បារំាង៖រដ្ឋាភិបាលប្រកាសពីបំណងចង់បង្រ្កាបការជួញដូរ និងការកាន់អាវុធខុសច្បាប់
នៅក្នុងប្រទេសបារំាង រដ្ឋាភិបាល តាមរយៈលោករដ្ឋមន្រ្តីក្រសួងមហាផ្ទៃ Bernard Cazeneuve បានប្រកាសឲ្យដឹងនៅថ្ងៃអាទិត្យ ទី១៣ កញ្ញាពីការត្រៀមខ្លួនចាត់វិធានការបង្រ្កាបរឿងជួញដូរ និងការកាន់អាវុធខុសច្បាប់។ ការប្រកាសរបស់លោក Bernard Cazeneuve បានធ្វើឡើង ប៉ុន្មានម៉ោងក្រោយបន្ទាប់ពីមានការបាញ់ប្រហារមួយនៅក្នុងខេត្តម៉ាកសីដែលបណ្តាលឲ្យមានមនុស្សម្នាក់ស្លាប់ និងរបួស ៥នាក់។ ម៉ាកសី ជាខេត្តដ៏ធំមួយស្ថិតប៉ែកខាងត្បូងប្រទេសបារំាង និងជាខេត្តដែលមានអត្រាឧក្រិដ្ឋកម្មខ្ពស់ជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
នេះមិនមែនជាលើកទី១ ទេដែលខេត្តម៉ាកសីបានក្លាយជាផ្ទំាងស៊ីបនៃការបាញ់ប្រហាររបស់ក្រុមជនប្រដាប់អាវុធដោយសារតែការឈ្លោះគ្នាឯង ឬមួយក៏ជាការជម្រះបញ្ជីនៅក្នុងរឿងគំនំគំគួន។ បន្ទាប់ពីមានការបាញ់ប្រហារជាថ្មីនៅព្រលឹមស្រាងៗថ្ងៃអាទិត្យ ទី១៣ កញ្ញាដោយបានផ្តាច់ជីវិតមនុស្សម្នាក់ និងរបួស ៥នាក់មក លោករដ្ឋមន្រ្តីក្រសួងមហាផ្ទៃ Bernard Cazeneuve បានបញ្ចេញប្រតិកម្មខ្លំាងៗថា ចាប់ពីពេលនេះទៅ ៦សប្តាហ៍ខាងមុខ លោកនឹងស្នើឲ្យមានផែនការចាស់ដៃមួយក្នុងការប្រយុទ្ធប្រឆំាងនឹងការជួញដូរ និងការកាន់អាវុធខុសច្បាប់នៅទូទំាងប្រទេសបារំាង។
គួររម្លឹកជូនថា ការបាញ់ប្រហារដោយប្រើអាវុធសង្រ្គាមនៅក្នុងខេត្តម៉ាកសីនាព្រឹកថ្ងៃអាទិត្យ ទី១៣ កញ្ញាបានកើតមានឡើងនៅផ្លូវចូលពីមុខរង្គសាលមួយ ដោយមនុស្សមួយក្រុមជិះក្នុងឡានបានបើកការបាញ់រះទៅលើហ្វូងមនុស្សដែលកំពុងស្ថិតនៅមុខរង្គសាលនោះ។ លោក Bernard Cazeneuve បានគូសបញ្ជាក់ថា អំពើហិង្សាបាន និងកំពុងកើតមានច្រើន និងញឹកញាប់ណាស់នៅក្នុងខេត្តម៉ាកសី និងថា ការដកហូតអាវុធពីក្រុមឧក្រិដ្ឋជនទំាងនោះនឹងត្រូវពង្រឹងជាចំាបាច់។ យោងតាមលោករដ្ឋមន្រ្តីក្រសួងមហាផ្ទៃ រដ្ឋអំណាចរឹបអូសអាវុធពីក្រុមឧក្រិដ្ឋជនបានជិត ៦ ០០០ដើមជារៀងរាល់ឆ្នំាតំាងពីឆ្នំា ២០១៣ និងថាក្នុងចំណោមអាវុធរឹបអូសបានទំាងជិត ៦ ០០០ដើមនោះ មានជិត ១ ២០០ដើមជាអាវុធសង្រ្គាម។
តាមលទ្ធផលអង្កេតដំបូងឲ្យដឹងថា ការបាញ់ប្រហារនៅព្រឹកថ្ងៃអាទិត្យ ទី១៣ កញ្ញាបានកើតមានឡើង បន្ទាប់ពីមានការឈ្លោះប្រកែកគ្នាយ៉ាងខ្លំាងនៅយប់ថ្ងៃសៅរ៍ ទី១២ កញ្ញារវាងអ្នកយាមរង្គសាល និងមនុស្សមួយក្រុម។ គួររម្លឹកជូនថា ការបាញ់ប្រហារចុងក្រោយនៅខេត្តម៉ាកសីដដែលបានកើតមានឡើងកាលពីថ្ងៃទី៦ សីហាកន្លងទៅ ដោយមានបុរសវ័យ ៥០ឆ្នំាម្នាក់ត្រូវបានជន ២នាក់បាញ់សម្លាប់នៅកណ្តាលផ្លូវមួយដែលអមដោយហាងទំនិញជុំវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ