អឺរ៉ុបប្រាប់អង់គ្លេសឱ្យមកចរចា ដោយហ្មត់ចត់ ដើម្បីបញ្ចៀស Brexit ដោយគ្មានកិច្ចព្រមព្រៀង
ក្នុងសម័យប្រជុំសភាពេញអង្គអឺរ៉ុប នៅថ្ងៃពុធនេះ អ្នកទទួលខុសត្រូវអឺរ៉ុប បានអំពាវនាវ ឱ្យអង់គ្លេស កុំធ្វើជាមកចរចាដើម្បីបង្គ្រប់កិច្ចឱ្យសោះ។ គ្រោះបំបែកចេញពីអឺរ៉ុប ដោយគ្មានកិច្ចព្រមព្រៀង មានយ៉ាងជាក់ស្តែង ! ហេតុដូច្នេះក្រុងឡុងដ៍ ត្រូវតែមកចរចា ជាមួយសហភាពអឺរ៉ុបឱ្យហ្មត់ចត់ និងបញ្ជាក់ប្រាប់ប្រជាពលរដ្ឋអង់គ្លេសឱ្យបានច្បាស់លាស់អំពីផលវិបាកនៃការចាកចេញពីអឺរ៉ុបដោយគ្មានកិច្ចព្រមព្រៀង។ សភាអឺរ៉ុប បានបញ្ជាក់សាជាថ្មី អំពីជំហរBrexit របស់អឺរ៉ុប មានជាអាទិ៍ បញ្ចៀសការបែកប្រាក់ដោយគ្មានកិច្ចព្រមព្រៀង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ប្រធានគណៈកម្មការអឺរ៉ុប មានសុទិដ្ឋនិយមណាស់ ! លោកបានចាត់ទុកជំនួបជាមួយនាយករដ្ឋមន្ត្រីអង់គ្លេស បូរីស ចនសុន ថ្ងៃពុធនេះ ថាជាជំនួបដ៏វិជ្ជមាននិងប្រកបដោយលក្ខណៈស្ថាបនា។ ទោះបីជាគ្មានលទ្ធផលទាក់ទងនឹងព្រំដែនអៀរឡង់ក៏ដោយ ក៏លោកចាំងគ័រ យល់ថានៅមានលទ្ធភាពរកឃើញកិច្ចព្រមព្រៀងរវាងគ្នា។ ហេតុដូច្នេះហើយបានជាអឺរ៉ុប ចង់ឃើញអង់គ្លេសមកចរចាដោយហ្មត់ចត់។ “ដើរចេញដោយគ្មានកិច្ចព្រមព្រៀង ទំនងជាជម្រើសរបស់រដ្ឋាភិបាលអង់គ្លេស តែមិនមែនជាជម្រើសរបស់អឺរ៉ុបទេ !” នេះជាប្រសាសន៍បន្ថែមរបស់ប្រធានគណៈកម្មការអឺរ៉ុប លោក ហ្សង់ក្លូត ចាំងគ័រ ទៅកាន់អង្គសភា។
អ្នកទទួលបន្ទុកចរចាBrexit របស់អឺរ៉ុប លោក មីស្ហែល បានីញ៉េ វិញ បានព្រមាននាយករដ្ឋមន្ត្រីអង់គ្លេសដោយចំៗថា “ពេលវេលានៅសល់តែ៦សប្តាហ៍ទៀតទេ សូមកុំមកចរចាដើម្បីបង្គ្រប់កិច្ច ! ពលរដ្ឋអង់គ្លេស ក៏ដូចជាពលរដ្ឋអឺរ៉ុបដែរ មានសិទ្ធិដឹងការពិតស្តីអំពីផលវិបាកនៃBrexit ដែលគ្មានកិច្ចព្រមព្រៀង ! ផលវិបាកដែលធ្ងន់ធ្ងរខ្លាំងណាស់”។
ប៉ុន្តែសម្រាប់សមាជិកសភាអង់គ្លេស ជាអ្នកអភិរក្សនិយមគាំទ្រBrexitវិញ ពួកគេបានបន្ទោសអឺរ៉ុបថាចង់ខ្ទាស់អង់គ្លេសឱ្យនៅក្នុងទីផ្សារអឺរ៉ុបរួម។ អង់គ្លេសនៅតែសង្ឃឹមថានឹងអាចចរចាបានលទ្ធផលគ្រាន់បើនៅមុនជំនួបកំពូលអឺរ៉ុបថ្ងៃទី ១៧តុលា ដំណាក់កាលដ៏សំខាន់សម្រាប់សម្រេចកិច្ចព្រមព្រៀងថ្មី។ កិច្ចព្រមព្រៀងថ្មីដែលមិនអាចមានសុពលភាពបាន ដោយគ្មានការអនុម័តពីសភាអឺរ៉ុបឡើយ។
សភាអឺរ៉ុបអាណត្តិថ្មី ដែលទើបផ្តើមការងារ បានបោះឆ្នោត នៅថ្ងៃពុធ គាំទ្រយ៉ាងសន្ធឹកសន្ធាប់សេចក្តីសម្រេចចិត្ត ស្តីពីBrexit។ ក្រុមបក្សនយោបាយធំៗរបស់អឺរ៉ុប លើកលែងតែបក្សស្តាំជ្រុលនិយមចេញ បន្តគាំទ្រជំហររបស់សភាអឺរ៉ុបមុន ដោយត្រូវធ្វើគ្រប់យ៉ាងបញ្ចៀសការបំបែកអង់គ្លេសចេញដោយគ្មានកិច្ចព្រមព្រៀង និង បានអះអាងជាថ្មីនៅក្នុងសេចក្តីសម្រេចចិត្តថា កិច្ចព្រមព្រៀងលើកមុន (ចរចាជាមួយលោកស្រីម៉េ) ល្អត្រឹមត្រូវនិងមានតុល្យភាព ហើយអាចលើកពេលBrexit ជាថ្មីទៀតបានដរាបណាតែមានហេតុផលនិងកម្មវត្ថុសមស្របតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ