លោកហូឡង់ និងលោកស្រីមែរកិលទៅជួបលោកពូទីននៅរុស្ស៊ីដើម្បីស្នើផែនការសន្តិភាពថ្មីសម្រាប់បញ្ចប់វិបត្តិអ៊ុយក្រែន
បន្ទាប់បានជួបលោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូក្នុងទីក្រុងគៀវនៅថ្ងៃព្រហស្បតិ៍ ទី៥ មករាមក លោកប្រធានាធិបតីបារំាងហ្រ្វង់ស័រ ហូឡង់ និងលោកស្រីនាយករដ្ឋមន្រ្តីអាល្លឺម៉ង់អង់ហ្គឺឡា មែរកិលបានទៅជួបលោកប្រធានាធិបតីរុស្ស៊ីពូទីនក្នុងថ្ងៃសុក្រ ទី៦ មករាក្នុងទីក្រុងម៉ុស្គូ។ កម្មវត្ថុរបស់ថ្នាក់ដឹកនំាអឺរ៉ុបទំាងពីររូប គឺបន្តស្វែងរកដំណោះស្រាយដោយសន្តិវិធីឲ្យវិបត្តិអ៊ុយក្រែនដោយស្នើឡើងនូវផែនការសន្តិភាពថ្មីមួយចំពោះលោកពូទីន។ ផែនការសន្តិភាពថ្មីនោះត្រូវបានលោកស្រីមែរកិលថ្លែងឲ្យដឹងថា គឺជាគំនិតផ្តួចផ្តើមបារំាង អាល្លឺម៉ង់ក្នុងគោលដៅការពារសន្តិភាពក្នុងទ្វីបអឺរ៉ុប។
ចុះផ្សាយនៅថ្ងៃ៖
គេនៅមិនទាន់ដឹងថា តើផែនការសន្តិភាពស្នើឡើងដោយបារំាង និងអាល្លឺម៉ង់មានខ្លឹមសារលំអិតអ្វីខ្លះទេ អ្វីដែលគេដឹង គំនិតផ្តួចផ្តើមបារំាង អាល្លឺម៉ង់ពេលនេះទទួលបានការគំាទ្រយ៉ាងពេញទំហឹងពីសហរដ្ឋអាមេរិក និងសហភាពអឺរ៉ុប។ ម្យ៉ាងទៀត មុននឹងលើកយកផែនការសន្តិភាពថ្មីនេះទៅនិយាយជាមួយលោកប្រធានាធិបតីរុស្ស៊ីពូទីនក្នុងថ្ងៃសុក្រ ទី៦ មករា លោកប្រធានាធិបតីបារំាងហ្រ្វង់ស័រ ហូឡង់ និងលោកស្រីនាយករដ្ឋមន្រ្តីអាល្លឺម៉ង់អង់ហ្គឺឡា មែរកិលក៏បានលើកយកទៅនិយាយជាមួយលោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូក្នុងទីក្រុងគៀវនៅថ្ងៃព្រហស្បតិ៍ ទី៥ មករា។
នៅក្រោយជំនួបត្រីភាគីអ៊ុយក្រែន បារំាង និងអាល្លឺម៉ង់អស់ជាច្រើនម៉ោង វិមានប្រធានាធិបតីអ៊ុយក្រែនបានចេញសេចក្តីជូនដំណឹងមួយដោយបង្ហើបឲ្យដឹងថា ផែនការសន្តិភាពថ្មីស្នើឡើងដោយបារំាង និងអាល្លឺម៉ង់អាចនឹងសង្ឃឹមឲ្យមានបទឈប់បាញ់នាពេលខាងមុខ។ តែទន្ទឹមគ្នានេះ លោកប៉ូរ៉ូឆេនកូបានគូសបញ្ជាក់ជាថ្មីថា ភាគីពាក់ព័ន្ធត្រូវតែគោរពកិច្ចព្រមព្រៀងសន្តិភាពនៅក្នុងទីក្រុងមីនស្កិ៍កាលពីខែកញ្ញា ឆ្នំា ២០១៤ ព្រោះបើតាមលោកប្រមុខរដ្ឋអ៊ុយក្រែន គឺជាកិច្ចព្រមព្រៀងតែមួយគត់ដែលបានចុះហត្ថលេខាដោយភាគីអ៊ុយក្រែន និងភាគីក្រុមបះបោរ។ លោកស្រីប្រមុខរដ្ឋាភិបាលអាល្លឺម៉ង់ក៏បានយល់ឃើញដូច្នេះដែរ រីឯលោកប្រមុខរដ្ឋបារំាងបានថ្លែងថា ភាគីនីមួយៗគួរតែដឹងថា ជំហានដំបូង គឺការឈប់បាញ់ និងបន្ទាប់មក ទើបគេអាចអង្គុយចរចាគ្នាដើម្បីស្វែងរកដំណោះស្រាយចុងក្រោយមួយ។
តែនៅចំពោះមុខប្រមុខរដ្ឋរុស្ស៊ីពូទីន លោកហូឡង់ និងលោកស្រីមែរកិលមានការប្រយ័ត្នប្រយែងខ្លំាងដែលនឹងអាចជំនះលោកពូទីនឲ្យទទួលយកនូវផែនការសន្តិភាពថ្មីនោះ។ តាមពិតទៅ សំណើផែនការសន្តិភាពបារំាង អាល្លឺម៉ង់ពេលនេះគ្រាន់តែជាសំណើតបនឹងសំណើផែនការសន្តិភាពរបស់លោកពូទីននារយៈពេលប៉ុន្មានថ្ងៃកន្លងទៅប៉ុណ្ណោះ នេះបើយោងតាមថ្នាក់ដឹកនំារុស្ស៊ី និងអាមេរិក។ យោងតាមព័ត៌មានចុះផ្សាយដោយកាសែតអាល្លឺម៉ង់ និងដែលរដ្ឋាភិបាលអាល្លឺម៉ង់បានច្រានចោលភ្លាមៗឲ្យដឹងថា ផែនការសន្តិភាពបារំាង អាល្លឺម៉ង់អាចនឹងចែងពីការឈប់បាញ់ប្តូរនឹងការផ្តល់ស្វ័យភាពបន្ថែមឲ្យតំបន់របស់ពួកអ្នកទាមទារផ្តាច់ទឹកដីនៅប៉ែកខាងកើតអ៊ុយក្រែន។
យ៉ាងណាក៏ដោយ គេនៅមិនទាន់អាចដឹងពីខ្លឹមសារ និងប្រសិទ្ធិភាពរបស់ផែនការសន្តិភាពថ្មីស្នើឡើងដោយបារំាង និងអាលល្លឺម៉ង់នោះទេ អ្វីដែលគេអាចនិយាយពេលនេះគឺថា ផែនការសន្តិភាពថ្មីនោះអាចជាសំណាងចុងក្រោយសម្រាប់បិទបញ្ចប់ជម្លោះប្រដាប់អាវុធរយៈពេលជិត ១ឆ្នំាកន្លងទៅ ដោយបានសម្លាប់ជីវិតមនុស្សជាង ៥ ៣០០នាក់នៅអ៊ុយក្រែន។ គឺជាជម្លោះមួយដែលបានធ្វើឲ្យគេនឹកឃើញដល់សម័យសង្រ្គាមត្រជាក់រវាងអឺរ៉ុបប៉ែកខាងលិច និងអឺរ៉ុបខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ