បារាំង-រុស្ស៊ី៖លោកហូឡង់ទៅបញ្ចុះបញ្ចូលលោកពូទីនឲ្យរួមសហការណ៍ប្រឆាំងអង្គការរដ្ឋអ៊ីស្លាម
នៅថ្ងៃព្រហស្បតិ៍ ទី២៦ វិច្ឆិកានេះ លោកប្រធានាធិបតីបារាំងហ្រ្វង់ស័រ ហូឡង់បានបន្តបេសកកម្មការទូតនៅបរទេសក្នុងគោលដៅបង្កើតឲ្យមានសម្ព័ន្ធឯកភាពមួយក្នុងការប្រយុទ្ធប្រឆាំងនឹងអង្គការរដ្ឋអ៊ីស្លាមនៅក្នុងប្រទេសស៊ីរី និងអ៊ីរ៉ាក់។ បន្ទាប់ពីបានទទួលជួបលោកនាយករដ្ឋមន្រ្តីអង់គ្លេសដាវីដ កាមេរ៉ូនក្នុងទីក្រុងប៉ារីស លោកប្រធានាធិបតីអាមេរិកបារ៉ាក់ អូបាម៉ានៅទីក្រុងវ៉ាស៊ីនតោន លោកស្រីនាយករដ្ឋមន្រ្តីអាល្លឺម៉ង់អង់ហ្គេឡា មែរកិលក្នុងទីក្រុងប៉ារីសមក លោកហូឡង់បានទទួលជួបលោកប្រមុខរដ្ឋាភិបាលអ៊ីតាលីម៉ាតេអូ រ៉េនហ្ស៊ីក្នុងទីក្រុងប៉ារីសនៅព្រឹកមិញ មុននឹងទៅជួបលោកប្រធានាធិបតីរុស្ស៊ីវ្ល៉ាឌីមៀរ ពូទីននៅក្នុងទីក្រុងមូស្គូនារសៀលថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៣៣
បេសកកម្មការទូតពេញមួយសប្តាហ៍របស់លោកប្រធានាធិបតីបារាំងហ្រ្វង់ស័រ ហូឡង់បានចាប់ផ្តើមនៅដើមសប្តាហ៍នេះ ពោលជាង ១សប្តាហ៍ក្រោយអំពើភេរវកម្មក្នុងទីក្រុងប៉ារីសដែលបានសម្លាប់មនុស្សអស់ ១៣០នាក់កាលពីថ្ងៃទី១៣ វិច្ឆិកា។ អំពើភេរវកម្មនោះគឺជាស្នាដៃរបស់អង្គការរដ្ឋអ៊ីស្លាមដែលមានមូលដ្ឋាននៅក្នុងប្រទេសស៊ីរី និងអ៊ីរ៉ាក់ ហើយដែលពិភពលោកទំាងមូល រាប់ទាំងរុស្ស៊ីផងបានបញ្ចេញប្រតិកម្មថ្កោលទោសយ៉ាងចាស់ដៃ។ ក្រៅពីបានបង្កើនការវាយប្រហារលើទីតាំង និងរចនាសម្ព័ន្ធរបស់អង្គការរដ្ឋអ៊ីស្លាមនៅក្នុងប្រទេសស៊ីរីតែម្នាក់ឯង បារំាងក៏បានចេញមុខអំពាវនាវអ្នកផ្សេងឲ្យរួមសហការណ៍ដែរ។
គោលដៅរបស់ទីក្រុងប៉ារីស គឺបង្កើតឲ្យមានសម្ព័ន្ធឯកភាពអន្តរជាតិមួយដោយមានការចូលរួមពីប្រទេសមហាអំណាចគ្រាក់ៗ រួមមានអាមេរិក អាល្លឺម៉ង់ អង់គ្លេស ចិន និងរុស្ស៊ី។ នៅក្នុងជំនួបជាមួយលោកនាយករដ្ឋមន្រ្តីអង់គ្លេសដាវីដ កាមេរ៉ូន លោកស្រីនាយករដ្ឋមន្រ្តីអាល្លឺម៉ង់អង់ហ្គេឡា មែរកិល ឬមួយក៏លោកប្រធានាធិបតីអាមេរិកអូបាម៉ា លោកប្រធានាធិបតីបារំាងហូឡង់បានទទួលការគាំទ្រយ៉ាងពេញទី។ តែប្រហែលជាពិបាកបន្តិចជាមួយលោកប្រធានាធិបតីរុស្ស៊ីវ្ល៉ាឌីមៀរ ពូទីន។ ពិតណាស់ថា រុស្ស៊ីក៏បានចាត់ទុកអង្គការរដ្ឋអ៊ីស្លាមជាអង្គការភេរវនិយមដ៏សែនគ្រោះថ្នាក់ចំពោះរុស្ស៊ី និងពិភពលោកទំាងមូលដែរ។
តាំងតែពីដើមខែកញ្ញាមក រុស្ស៊ីបានផ្តើមបើកយុទ្ធនាការផ្លូវអាកាសវាយប្រហារដាច់ដោយឡែករបស់ខ្លួនលើពួកជីហាតអង្គការរដ្ឋអ៊ីស្លាមនៅស៊ីរី។ តែអ្វីដែលសហគមន៍អន្តរជាតិបន្តមានមន្ទិលសង្ស័យ និងកំពុងចោទសួរនោះគឺថា តើអន្តរាគមន៍របស់រុស្ស៊ីនៅស៊ីរី ជាអន្តរាគមន៍វាយប្រហារតែលើសំបុកអង្គការរដ្ឋអ៊ីស្លាម ឬមួយក៏ឆ្លៀតវាយសំពងក្រុមបះបោរស៊ីរីដែលកំពុងប្រឆាំងនឹងរដ្ឋាភិបាលរបស់លោកប្រធានាធិបតីស៊ីរីអាសាដ។ ចូរកុំភ្លេចថា ទីក្រុងមូស្គូបានចេញមុខគាំទ្រលោកអាសាដផ្កាប់មុខ ទំាងផ្លូវយោធា និងការទូត។
អាទិភាពដែលពិភពលោកត្រូវកំចាត់មុនគេ គឺអង្គការរដ្ឋអ៊ីស្លាម
មានចំណុចសំខាន់ចំនួនពីរដែលបារាំង និងរុស្ស៊ីត្រូវតែបង្ហាញឲ្យបានច្បាស់លាស់ពីជំហររបស់ខ្លួន ទី១ គឺទាក់ទងនឹងផ្ទាំងស៊ីបនៃយុទ្ធនាការប្រយុទ្ធប្រឆាំងអង្គការរដ្ឋអ៊ីស្លាមក្នុងទឹកដីស៊ីរី និងចំណុចទី២ គឺទាក់ទងនឹងជោគវាសនាអនាគតនយោបាយរបស់ប្រទេសស៊ីរី។ ស៊ីរីដែលកំពុងផុងខ្លួនយ៉ាងជ្រៅទៅក្នុងសង្រ្គាមស៊ីវិលតំាងពី ៥ឆ្នាំកន្លងមក។ ដូច្នេះឃើញថា ដើម្បីអាចបបួលរុស្ស៊ីឲ្យរួមសហការណ៍នៅក្នុងសម្ព័ន្ធអន្តរជាតិតែមួយប្រឆំាងនឹងអង្គការរដ្ឋអ៊ីស្លាមនៅស៊ីរី និងអ៊ីរ៉ាក់ ប៉ារីស និងមូស្គូត្រូវតែនិយាយគ្នាឲ្យបានដាច់ស្រឡះ និងត្រង់ទៅ ត្រង់មកលើចំណុចទំាងពីរខាងលើ។
បើគេពិនិត្យមើលឲ្យបានស៊ីជ្រៅបន្តិចទៅឃើញថា ចំណុចដែលអាចបន្តជាឆ្អឹងទទឹង ក នៅក្នុងជំនួបរវាងលោកប្រធានាធិបតីបារាំងហូឡង់ និងសមភាគីរុស្ស៊ីលោកពូទីន គឺជោគវាសនារបស់លោកប្រធានាធិបតីស៊ីរីអាសាដ។ លោកអាសាដដែលត្រូវបានលោកពូទីនចេញមុខគាំទ្រពេញទី ដោយបញ្ជាក់ថា លោកអាសាដជាតួអង្គនយោបាយមិនអាចខ្វះបានសម្រាប់ដំណោះស្រាយវិបត្តិស៊ីរី ពោលគឺខុសពីជំហររបស់បស្ចិមលោក រាប់ទំាងបារាំងផងដែលបន្តអះអាងថា គេត្រូវតែកំចាត់លោកអាសាដចេញពីឆាកនយោបាយស៊ីរី។
ក៏ប៉ុន្តែ និងដើម្បីអាចបញ្ចុះបញ្ចូលលោកពូទីនបាន លោកហូឡង់អាចដករឿងលោកអាសាដទុកមួយអន្លើសិន មានន័យថា ត្រូវផ្តល់អាទិភាពតែលើយុទ្ធនាការប្រយុទ្ធប្រឆំាងនឹងអង្គការរដ្ឋអ៊ីស្លាមមួយគត់។ ត្រង់ចំណុចនេះត្រូវបានគេមើលឃើញថា អាចជាយុទ្ធសាស្រ្តមួយដែលរុស្ស៊ីទទួលយកបាន ព្រោះអាទិភាពដែលត្រូវកំចាត់ជាបន្ទាន់នៅចំពោះមុខសម្រាប់បារាំង ក៏ដូចជារុស្ស៊ី និងពិភពលោក មិនមែនបុគ្គលអាសាដទេ តែគឺអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ