ប្រមុខការទូតអឺរ៉ុប៖ក្រុមទំនាក់ទំនងអន្តរជាតិដើម្បីដោះស្រាយវិបត្តិវ៉េណេស៊ុយអេឡានឹងបើកកិច្ចប្រជុំនៅថ្ងៃទី៧ កុម្ភៈ
គំនាបរបស់សហគមន៍អន្តរជាតិលើរបបដឹកនាំរបស់លោកប្រធានាធិបតីវ៉េណេស៊ុយអេឡានីកូឡា ម៉ាឌូរ៉ូកំពុងបន្តមានកាន់តែខ្លាំង។ លោកស្រីហ្វេដេរីកា ម៉ូហ្គេរីនី ប្រមុខការទូតអឺរ៉ុបបានប្រកាសក្នុងថ្ងៃអាទិត្យ ទី៣ កុម្ភៈថា ក្រុមទំនាក់ទំនងអន្តរជាតិដើម្បីដោះស្រាយវិបត្តិនយោបាយនៅវ៉េណេស៊ុយអេឡានឹងរៀបចំកិច្ចប្រជុំលើកទី១ របស់ខ្លួននៅថ្ងៃទី៧ កុម្ភៈខាងមុខក្នុងទីក្រុងម៉ុងតេវីដេអូ ប្រទេសអ៊ុយរូហ្គាយ។ គម្រោងរៀបកិច្ចប្រជុំលើកទី១ របស់ក្រុមទំនាក់ទំនងអន្តរជាតិបានធ្វើឡើង ក្នុងពេលដែលមានប្រទេសកាន់តែច្រើនឡើងៗបានបន្តដកការគាំទ្រចំពោះលោកម៉ាឌូរ៉ូ។ ចំណែកប្រធានាធិបតីអាមេរិកលោកដូណាល់ ត្រាំបានព្រមានត្រង់ៗជាថ្មីថា អន្តរាគមន៍យោធាទម្លាក់លោកម៉ាឌូរ៉ូក៏ជាជម្រើសមួយនៅលើតុរបស់លោកដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ក្រុមទំនាក់ទំនងអន្តរជាតិដើម្បីដោះស្រាយវិបត្តិនយោបាយវ៉េស៊ុយអេឡាមួយនេះត្រូវបានប្រកាសបង្កើតឡើងដោយលោកស្រីប្រមុខការទូតអឺរ៉ុបហ្វេដេរីកា ម៉ូហ្គេរីនីកាលពីថ្ងៃទី៣១ មករា។ សមាជិកនៅក្នុងក្រុមទំនាក់ទំនងអន្តរជាតិមានសហភាពអឺរ៉ុប ប្រទេសសមាជិកអឺរ៉ុបចំនួន ៨ប្រទេស គឺអាល្លឺម៉ង់ អេស្ប៉ាញ បារាំង អ៊ីតាលី ព័រទុយហ្កាល់ ហូឡង់ អង់គ្លេស និងប្រទេសស៊ុយអែត បូកនិងប្រទេសនៅអាមេរិកឡាទីនមួយចំនួន រួមមានបូលីវី កូស្តារីកា អេក្វាទ័រ និងប្រទេសអ៊ុយរូហ្កាយ។ ចំណែកកម្មវត្ថុនៃការបង្កើតឲ្យមានក្រុមទំនាក់ទំនងអន្តរជាតិនេះឡើង គឺបង្កើតលក្ខខណ្ឌចាំបាច់មួយចំនួនដើម្បីអនុញ្ញាតឲ្យពលរដ្ឋវ៉េណេស៊ុយអេឡាអាចកំណត់ជោគវាសនាដោយខ្លួនឯងបានតាមរយៈការបោះឆ្នោតសេរី យុត្តិធម៌ និងតម្លាភាព។
តាមប្រមុខការទូតអឺរ៉ុបលោកស្រីហ្វេដេរីកា ម៉ូហ្គេរីនី កិច្ចប្រជុំលើកទី១ របស់ក្រុមទំនាក់ទំនងអន្តរជាតិដើម្បីដោះស្រាយវិបត្តិនយោបាយនៅវ៉េណេស៊ុយអេឡាជាកិច្ចប្រជុំត្រឹមថ្នាក់ក្រសួង ហើយសហភាពអឺរ៉ុប និងប្រទេសអ៊ុយរូហ្កាយជាអ្នករៀបចំរួមគ្នានៅក្នុងទីក្រុងម៉ុងតេវីដេអូ។ ការប្រកាសរៀបចំកិច្ចប្រជុំលើកទី១ របស់ក្រុមទំនាក់ទំនងអន្តរជាតិមួយនេះបានធ្វើឡើង ចំពេលដែលគំនាបអន្តរជាតិលើលោកប្រធានាធិបតីវ៉េណេស៊ុយអេឡានីកូឡា ម៉ាឌូរ៉ូកំពុងបន្តមានកាន់តែខ្លាំងឡើងៗពីមួយថ្ងៃទៅមួយថ្ងៃ។ សមាជិកអឺរ៉ុប ៦ប្រទេសមានអាល្លឺម៉ង់ អេស្ប៉ាញ បារាំង ហូឡង់ ព័រទុយហ្កាល់ និងអង់គ្លេសបានដាក់ឱសានវាទត្រឹមយប់ថ្ងៃអាទិត្យ ទី៣ កុម្ភៈឲ្យលោកម៉ាឌូរ៉ូរៀបចំបោះឆ្នោតប្រធានាធិបតីឡើងវិញ។
បើពុំនោះសោតទេ ពួកគេប្រកាសទទួលស្គាល់ប្រធានរដ្ឋសភាវ៉េណេស៊ុយអេឡាលោកហ័ន ហ្កាយដូជាប្រធានាធិបតីស្តីទីស្របច្បាប់ដូចបណ្តាប្រទេសមួយដែរ។ តែលោកម៉ាឌូរ៉ូដែលមានការគាំទ្រពីរុស្ស៊ី ចិន កូរ៉េខាងជើង ឬគុយបាបានស្នើជាថ្មីឲ្យមានការបោះឆ្នោតសភា និងថា លោកមិនត្រូវការស្តាប់ឱសានវាទរបស់អ្នកណាទាំងអស់។ ចំណែកលោកប្រធានាធិបតីសហរដ្ឋអាមេរិកដូណាល់ ត្រាំបានបញ្ជាក់ជាថ្មីនាថ្ងៃអាទិត្យ ទី៣ កុម្ភៈថា ការប្រើទ័ពអាមេរិកដើម្បីទម្លាក់លោកម៉ាឌូរ៉ូក៏ជាជម្រើសមួយនៅលើតុរបស់លោកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ