បារាំង បង្ហាញច្បាប់កាត់បន្ថយឧស្ម័នផ្ទះកញ្ចក់ប្រកបដោយមហិច្ឆតា តែមិនអាចបញ្ឈប់ការរិះគន់បាន
រដ្ឋាភិបាលបារាំង បានបង្ហាញគម្រោងច្បាប់ថ្មីស្តីពីថាមពលនិងអាកាសធាតុ ដែលមានផែនការកាត់បន្ថយការបញ្ចេញឧស្ម័នផ្ទះកញ្ចក់ នៅឆ្នាំ២០៥០ ឱ្យបាន៦ដងតិចជាងកំរិតឧស្ម័នពុលកាលពីឆ្នាំ១៩៩០។ ប៉ុន្តែការខិតខំប្រឹងប្រែងនេះ មិនគ្រប់គ្រាន់នឹងបំបិទមាត់រិះគន់របស់អ្នកការពារបរិស្ថានបានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
គម្រោងអត្ថបទច្បាប់ ដែលមាន៨មាត្រា ស្នើឡើងដោយរដ្ឋមន្ត្រីក្រសួងបរិស្ថានលោក ហ្វ្រង់ស័រ ដឺ រូហ្ស៊ី (François De Rugy) បានតាក់តែងឡើងក្នុងកម្មវត្ថុ ធ្វើឱ្យស៊ីចង្វាក់គ្នារវាងច្បាប់និងកម្មវត្ថុរបស់ប្រទេសដើម្បីអាកាសធាតុ។
មាត្រាមួយ ផ្តោតទៅលើការខិតខំប្រឹងប្រែងយ៉ាងខ្លាំង ក្នុងការកាត់បន្ថយជាតិកាបូន ពីពេលនេះដល់ឆ្នាំ ២០៥០ ឱ្យបានយ៉ាងហោច ៦ដងតិចជាងបរិមាណនៃជាតិពុល បើប្រៀបទៅឆ្នាំគោល ឆ្នាំ១៩៩០។ ពោលគឺជាវិធានការជាក់ស្តែងប្រសូតចេញពីកិច្ចព្រមព្រៀងអាកាសធាតុ ក្រុងប៉ារីសឆ្នាំ២០១៥។ ប៉ុន្តែមហិច្ឆតានេះគ្មានសក្តានុពលធំធេងដូចអ្វីដែលរដ្ឋាភិបាលធ្លាប់បានព្រលយឱ្យដឹងកាលពីខែធ្នូ នៅក្នុងផែនការយុទ្ធសាស្ត្រជាតិទេ។ កាលណោះបារាំងចង់ប្រើមេចែក៨ដើម្បីកាត់បន្ថយឧស្ម័នផ្ទះកញ្ចក់ឯណោះ។
ចំណុចខ្លាំងមួយទៀតនៃគម្រោងច្បាប់ គឺការកំណត់ពេលពី ឆ្នាំ ២០២៥ទៅ២០៣៥ កម្មវត្ថុកាត់បន្ថយការប្រើប្រាស់ថាមពលអគ្គិសនីបានមកពីនុយក្លេអ៊ែរ មកត្រឹម៥០% ទល់នឹង៧៥%សម្រាប់ពេលបច្ចុប្បន្ននេះ។ នៅឆ្នាំ២០៣០ តម្រូវការប្រើប្រាស់ថាមពលបានមកពីធ្យូងថ្មរបស់បារាំង ក៏នឹងបញ្ចុះ ឱ្យបាន៤០% មិនមែន៣០%ដូចក្នុងគម្រោងច្បាប់អាកាសធាតុឆ្នាំ២០១៥ឡើយ។ នេះបើតាមផ្នែកមួយទៀតនៃគម្រោងច្បាប់។
ជាចុងក្រោយរដ្ឋាភិបាលសង្ឃឹមថា គម្រោងច្បាប់នេះ នឹងត្រូវអនុម័ត ឱ្យបានស្រេចបាច់ យ៉ាងយូរនៅក្នុងសម័យប្រជុំវិសាមញ្ញសភាចុងរដូវក្តៅ ឬដើមរដូវស្លឹកឈើជ្រុះ។
ប៉ុន្តែសម្រាប់អ្នកការពារបរិស្ថាន ថ្វីបើរដ្ឋាភិបាលបារាំង បានប្រឹងបង្កើនកម្មវត្ថុអាកាសធាតុតាមរយៈការបង្កើតច្បាប់មែន តែសកម្មភាពផ្តល់តុល្យការផ្ទុយស្រឡះ។ ក្នុងនាមជា “ជើងឯកការពារផែនដី” របស់អង្គការសហប្រជាជាតិ ប្រធានាធិបតីបារាំងបានរងការរិះគន់យ៉ាងខ្លាំង ដែលមិនបានចាត់វិធានការឱ្យភ្លាមៗដើម្បីអាកាសធាតុ។ ម្យ៉ាងវិញទៀត រដ្ឋាភិបាលបារាំង បានកំណត់កម្មវត្ថុដ៏ខ្លាំងក្លា ក្នុងគម្រោងច្បាប់ ប៉ុន្តែគ្មានបញ្ជាក់អំពីមធ្យោបាយ អំពីវិធានការជាក់ស្តែង ដែលត្រូវធ្វើក្នុងពេលខាងមុខដ៏ខ្លីសោះ។ នេះបើតាមការសម្តីរិះគន់របស់អង្គការបណ្តាញសកម្មភាពអាកាសធាតុ។ សហព័ន្ធអង្គការក្រៅរដ្ឋាភិបាល យល់ថា បារាំងសើរើកម្មវត្ថុឆ្លងអន្តរកាលថាមពល តែមិនបានបើកច្រកបន្ថែមដើម្បីតម្រង់ទិសដៅសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ