បារាំង៖លោកហូឡង់រម្លឹកពីសន្តិភាពផុយស្រួយ និងសង្រ្គាមនៅជិតបង្កើយ
នៅថ្ងៃពុធ ទី១១ វិច្ឆិកា ប្រទេសបារំាងបានប្រារព្ធពិធីបុណ្យរម្លឹកខួប ៩៧ឆ្នំានៃយុទ្ធសន្តិភាពថ្ងៃទី១១ វិច្ឆិកា ១៩១៨។ ពិធីបុណ្យបានចូលរួមដោយលោកប្រធានាធិបតីបារំាងហ្រ្វង់ស័រ ហូឡង់ រួមទំាងប្រមុខរដ្ឋាភិបាល និងថ្នាក់ដឹកនំារដ្ឋាភិបាលជាច្រើននាក់ផ្សេងទៀត។ តែវត្តមានដែលមិនអាចកំបំាងសាធារណៈជនបារំាងបាន គឺលោកអតីតប្រធានាធិបតីបារំាងនីកូឡា សាកូហ្ស៊ី ប្រធានគណបក្សសាធារណរដ្ឋ។ ថ្លែងនាឱកាសនោះ លោកហូឡង់បានក្រើនរម្លឹកពីសន្តិភាពផុយស្រួយ និងសង្រ្គាមនៅជិតបង្កើយក្នុងលោក ពិសេសសង្រ្គាមដែលកំពុងជម្រុញឲ្យមានលំហូរជនភៀសខ្លួន និងជនអន្តោប្រវេសន៍ក្នុងទ្វីបអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
« មានវត្តមានក្រុមអ្នកជាតិនិយម ក្រុមអ្នកប្រជានិយម ក្រុមអ្នកជ្រុលនិយម របំាង ជញ្ជាំង និងរបងប្រឡាលួស។ គេបានឮសូរសម្លេងផ្សេងៗដែលទំាងអស់នេះបានដាស់អារម្មណ៍ឲ្យយើងនឹកឃើញឡើងវិញនូវរឿងរ៉ាវទំាងឡាយនៅក្នុងអតីតកាល។ ដូច្នេះ យើងត្រូវតែនំាគ្នាចាត់វិធានការជាបន្ទាន់ ពោលមិនត្រូវឈរក្រពាត់ដៃមើលទេ។
យើងកំពុងប្រឈមមុខនឹងស្ថានភាពដ៏លំបាកបំផុតនៅតំបន់មជ្ឈិមបូព៌ា។ បារំាងបានចេញប្រតិបត្តិការតាមរយៈវត្តមានកងទ័ពរបស់ខ្លួននៅទីកន្លែង។ ទន្ទឹមគ្នានេះ បារំាងក៏ត្រូវសម្រេចចិត្តផងដែរពីជោគវាសនារបស់ជនភៀសខ្លួនដោយអនុលោមតាមច្បាប់របស់បារំាង។ បារំាងត្រូវតែធ្វើអ្វីៗគ្រប់យ៉ាងទំាងអស់ដើម្បីឲ្យជនភៀសខ្លួនអាចបន្តស្ថិតមិនឆ្ងាយពីទីកន្លែងកំណើតរបស់ខ្លួន។
ការធ្វើយ៉ាងនេះ គឺដើម្បីរារំាងជនភៀសខ្លួនទំាងនោះកុំឲ្យសម្រុកមកកាន់ទ្វីបអឺរ៉ុបច្រើនជ្រុលដែលយើងមិនអាចទទួលពួកគេឲ្យបានត្រឹមត្រូវ និងក្នុងភាពថ្លៃថ្នូរ។ គឺទំាងអស់នេះហើយដែលយើងត្រូវរម្លឹកជាថ្មីនៅក្នុងពិធីបុណ្យថ្ងៃនេះ។ សន្តិភាពនៅផុយស្រួយខ្លំាងណាស់ ហើយសង្រ្គាមជារឿងមិនអាចចៀសរួច។ សង្រ្គាមកំពុងកើតមានសព្វថ្ងៃរួចទៅហើយ ដោយនៅមិនឆ្ងាយពីយើងប៉ុន្មានទេ នៅអ៊ុយក្រែន នៅមជ្ឈិមបូព៌ា នៅស៊ីរី។
នេះហើយជាអ្វីដែលយើងត្រូវនិយាយ។ ការនិយាយរបៀបនេះមិនមែនត្រឹមតែជាទំនៀមទម្លាប់ប្រពៃណីប៉ុណ្ណោះទេ តែជារឿងដែលគេត្រូវតែរម្លឹកឡើងវិញ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ