សង្គ្រាមពាណិជ្ជកម្ម ៖ អង្គការOCDE អំពាវនាវឱ្យបញ្ឈប់ភាពប្រទូសរ៉ាយ
ក្នុងឱកាសបើកសម័យប្រជុំប្រចាំឆ្នាំរបស់ខ្លួន ដែលកំពុងប្រព្រឹត្តទៅនៅទីក្រុងប៉ារីស ពីថ្ងៃពុធដល់ថ្ងៃព្រហស្បតិ៍នេះ អង្គការដើម្បីកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ហៅកាត់ថា OCDE បានធ្វើការអំពាវនាវឱ្យគ្រប់ភាគីបញ្ជៀសការបង្កើនបញ្ហាតានតឹងពាណិជ្ជកម្ម បញ្ឈប់អរិភាពក្នុងសង្គ្រាមពាណិជ្ជកម្ម។ សេចក្តីអំពាវនាវនេះធ្វើឡើង នៅតែប៉ុន្មានម៉ោងមុនសុន្ទរកថារបស់លោកប្រធានាធិបតីបារាំង ស្តីអំពី "ការស្ថាបនាឡើងវិញសេដ្ឋកិច្ចបែបពហុជាតិ" និងតែមួយថ្ងៃមុនអាមេរិកចាប់ផ្តើមអនុវត្តទណ្ឌកម្មដំឡើងពន្ធនាំចូលដែកថែបនិងអាលុយមីញ៉ូម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
"ក្រុមហ៊ុននៅកន្លែងខ្លះចាប់បាក់ទំនុកចិត្ត ហើយផលវិបាកនឹងអាចមានកាន់តែធ្ងន់ធ្ងរខ្លាំងប្រសិនបើមិនបញ្ឈប់បង្កើនបញ្ហាទេ !" នេះជាការព្រមានរបស់អគ្គលេខាធិការអង្គការOCDE។ ដោយមិនបន្ទោសចំឈ្មោះសហរដ្ឋអាមេរិក ដែលនឹងអាចផ្តើមដាក់ទណ្ឌកម្មដំឡើងពន្ធនាំចូលអាលុយមីញ៉ូម១០% និងដែកថែប២៥% ចាប់ពីថ្ងៃទី ១មិថុនាទៅផង ប្រមុខសេដ្ឋកិច្ចរបស់អង្គការ បានបន្ថែមថា បើអរិភាពនៅតែបន្តប៉ោងឥតឈប់ នោះកំណើនសេដ្ឋកិច្ចដែលពិភពលោកប្រឹងអស់រយៈពេលជិត១០ឆ្នាំ នឹងត្រូវរងគ្រោះយ៉ាងដំណំ។ តម្លៃប្រេងឡើង ដែលអាចបង្កអស្ថិរភាពដល់ប្រទេសជាច្រើនទៀត ក៏ជាការព្រួយបារម្ភរបស់អង្គការ ដោយទាមទារថា ការសម្របសម្រួលអន្តរជាតិជាសេចក្តីត្រូវបន្ទាន់បំផុត ជាងពេលណាៗទាំងអស់។
សេចក្តីព្រមាននេះធ្វើឡើងតែប៉ុន្មាននាទីមុន សុន្ទរកថារបស់លោកម៉ាក្រុង ប្រធានាធិបតីបារាំង ដែលត្រូវថ្លែងទៅកាន់សមាជិកអង្គការOCDE ទាំងអស់ និងដែលផ្តោតលើប្រធានបទ “ស្ថាបនាឡើងវិញសេដ្ឋកិច្ចបែបពហុជាតិ”។ ប៉ុន្តែចំណោទនៅត្រង់ថា តើឆន្ទៈរបស់លោកម៉ាក្រុង នឹងក្លាយជាសារ ជាការផ្តល់ជីវិតថ្មីដល់អង្គការ OCDE និងអង្គការពាណិជ្ជកម្មពិភពលោក ដែលលោកដូណាល់ ត្រាំ តែងវាយប្រហារដែលឬអត់។
ក្នុងពេលរង់ចាំ អង្គការ បានផ្តល់ការព្យាករជាថ្មីទម្លាក់កំណើនសេដ្ឋកិច្ចពិភពលោក នៅឆ្នាំនេះ ពី ៣,៩% មកត្រឹម៣,៨%វិញ និងរក្សាកំរិតកំណើនសេដ្ឋកិច្ចដដែលសម្រាប់ឆ្នាំ២០១៩។ ចំណែកសេដ្ឋកិច្ចអាមេរិក ដែលមានកំណើនលូតលាស់យូរអង្វែងជាងគេ នឹងស្គាល់ចម្រុងចម្រើនថែមទៀត ដោយសារតែកំណែទម្រង់ពន្ធដារកាលពីឆ្នាំទៅ ព្រមទាំងមានកំណើនសេដ្ឋកិច្ច ២,៩%នៅឆ្នាំនេះ និង២,៨%នៅឆ្នាំក្រោយ ពោលគឺគ្មានការប្តូរផ្លាស់ឡើយបើប្រៀបទៅនឹងការព្យាកររបស់OCDE កាលពីខែមីនា។
ប៉ុន្តែសម្រាប់តំបន់អឺរ៉ូវិញ បន្ទាប់ពីឆ្លងកាត់ត្រីមាសដំបូងមិនសូវស្វាហាប់ អង្គការព្យាករថានឹងមានកំណើនសេដ្ឋកិច្ចថយចុះ មកត្រឹម២,២%នៅឆ្នាំនេះ ទល់នឹង២,៥%បើប្រៀបទៅនឹងការព្យាករកាលពីខែមីនា។ ទាំងបារាំង ទាំងអាល្លឺម៉ង់ សុទ្ធតែនឹងមានកំណើនសេដ្ឋកិច្ចធ្លាក់ចុះទាំងអស់ អស់ប្រមាណ០,៣ពិន្ទុនៅឆ្នាំនេះ និងនៅដដែលនៅឆ្នាំ២០១៩។ នេះបើតាមការព្យាកររបស់អង្គការសហប្រតិបត្តិការ និងអភិវឌ្ឍសេដ្ឋកិច្ច OCDE៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ