ស្វ៊ីស៖វេទិកាសេដ្ឋកិច្ចពិភពលោកក្នុងទីក្រុងដាវ៉ូសបើកធ្វើដោយគ្មានវត្តមានឥស្សរជនគ្រាក់ៗមួយចំនួន
វេទិកាសេដ្ឋកិច្ចពិភពលោកលើកទី៤៩ បានបើកធ្វើនាថ្ងៃអង្គារ ទី២២ មករាក្នុងទីក្រុងដាវ៉ូស ប្រទេសស្វ៊ីស។ មានអ្នកចូលរួមសរុបប្រមាណជា ៣ ០០០នាក់នៅក្នុងវេទិកាឆ្នាំនេះ ក្នុងនោះមានប្រមុខរដ្ឋ និងប្រមុខរដ្ឋាភិបាល ថៅកែគ្រាក់ៗ រួមទាំងឥស្សរជននៃសង្គមស៊ីវិលមកពីគ្រប់ជ្រុងជ្រោយក្នុងលោក។ មានការកត់សម្គាល់ចំនួនពីរសម្រាប់វេទិកាសេដ្ឋកិច្ចពិភពលោកលើកទី៤៩ ឆ្នាំនេះ ទី១ ការធ្លាក់ទាបនៃកំណើនសេដ្ឋកិច្ចចិនមិនធ្លាប់មាន គិតតាំងពីជិត ៣០ឆ្នាំកន្លងទៅ រួមទាំងការបញ្ចុះកំណើនសេដ្ឋកិច្ចក្នុងតំបន់ចាយប្រាក់អឺរ៉ូសម្រាប់ឆ្នាំ ២០១៩ ដែលប្រមើលមើលដោយអង្គការមូលនិធិរូបិយវត្ថុអន្តរជាតិ IMF និងកំណត់សម្គាល់ទី២ គឺអវត្តមានឥស្សរជនគ្រាក់ ពិសេសលោកប្រធានាធិបតីអាមេរិកដូណាល់ ត្រាំ។
ចុះផ្សាយនៅថ្ងៃ៖
ស្តាប់ - ០២:២១
កាលពីថ្ងៃទី១៧ ធ្នូឆ្នាំ ២០១៨ លោកដូណាល់ ត្រាំបានប្រកាសពីការចូលរួមរបស់លោក ព្រមទាំងគណៈប្រតិភូអាមេរិកនៅក្នុងវេទិកាសេដ្ឋកិច្ចពិភពលោកលើកទី៤៩។ កាលណោះ លោកត្រាំថែមទាំងបានត្រៀមលើកយកបញ្ហាការងារទៅនិយាយដែលលោកចាត់ទុកជាប្រធានបទអាទិភាពសម្រាប់ពិភពលោក។ នៅទីបំផុត លោកត្រាំបានប្រកាសលុបចោលការចូលរួមរបស់លោក ព្រមទាំងគណៈប្រតិភូអាមេរិកាំងទាំងមូលតែម្តង។ ទោះបីលោកត្រាំមិនបានបញ្ជាក់ពីមូលហេតុផ្លូវការក៏ដោយក៏គេអាចនិយាយបានថា មកពីលោកកំពុងក្រពុលមុខនឹងវិបត្តិថវិកាដែលបានធ្វើឲ្យស្ថាប័នសហព័ន្ធជាច្រើនគាំងដំណើរមកដល់សព្វថ្ងៃ។ ឃើញថា គ្មានមន្រ្តីផ្លូវការអាមេរិកណាម្នាក់មានវត្តមាននៅវេទិកាសេដ្ឋកិច្ចពិភពលោកពេលនេះទេ ពិសេសចំពេលដែលសង្រ្គាមពាណិជ្ជកម្មរវាងអាមេរិក និងចិនកំពុងបន្តមានយ៉ាងតានតឹង។
ក្រៅពីលោកត្រាំ សមភាគីបារាំងលោកម៉ាក្រុងក៏បានអវត្តមានដែរដោយហេតុផលពេលវេលាមិនអនុគ្រោះ។ តែក្រុមអ្នកសង្កេតការណ៍បានសម្លឹងឃើញហេតុផលផ្សេង គឺវិបត្តិនយោបាយ និងសង្គមដែលលោកម៉ាក្រុងកំពុងប្រឈមមុខនឹងចលនាបាតុកម្មរបស់ពួកអាវកាក់លឿង។ បន្ទាប់មក អវត្តមានឥស្សរជនម្នាក់ទៀតដែលមិនអាចកំបាំងមុខអ្នកផ្សេងបាន គឺលោកស្រីនាយករដ្ឋមន្រ្តីអង់គ្លេសទែររ៉េហ្សា ម៉េក្នុងពេលដែលលោកស្រីកំពុងខ្វាយខ្វល់នឹងសំណុំរឿង Brexit ដែលពេលវេលាកាន់តែខោចទៅ តែនៅមិនទាន់មានច្រកចេញ។ កំណត់សម្គាល់មួយទៀតក្រៅពីអវត្តមានឥស្សរជនគ្រាក់ៗ វេទិកាសេដ្ឋកិច្ចពិភពលោកឆ្នាំនេះបានបើកធ្វើឡើង ក្នុងពេលដែលបរិបទសេដ្ឋកិច្ចពិភពលោកមិនសូវល្អ។
ប្រទេសចិនដែលជាមហាអំណាចសេដ្ឋកិច្ចទី២ ក្នុងលោកទើបបានប្រកាសឲ្យដឹងពីអត្រាកំណើនសេដ្ឋកិច្ចទាបខ្លាំងមិនធ្លាប់មានតាំងពីជិត ៣០ឆ្នាំកន្លងទៅ។ ចំណែកអង្គការមូលនិធិរូបិយវត្ថុអន្តរជាតិ IMF ទើបបានប្រមើលមើលឡើងវិញពីកំណើនសេដ្ឋកិច្ចធ្លាក់ចុះនៅក្នុងតំបន់ចាយប្រាក់អឺរ៉ូសម្រាប់ឆ្នាំ ២០១៩។ ទន្ទឹមគ្នានេះ លទ្ធផលនៃការសិក្សាប្រចាំឆ្នាំមួយរបស់ស្ថាប័ន Price Waterhouse Coopers ឲ្យដឹងថា មានថៅកែគ្រាក់ៗក្នុងលោកតែ ៤២% ប៉ុណ្ណោះដែលមានសុទិដ្ឋិនិយមលើកំណើនសេដ្ឋកិច្ចពិភពលោកក្នុងឆ្នាំ ២០១៩ ពោលតិចជាងឆ្នាំ ២០១៨ ដែលមានដល់ទៅ ៥៧%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ