ធនាគារកណ្តាលអឺរ៉ុបសុខចិត្តបញ្ចេញលុយជាង ១ ០០០ ០០០លានអឺរ៉ូដើម្បីទិញមូលបត្របំណុលរបស់រដ្ឋសមាជិក
នៅទីបំផុត និងដូចដែលបានគ្រោងទុក ធនាគារកណ្តាលអឺរ៉ុបបានអនុម័តជាផ្លូវការនូវកម្មវិធីមួយដោយប្រមូលទិញមូលបត្របំណុលរបស់រដ្ឋសមាជិកដោយត្រូវចាយប្រាក់អស់ជាង ១ ០០០ ០០០លានអឺរ៉ូ។ នៅក្នុងសន្និសីទកាសែតពីទីស្នាក់ការកណ្តាលរបស់ធនាគារកណ្តាលអឺរ៉ុបក្នុងប្រទេសអាល្លឺម៉ង់ លោកប្រធានធនាគារកណ្តាលអឺរ៉ុប ម៉ារីយ៉ូ ដ្រាហ្គីបានថ្លែងថា នេះជាលើកទី១ ដែលធនាគារកណ្តាលបានអនុម័តនូវនយោបាយរូបិយវត្ថុដ៏ស៊ីជម្រៅមួយ។ ប្រតិកម្មពីទីក្រុងដាវ៉ូស ប្រទេសស្វីស លោកស្រីប្រមុខរដ្ឋាភិបាលអាល្លឺម៉ង់ Merkel បានថ្លែងថា ការសម្រេចចិត្តរបស់ធនាគារកណ្តាលពេលនេះ មិនត្រូវក្លាយជាឧបសគ្គរារំាងលើនយោបាយកំណែទម្រង់របស់រដ្ឋសមាជិកនីមួយៗទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ចាប់ពីខែមីនា ឆ្នំា ២០១៥ នេះទៅដល់ខែកញ្ញា ឆ្នំា ២០១៦ ពោលក្នុងរយៈពេល ១៨ខែ ធនាគារកណ្តាលអឺរ៉ុបនឹងត្រូវចំណាយលុយក្នុងមួយខែៗចំនួន ៦០ ០០០លានអឺរ៉ូដើម្បីទិញមូលបត្របំណុលរបស់ប្រទេសសមាជិក។ ជាសរុបក្នុងរយៈពេល ១៨ខែ ធនាគារកណ្តាលអឺរ៉ុបត្រូវចាយលុយអស់ជាង ១ ០០០ ០០០លានអឺរ៉ូ។ គឺទឹកប្រាក់ជាលុយសុទ្ធជាង ១ ០០០ ០០០លានអឺរ៉ូនេះហើយដែលធនាគារកណ្តាលអឺរ៉ុបនឹងចាក់បញ្ចូលទៅក្នុងទីផ្សារសេដ្ឋកិច្ចក្នុងទ្វីបអឺរ៉ុបទំាងមូល ហើយគឺប្រាក់ជាង ១ ០០០ ០០០លានអឺរ៉ូនេះឯងដែលប្រទេសសមាជិកលក់មូលបត្របំណុលរបស់ខ្លួនទៅឲ្យធនាគារកណ្តាលអឺរ៉ុបអាចយកទៅប្រើប្រាស់ក្នុងគោលដៅផ្តល់សន្ទុះសេដ្ឋកិច្ចឡើងវិញ។
នៅក្នុងសន្និសីទកាសែតពីទីស្នាក់ការកណ្តាលរបស់ធនាគារកណ្តាលអឺរ៉ុបក្នុងប្រទេសអាល្លឺម៉ង់ លោកប្រធានធនាគារកណ្តាលអឺរ៉ុប ម៉ារីយ៉ូ ដ្រាហ្គីបានថ្លែងថា នៅជំហានដំបូង ប្រតិបត្តិការទិញមូលបត្របំណុលរដ្ឋសមាជិក និងក្រុមហ៊ុនឯកជនមួយចំនួនគ្រោងបញ្ឈប់ត្រឹមខែកញ្ញា ឆ្នំា ២០១៦ បន្ទាប់មក គេត្រូវពិនិត្យមើលលើស្ថានភាពជាក់ស្តែងថា តើ គួរ ឬមិនគួរបន្តវិធានការនេះ ព្រោះកម្មវត្ថុរបស់ធនាគារកណ្តាលអឺរ៉ុប គឺស្វែងរកអត្រាកម្រិតអតិផរណាមិនឲ្យក្រោម ឬមួយក៏លើសពី ២% ខ្លំាងពេក។ ទន្ទឹមគ្នានេះ លោកដ្រាហ្គីក៏បានប្រាប់ថា ធនាគារកណ្តាលអឺរ៉ុបនឹងមិនបញ្ចុះអត្រាការប្រាក់នំាមុខរបស់ខ្លួនឲ្យទាបជាង ០,០៥% ដែលកំពុងមានសព្វថ្ងៃនេះទេ។ រីឯប្រតិបត្តិការប្រមូលទិញមូលបត្របំណុលរដ្ឋសមាជិក និងក្រុមហ៊ុនឯកជនមួយចំនួននឹងត្រូវធ្វើឡើងដោយធនាគារកណ្តាលរបស់រដ្ឋសមាជិក ដោយមានជំនួយសហការណ៍ពីធនាគារកណ្តាលអឺរ៉ុប។
អ្នកដែលមានប្រតិកម្មមុនគេ គឺលោកស្រីនាយករដ្ឋមន្រ្តីអាល្លឺម៉ង់ Angela Merkel។ ពីទីក្រុងដាវ៉ូស ប្រទេសស្វីសដែលលោកស្រីទៅចូលរួមវេទិកាសេដ្ឋកិច្ចពិភពលោក លោកស្រី Merkel បានថ្លែងដោយព្រមានថា អ្វីដែលធនាគារកណ្តាលអឺរ៉ុបបានសម្រេចពេលនេះមិនត្រូវក្លាយជាឧបសគ្គចូលទៅបង្អាក់គម្រោងកំណែទម្រង់ដែលរដ្ឋសមាជិកនីមួយៗកំពុងធ្វើដោយខ្លួនឯងនោះទេ។ គួរជម្រាបជូនថា គឺអាល្លឺម៉ង់នេះឯងដែលបានចេញមុខប្រឆំាងនឹងវិធានការរបស់ធនាគារកណ្តាលអឺរ៉ុបខ្លំាងជាងគេ។ យ៉ាងណាក៏ដោយ ការប្រកាសរបស់ធនាគារកណ្តាលអឺរ៉ុបបានធ្វើឲ្យតម្លៃភាគហ៊ុនក្នុងទីផ្សារអឺរ៉ុបឡើងថ្លៃ និងលុយអឺរ៉ូក៏បន្តធ្លាក់ថ្លៃធៀបនឹងប្រាក់ដុល្លារដែលជាសញ្ញាវិជ្ជមានមួយសម្រាប់វិស័យនំាចេញរបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ