទំាងសកម្មជនការពារសិទ្ធិមនុស្សមានជាហូរហែ។
ជាក់ស្តែង ការសម្លាប់លោកស្រី Natalia Estemirova អ្នកកាសែត និងជាសកម្មជនសិទ្ធិមនុស្សក្នុងខែកក្កដា ឆ្នំា ២០០៩ ឬមួយក៏សម្លាប់អ្នកកាសែតលោកស្រី Anna Politkovskaïa ក្នុងខែតុលា ឆ្នំា ២០០៦ ដោយសារតែលោកស្រីបានបរិហារពីការរំលោភសិទ្ធិមនុស្សនៅឆេឆេនី និងការកាន់អំណាចផ្តាច់ការរបស់លោកពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ