បារាំង៖ពីជនអន្តោប្រវេសន៍ខុសច្បាប់ បុរសជនជាតិម៉ាលីឈ្មោះម៉ាមូឌូ ហ្កាសាម៉ាបានក្លាយជាវីរជន
នៅក្នុងប្រទេសបារាំង បុរសជនអន្តោប្រវេសន៍ខុសច្បាប់មកពីប្រទេសម៉ាលីឈ្មោះ ម៉ាមូឌូ ហ្កាសាម៉ា (Mamoudou Gassama) ត្រូវបានលោកប្រធានាធិបតីអេម៉ានុយអែល ម៉ាក្រុងទទួលជួបសន្ទនានៅក្នុងវិមានប្រធានាធិបតីអេលីសេនាថ្ងៃចន្ទ ទី២៨ ឧសភា។ ជំនួបនេះបានធ្វើឡើង ក្រោយពីបុរសជនជាតិម៉ាលីរូបនេះបានប្រថុយជីវិតទៅជួយសង្រ្គោះកូនក្មេងម្នាក់អាយុ ៤ឆ្នាំក្នុងទីក្រុងប៉ារីសកាលពីយប់ថ្ងៃសៅរ៍ ទី២៦ ឧសភា។ ជាការលើកទឹកចិត្ត លោកម៉ាក្រុងបានសន្យាផ្តល់សញ្ជាតិបារាំង និងយល់ព្រមឲ្យបុរសម៉ាមូឌូចូលបម្រើការងារនៅក្នុងអង្គភាពពន្លត់អគ្គិភ័យ និងសង្រ្គោះ។
ចុះផ្សាយនៅថ្ងៃ៖
ស្តាប់ - ០១:៥៩
អ្វីៗបានកើតមានឡើងនៅយប់ថ្ងៃសៅរ៍ ទី២៧ ឧសភា ក្នុងពេលដែលមានកូនក្មេងម្នាក់អាយុ ៤ឆ្នាំកំពុងតោងលើបង្កាន់យ៉មុខផ្ទះសំយ៉ុងជើងចុះក្រោមមានកម្ពស់ ៤ជាន់។ រូបភាពមួយនេះបានធ្វើឲ្យអ្នកធ្វើដំណើរតាមផ្លូវ និងអ្នកជិតខាងនាំគ្នាស្រែកផ្អើលឆោឡោដោយមិនដឹករកវិធីអ្វីដើម្បីអាចជួយជីវិតរូបកូនក្មេងនោះ។ គឺសម្រែកឆោឡោនេះហើយដែលបានឮដល់ត្រចៀកបុរសជនជាតិម៉ាលីអាយុ ២២ឆ្នាំឈ្មោះម៉ាមូឌូ ហ្កាសាម៉ា និងបានជំរុញរូបម៉ាមូឌូសម្រេចចិត្តរត់ឆ្លងថ្នល់ រួចហាក់តោងតាមបង្កាន់យ៉ដោយដៃទទេពីជាន់ទី១ ដល់ជាន់ទី៤ រហូតសង្រ្គោះរូបកូនក្មេងនោះបានទាន់ពេលក្នុងរយៈពេលដ៏ខ្លី។
រូបភាពនៃការប្រថុយជីវិតដោយប្រើតែកម្លាំងរបស់បុរសម៉ាមូឌូត្រូវបានផ្សព្វផ្សាយ និងមើលតៗគ្នារាប់លាននាក់នៅតាមបណ្តាញសង្គម Facebook។ គួររម្លឹកជូនថាមានអាយុ ២២ឆ្នាំ បុរសម៉ាមូឌូ ហ្កាសាម៉ាជាជនអន្តោប្រវេសន៍ខុសច្បាប់មកពីប្រទេសម៉ាលី។ តែចាប់ពីពេលនេះតទៅ បុរសម៉ាមូឌូមិនត្រឹមលែងជាជនអន្តោប្រវេសន៍ខុសច្បាប់ប៉ុណ្ណោះទេ តែបានក្លាយជាវីរជន និងត្រូវបានលោកប្រធានាធិបតីអេម៉ានុយអែល ម៉ាក្រុងសន្យាផ្តល់សញ្ជាតិបារាំង និងយល់ព្រមឲ្យចូលបម្រើការងារនៅក្នុងអង្គភាពពន្លត់អគ្គិភ័យ និងសង្រ្គោះទៀតផង។
ការសន្យារបស់លោកម៉ាក្រុងបានធ្វើឡើងនៅក្នុងកិច្ចសន្ទនាជាមួយបុរសម៉ាមូឌូក្នុងវិមានអេលីសេនៅព្រឹកថ្ងៃចន្ទ ទី២៨ ឧសភា។ « លោកបានក្លាយជាគំរូម្នាក់ ព្រោះមានមនុស្សរាប់លានបានឃើញទង្វើរបស់លោក។ ដូច្នេះវាជារឿងធម្មតាដែលបារាំងត្រូវថ្លែងអំណរគុណ » នេះជាសម្តីរបស់លោកម៉ាក្រុងនិយាយទៅកាន់បុរសម៉ាមូឌូ។ គ្រាន់តែមួយប៉ប្រិចភ្នែក បុរសម៉ាមូឌូបានក្លាយពីជនអន្តោប្រវេសន៍ខុសច្បាប់ទៅជាវីរជនគំរូម្នាក់សម្រាប់ពលរដ្ឋបារាំងទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ