១០ ឧសភា៖បារំាងប្រារព្ធទិវាជាតិរម្លឹកការចងចំារឿងជួញដូរមនុស្ស និងការលុបបំបាត់ទាសភាព
ថ្ងៃនេះ ទី១០ ឧសភា ឆ្នំា ២០១៥ ជាថ្ងៃដែលបារំាងបានប្រារព្ធទិវាជាតិរម្លឹកការចងចំា និងការលុបបំបាត់ទាសភាព។ នាឱកាសនេះ លោកប្រធានាធិបតីបារំាងហ្រ្វង់ស័រ ហូឡង់ រួមជាមួយទំាងថ្នាក់ដឹកនំានៃប្រទេសអាហ្រ្វិក ព្រមទំាងថ្នាក់ដឹកនំានៃប្រទេសក្នុងតំបន់ការ៉ាអ៊ីបប្រមាណជា ៣០នាក់បានចូលរួមបើកសម្ពោធសារៈមន្ទីរមួយស្តីពីទាសភាព និងការជួញដូរមនុស្ស។ សារៈមន្ទីរនេះត្រូវបានបារំាងសាងសង់នៅ Guadeloupe ដែលជាដែនដីបារំាងនៅឯនាយសមុទ្រ។ លោកប្រមុខរដ្ឋបារំាងបានថ្លែងថា ទង្វើទាសភាពតាមបែបអតីតកាលត្រូវបានលុបបំបាត់ចោលមែន តែបច្ចុប្បន្ននេះ គេឃើញមានលេចឡើងនូវទង្វើទាសភាពតាមបែបសម័យថ្មីដែលទំាងអស់គ្នាត្រូវតែរួមសហការណ៍ប្រយុទ្ធប្រឆំាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៤២
ការជួញដូរមនុស្ស និងទាសភាពដែលប្រព្រឹត្តដោយប្រទេសបារំាងក្នុងនាមជាម្ចាស់អាណានិគមកាលពីអតីតកាលនៅក្នុងប្រទេសមួយចំនួនក្នុងលោក ពិសេសប្រទេសអាហ្រ្វិក គឺជារឿងរ៉ាវប្រវត្តិសាស្រ្តវែងឆ្ងាយ ស្មុគស្មាញ និងដែលបារំាងខ្លួនឯងក៏មិនចង់ក្រើនរម្លឹកដែរ។ តាមពិតទៅ បារំាងបានលុបបំបាត់ទាសភាពតំាងពីឆ្នំា ១៨៤៨ មកម្ល៉េះ ពោលគឺជាង ១សតវត្សកន្លះទៅហើយ តែគឺទើបតែជិត ១៥ឆ្នំាកន្លងទៅថ្មីៗនេះទេ ពោលក្នុងថ្ងៃទី ១០ ឧសភា ឆ្នំា ២០០១ ដែលបារំាងបានប្រកាសទទួលស្គាល់ជាផ្លូវការពីការជួញដូរមនុស្សឆ្លងដែន និងទាសភាពដែលខ្លួនបានប្រព្រឹត្ត ហើយព្រឹទ្ធិសភាបារំាងក៏បានអនុម័តលើច្បាប់មួយហៅថា ច្បាប់ Taubira ដែលទទួលស្គាល់ថា ការជួញដូរមនុស្ស និងទាសភាព គឺជាឧក្រិដ្ឋកម្មប្រឆំាងនឹងមនុស្សជាតិ។ Taubira ជាឈ្មោះរបស់លោកស្រីរដ្ឋមន្រ្តីក្រសួងយុត្តិធម៌បារំាងបច្ចុប្បន្នដែលមានឈ្មោះពេញថា Christiane Taubira។
គេត្រូវរង់ចំានៅ៥ឆ្នំាក្រោយមក ពោលក្នុងខែមករា ឆ្នំា ២០០៦ ទើបបារំាងបានដាក់បញ្ចូលរឿងរ៉ាវអតីតកាលដ៏ស្មុគស្មាញមួយនេះទៅក្នុងការចងចំារបស់ជាតិ។ អ្នកដែលបានសម្រេចចិត្តយកថ្ងៃទី១០ ឧសភា ជាទិវាជាតិរម្លឹកការចងចំាជួញដូរមនុស្ស និងការលុបបំបាត់ទាសភាព គឺលោក Jacques Chirac ក្នុងនាមជាប្រធានាធិបតីបារំាងសម័យនោះ។ បន្តមកទៀត គំនិតផ្តួចផ្តើមនយោបាយមួយនេះក៏ត្រូវបានពង្រីកបន្ថែមតាមរយៈការបង្កើតឲ្យមានគណៈកម្មាធិការមួយចំនួន ដូចជាគណៈកម្មាធិការដើម្បីប្រវត្តិសាស្រ្ត និងការចងចំារឿងទាសភាព។ ក្រៅពីបារំាង ពិភពលោកមានទិវាលុបបំបាត់ទាសភាពដាច់ដោយឡែករបស់ខ្លួន គឺថ្ងៃទី២ ធ្នូ។
លោកហូឡង់ចូលរួមសម្ពោធសារៈមន្ទីរស្តីពីការជួញដូរមនុស្ស និងទាសភាព
នៅថ្ងៃនេះ លោកប្រធានាធិបតីបារំាងដែលកំពុងបន្តទស្សនកិច្ចក្នុងដែនដីបារំាងនៅឯនាយសមុទ្របានចូលរួមសម្ពោធសារៈមន្ទីរមួយស្តីពីការជួញដូរមនុស្ស និងទាសភាព។ សារៈមន្ទីរនោះបានសាងសង់ឡើងនៅក្នុងដែនដី Guadeloupe ដែលជាទឹកដីបារំាងនៅឯនាយសមុទ្រ។ គេត្រូវរង់ចំារហូតដល់ទៅ ១៦៤ឆ្នំាទើបមានសារៈមន្ទីរមួយក្នុងទឹកដីបារំាងដែលឧទ្ទិសពីការជួញដូរមនុស្ស និងទាសភាព។ គួររម្លឹកជូនថា ក្រៅពីបារំាង ក៏នៅមានប្រទេសផ្សេងទៀតដែលជាប់ជំពាក់វាក់វិននឹងរឿងជួញដូរមនុស្ស និងទាសភាពនៅក្នុងអតីតកាល ពិសេសអង់គ្លេស ព័រទុយហ្កាល់ និងអាមេរិក។ តាមស្ថិតិឲ្យដឹងថា ចន្លោះសតវត្សទី១៥ ដល់ទី ១៩ មានប្រជាជនអាហ្រ្វិកពី ៦០០ ០០០ ទៅ ៨០០ ០០០នាក់ត្រូវបានគេដឹកទៅធ្វើជាទាសករនៅអាមេរិកខាងជើង និង ១លាន ៦សែននាក់នៅក្នុងទឹកដីបារំាង ដូចយ៉ាងនៅ Guadeloupe។
ដូច្នេះឃើញថា ជម្រើសទឹកដី Guadeloupe ដើម្បីដាក់តំាងសារៈមន្ទីរមួយដែលឧទ្ទិសពីការជួញដូរមនុស្ស និងទាសភាពនៅក្នុងអតីតកាល គឺជានិមិត្តរូបមួយសំខាន់ណាស់សម្រាប់អ្នកដែលបានជួញដូរមនុស្សឲ្យធ្វើជាទាសករ និងអ្នកដែលត្រូវគេជួញដូរឲ្យធ្វើជាទាសករ។ មួយវិញទៀត វត្តមានរបស់លោកប្រមុខរដ្ឋបារំាងហូឡង់ រួមជាមួយនឹងថ្នាក់ដឹកនំានៃប្រទេសអាហ្រ្វិក ព្រមទំាងថ្នាក់ដឹកនំានៃប្រទេសក្នុងតំបន់ការ៉ាអ៊ីបប្រមាណជា ៣០នាក់នៅក្នុងពិធីសម្ពោធសារៈមន្ទីរថ្ងៃនេះ ក៏ជាកាយវិការមួយដើម្បីចូលរួមកាត់បន្ថយការឈឺចាប់របស់ជនរងគ្រោះដែលពួកគេនឹកស្មានមិនដល់ថា មានថ្ងៃនេះទេ។ អ្វីដែលគេបានដាក់តំាងនៅក្នុងសារៈមន្ទីរនោះរួមមាន សម្ភារៈ រូបភាព និងរូបចម្លាក់ជនជាតិអាហ្រ្វិកដែលត្រូវបានគេជួញដូរឲ្យធ្វើជាទាសករ។
យ៉ាងណាក៏ដោយ លោកហូឡង់បានថ្លែងថា ការប្រយុទ្ធប្រឆំាងនឹងការជួញដូរមនុស្ស និងទាសភាពកំពុងបន្តមានជាប្រចំា។ បើតាមលោកហូឡង់ ការជួញដូរមនុស្ស និងទាសភាពមិនមែនជារឿងរ៉ាវប្រវត្តិសាស្រ្តដែលបានកន្លងផុតទៅបាត់ហើយទេ តែទង្វើទំាងអស់នេះបាន និងកំពុងបន្តមានមកដល់សព្វថ្ងៃដែលលោកហូឡង់ហៅថា ជាការជួញដូរមនុស្ស និងទាសភាពបែបថ្មី។ ឧទាហរណ៍ជាក់ស្តែង ការចាប់ក្មេងស្រីសិស្សសាលានៅអាហ្រ្វិកពីចលនាឧទ្ទាមអ៊ីស្លាមនិយមជ្រុលបូកូអារ៉ាម ការបំពានផ្លូវភេទ ការបង្ខំឲ្យធ្វើការហួសកម្លាំង ការសុំទានគេ ឬមួយក៏ការកេងប្រវ័ញ្ចកម្លំាងអ្នកស៊ីស្នួលនៅតាមផ្ទះជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ