ស៊ីរី៖ក្រុមប្រទេសផ្តល់ជំនួយឲ្យស៊ីរីបានទទួលរងការរិះគន់ មុនសន្និសីទចាប់ផ្តើម
នៅថ្ងៃព្រហស្បតិ៍ ទី៤ កុម្ភៈនេះ សន្និសីទអន្តរជាតិនៃក្រុមប្រទេសផ្តល់ជំនួយឲ្យប្រទេសស៊ីរីបើកធ្វើនៅក្នុងទីក្រុងឡុងដ៏ ប្រទេសអង់គ្លសេ។ គោលដៅនៃសន្និសីទគឺប្រមូលប្រាក់ឲ្យបានចំនួន ៩ ០០០លានដុល្លារដែលអង្គការសហប្រជាជាតិត្រូវការចាំបាច់សម្រាប់ជួយជនភៀសខ្លួនស៊ីរី ពិសេសជួយជ្រោមជ្រែងប្រទេសជិតខាងស៊ីរី ដូចយ៉ាងតួកគី លីបង់ និងប្រទេសហ្សកដានី។ តែមុនសន្និសីទចាប់ផ្តើម អង្គការក្រៅរដ្ឋាភិបាលប្រមាណជា ៩០ បានស្តីបន្ទាសប្រទេសខ្លះដែលមិនបានគោរពតាមពាក្យសន្យារបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
បច្ចុប្បន្ននេះ មានប្រជាជនស៊ីរីចំនួន ១៣លាន ៥សែននាក់បានផ្លាស់ប្តូរទីលំក្នុងស្រុកដើម្បីរត់គេចពីតំបន់ជម្លោះ និងមានប្រជាជនស៊ីរីចំនួន ៤លាន ២សែននាក់កំពុងភៀសខ្លួនជ្រកកោណនៅក្នុងប្រទេសជិតខាង ពិសេសមានដល់ទៅ ៤លាននាក់កំពុងជ្រកកោណនៅក្នុងប្រទេសតួកគី លីបង់ និងប្រទេសហ្សកដានី។ ដូច្នេះគោលដៅនៃសន្និសីទអន្តរជាតិនៃក្រុមប្រទេសផ្តល់ជំនួយឲ្យស៊ីរីរៀបចំក្នុងទីក្រុងឡុងដ៏ ប្រទេសអង់គ្លេសថ្ងៃនេះ គឺស្វែងរកថវិកាឲ្យបាន ៩ ០០០លានដុល្លារសម្រាប់ជួយទំនុកបម្រុងប្រជាជនស៊ីរីនៅក្នុងស្រុក និងនៅក្រៅស្រុក។
តែមុននឹងសន្និសីទចាប់ផ្តើម ក្រុមអង្គការក្រៅរដ្ឋាភិបាលប្រមាណជា ៩០ បានរួមប្រជុំគ្នានៅថ្ងៃពុធ ទី៣ កុម្ភៈ ក្នុងទីក្រុងឡុងដ៏ ប្រទេសអង់គ្លេសក្នុងគោលដៅជួយដាស់តឿនក្រុមប្រទេសផ្តល់ជំនួយឲ្យគិតគូរបន្ថែម ពិសេសឲ្យគោរពតាមពាក្យសន្យារបស់ខ្លួន។ ក្រុមអង្គការក្រៅរដ្ឋាភិបាលបានកត់សម្គាល់ឃើញថា នៅឆ្នាំ ២០១៥ កន្លងទៅ អង្គការសហប្រជាជាតិបានអំពាវនាវរកប្រាក់ជំនួយចំនួន ៨ ៤០០លានដុល្លារសម្រាប់ជួយស៊ីរី តែបានទទួលជាក់ស្តែងតែ ៣ ៣០០លានដុល្លារប៉ុណ្ណោះ។
យោងតាមអង្គការ Oxfam ជំនួយដែលក្រុមប្រទេសអ្នកមានបានសន្យាជួយក្នុងឆ្នាំ ២០១៥ កន្លងទៅ មានមិនដល់ពាក់កណ្តាលដូចដែលពួកគេបានសន្យាទេ។ អាល្លឺម៉ង់ ហូឡង់ ស៊ុយអែត និងប្រទេសអង់គ្លេស គឺជាប្រទេសដែលបានបន្តផ្តល់ជំនួយជាហូរហែ តែក្រុមប្រទេសសំខាន់ៗដូចយ៉ាងកាតា អារ៉ាប៊ីសាអូឌីត និងអាមេរិកបែរជានិយាយច្រើន ឲ្យតិចទៅវិញ។ ទន្ទឹមគ្នានេះ ក្រុមអង្គការក្រៅរដ្ឋាភិបាលបានរិះគន់ប្រទេសខ្លះ ដូចយ៉ាងអូស្រ្តាលី បារាំង និងរុស្ស៊ីដែលបានលូកដៃជ្រៅនៅក្នុងជម្លោះនៅស៊ីរី តែលូកដៃរាក់ក្នុងផ្នែកជំនួយមនុស្សធម៌។ ប្រទេសដែលរងការរិះគន់ខ្លាំងជាងគេ គឺរុស្ស៊ីដែលបានជួយតែ ១% ប៉ុណ្ណោះនៅក្នុងចំណែករបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ