បារាំង៖ឩនភាពថវិកាជាតិមានអត្រាក្រោម ៣% ដែលជាកម្រិតកំណត់ដោយសហភាពអឺរ៉ុប
នៅក្នុងប្រទេសបារាំង វិទ្យាស្ថានជាតិផ្នែកស្ថិតិ និងសិក្សាសេដ្ឋកិច្ចបានឲ្យដឹងនៅថ្ងៃចន្ទ ទី២៦ មីនានេះថា អត្រានៃឩនភាពថវិកាជាតិសម្រាប់ឆ្នាំ ២០១៧ កន្លងទៅមាន ២,៦% នៃផលិផលសរុបក្នុងស្រុក ពោលតិចជាងការប្រមើលទុកចំនួន ០,៣%។ គិតតាំងពីឆ្នាំ ២០០៧ នេះជាលើកទី១ ដែលឩនភាពថវិកាជាតិរបស់បារាំងស្ថិតក្រោម ៣% ដែលជាកម្រិតកំណត់ដោយសន្ធិសញ្ញាសហភាពអឺរ៉ុប។ ក្នុងឆ្នាំ ២០១៦ អត្រានៃឩនភាពថវិកាជាតិរបស់បារាំងមានដល់ទៅ ៣,៤%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
អត្រាផ្លូវការនៃឩនភាពថវិកាជាតិរបស់បារាំងសម្រាប់ឆ្នាំ ២០១៧ មានត្រឹម ២,៦% ពោលតិចជាងការរំពឹងទុកដែលមាន ២,៩%។ តាមវិទ្យាស្ថានជាតិផ្នែកស្ថិតិ និងសិក្សាសេដ្ឋកិច្ចហៅកាត់ថា l’Insee គឺកំណើនចំណូលពន្ធដែលបានអនុញ្ញាតឲ្យឩនភាពថវិកាជាតិធ្លាក់ចុះក្នុងឆ្នាំ ២០១៧ ហើយកំណើនចំណូលពន្ធដែលទទួលបានក៏ដោយសារតែបរិបទសេដ្ឋកិច្ចពិភពលោកកំពុងមានអំណោយផលល្អ។ គឺបរិបទសេដ្ឋកិច្ចពិភពលោកល្អនេះហើយដែលបានធ្វើឲ្យបារាំងទទួលបានកំណើនសេដ្ឋកិច្ចជាង ២% ក្នុងឆ្នាំ ២០១៧។
l’Insee បានកត់សម្គាល់ឃើញថា ឩនភាពថវិកាជាតិធ្លាក់ចុះមិនបានធ្វើឲ្យបំណុលសាធារណៈធ្លាក់ចុះទេ ផ្ទុយទៅវិញ មានការកើនឡើងបន្តិចក្នុងឆ្នាំ ២០១៧ ធៀបនឹងឆ្នាំ ២០១៦។ នាដំណាច់ឆ្នាំ ២០១៧ បារាំងមានអត្រាបំណុលដល់ទៅ ៩៧% នៃផលិតផលសរុបក្នុងស្រុក ពោលច្រើនជាងឆ្នាំ ២០១៦ ដែលមានត្រឹម ៩៦,៦% នៃផលិតផលសរុបក្នុងស្រុក។ បើនិយាយជាទឹកលុយ គឺមាន ២ ២១៨ ០០០លានអឺរ៉ូក្នុងឆ្នាំ ២០១៧ ទល់នឹង ២ ១៥២ ០០០លានអឺរ៉ូក្នុងឆ្នាំ ២០១៦។ លោក Bruno Le Maire រដ្ឋមន្រ្តីក្រសួងសេដ្ឋកិច្ចបានបញ្ជាក់ថា ឩនភាពថវិកាជាតិក្នុងឆ្នាំ ២០១៨ នឹងមាន ២,៨% ដែលជាកម្មវត្ថុមានចែងនៅក្នុងច្បាប់ហិរញ្ញវត្ថុសម្រាប់ឆ្នាំ ២០១៨ និង ២០២២។
ទោះជាយ៉ាងនេះក្តី អត្រានៃឩនភាពថវិកាជាតិស្ថិតក្រោម ៣% ជាដំណឹងល្អមួយសម្រាប់រដ្ឋាភិបាល ព្រោះវាជាកម្រិតមួយដែលកំណត់ដោយសន្ធិសញ្ញាសហភាពអឺរ៉ុប។ សូមជម្រាបជូនថា បារាំងជាប្រទេសអឺរ៉ុបចុងប៉ូចគេជាមួយប្រទេសអេស្ប៉ាញដែលមានឩនភាពថវិកាជាតិលើសពី ៣%។ តាមធម្មតា អឺរ៉ុបត្រូវពិន័យសមាជិកណាដែលអត្រាឩនភាពថវិកាជាតិលើសពី ៣%។ តែកន្លងមក អឺរ៉ុបតែងទុកពេល ១ឆ្នាំ ឬ ២ឆ្នាំដល់ប្រទេសខ្លះឲ្យប្រឹងប្រែងនាំអត្រាឩនភាពថវិកាជាតិមកនៅក្រោម ៣%។ ជាក់ស្តែង អឺរ៉ុបបានពន្យារពេលឲ្យបារាំងចំនួន ២ឆ្នាំ គឺ ២០១៣ និង ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ