និសិត្យបារាំងធ្វើបាតុកម្មបិទសាលាដើម្បីប្រឆាំងកំណែទម្រង់ស្តីពីនីតិវិធីជ្រើសនិស្សិតអោយចូលរៀន
នៅប្រទេសបារាំង សាកលវិទ្យាល័យនានាជាច្រើនកន្លែង ត្រូវបានបិទទ្វារកាលពីថ្ងៃអង្គារម្សិលមិញ ដោយពួកនិសិត្ស បាននាំគ្នា ធ្វើបាតុកម្មដើម្បីប្រឆាំងតវ៉ានឹងកំណែទម្រង់ថ្មីៗ ស្តីពី នីតិវិធី នៃ ការជ្រើស និស្សិតអោយចូលសិក្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
នៅទីក្រុងប៉ារីស កាលពីរសៀលម្សិលមិញ ក្យួនបាតុកម្ម របស់និស្សិតបារាំងប្រមាណជា១ ២០០នាក់ ត្រូវបានដង្ហែរចេញនៅចន្លោះរវាង ម្តុំ ទីលានសាកលវិទ្យល័យ La Sorbonne និងសាកលវិទ្យាល័យនៅ Jessiru ដើម្បីប្រឆាំងនឹងច្បាប់ Vidal នៅក្នុងការជ្រើសសំរាំងយកនិស្សិតនៅមុនពេលចូលសិក្សាក្នុងមហាវិទ្យាល័យជាន់ខ្ពស់ និងជាពិសេសប្រឆាំងនឹងនយោបាយរបស់លោកប្រធានាធិបតីបារាំងEmmanuel Macron ។
នៅក្នុងក្បួនបាតុកម្ម ដែលចូលរួមដោយពួកនិស្សិត ក្រុមបុគ្គលិកនៃសាកលវិទ្យាល័យ សិស្សសាលាខ្លះៗ អ្នកឥតការងារធ្វើ ក៏ព្រមទាំងបុគ្គលិកខាងអាយស្ម័យាន្តខ្លះដែរ ក្រុមបាតុករ បាននាំគ្នាស្រែកជាពាក្យស្លោកថា”ដើម្បីអោយទទួលបាននូវជ័យជំនះ ពួកយើងត្រូវតែរួបរួមកម្លាំងគ្នាជាធ្លុងមួយ” ឬ ក៏ថា”ពុំមែនពួកនិស្សិតទេដែលត្រូវជ្រើសសម្រាំងនោះ តែ គឺ រដ្ឋាភិបាលទេដែលត្រូវជម្រុះចេញ” ។ នៅពេលបញ្ចប់ក្បួនដង្ហែរចលនាបាតុកម្ម ពួកនិស្សិត ក៏បានអំពាវនាវផងដែរ ឲ្យចលនារបស់គេ នាំគ្នាធ្វើដំណើរទៅកាន់ទីស្នងការប៉ូលីសនៅ Nanterre ជាយក្រុងប៉ារីស ដើម្បី ជួយគាំទ្រ ដល់ មិត្តរួមថ្នាក់ របស់ខ្លួនចំនួន ៧ រូប ដែលត្រូវបាន ប៉ូលីសព័ទ្ធចាប់ខ្លួន នៅ មួយថ្ងៃមុន នៃ ការរួមប្រជុំគ្នាជាទូទៅមួយ ដែលចូលរួមដោយក្រុមនិស្សិតប្រមាណជា ២០០នាក់។
គួរបញ្ជាក់ថា ចលនាកែណ្ឌគ្នីគ្នារបស់និស្សិតបារាំងម្សិលមិញនេះ បានរីករាលដាលទៅដល់តំបន់ជាច្រើនទៀតនៅក្នុងប្រទេសបារាំង ដូចជានៅ Toulouse, Montpollier ឬក៏នៅ Lille ជាដើម។ សាកលវិទ្យាល័យចំនួន៣ ត្រូវបានបិទខ្ទប់ជិត ចាប់តាំងពីជាច្រើនថ្ងៃកន្លងមកហើយ តែក៏នឹង អាចបន្ត ទៅមុខទៀតរហូតដល់ជាច្រើនសប្តាហ៍ផងដូចជានៅ Montpellier Toulouse និង នៅ តំបន់ ប៉ារីស។
យោងតាម ក្រសួងសិក្សាធិការជាន់ខ្ពស់បារាំង នៅក្នុងចំណោមទីតាំងសាកលវិទ្យាល័យទាំងអស់ចំនួន ៤០០ យ៉ាងហោចក៏មានទីតាំង សាកលវិទ្យាល័យ ចំនួន ១០ ដែរ ដែលកំពុងស្ថិតនៅភាពរំខានអុកឡុក។ នៅ Nancy ក្នុងភាគខាងកើតបារាំង វិញ ការសិក្សានៅក្នុងផ្នែកអក្សរសាស្រ្តនិងវិទ្យាសាស្ត្រ ត្រូវបាន អាក់ខាន ចាប់តាំងពីថ្ងៃទិ២២ មីនាមកម្ល៉េះ និងបានបន្តរហូតមកដល់ថ្ងៃព្រឹកពុធនេះទៀត ដោយមូលហេតុ អាចមានគ្រោះ ប្រឈមមុខដាក់ គ្នារវាងពួកនិសិត្ស-នេះបើយោងតាមការជួនដំណឹងរបស់សាកលវិទ្យាល័យនៅ Lorraine៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ